ନୟାଗଡ଼ ଅଫିସ,୨୯।୧୨- ୫ ଦିନ ଧରି ସ୍ଥାନୀୟ ଖେଳପଡ଼ିଆରେ ଚାଲି ଆସୁଥିବା ନୟାଗଡ଼ ଜିଲା ମହୋତ୍ସବ ଓ ପଲ୍ଲିଶ୍ରୀ ମେଳା ୨୦୧୯ର ଶନିବାର ଉଦ୍ଯାପିତ ହୋଇଛି। ଜିଲାପାଳ ଡା. ପୋମା ଟୁଡ଼ୁଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ଯାପନୀ ଉତ୍ସବରେ ଜଙ୍ଗଲ, ପରିବେଶ ଓ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ ମୁଖ୍ୟ ଅତିଥିଭାବେ ଯୋଗ ଦେଇ ରାଜ୍ୟର ୩୦ ଜିଲା ଭିତରୁ ଓଡ଼ିଶାର କଳା , ସଂସ୍କୃତି ଓ ଐତିହ୍ୟକୁ ବଞ୍ଚାଇ ରଖିଥିବା ଜିଲା ନୟାଗଡ଼ ବୋଲି ପ୍ରକାଶ କରିଥିଲେ। କଳା, ସଂସ୍କୃତି, ଜ୍ୟୋତିର୍ବିଜ୍ଞାନୀ କ୍ଷେତ୍ରରେ ଜିଲାର ମହାପୁରୁଷମାନେ ସେମାନଙ୍କର ପାରଦର୍ଶିତା ଦେଖାଇ ଆସିଛନ୍ତି। ବର୍ତ୍ତମାନ କଳା, ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବା ପାଇଁ ହେଉଥିବା ମହୋତ୍ସବ ଏକ ପ୍ରଂଶସନୀୟ କାର୍ଯ୍ୟ । ନୟାଗଡ଼ ଜିଲାକୁ ଏକ ଶ୍ରେଷ୍ଠ ଜିଲାର ପରିଣତ କରିବା ପାଇଁ ସମସ୍ତେ ବ୍ରତୀ ହେବା ପାଇଁ ସେ ଆହ୍ବାନ ଦେଇଥିଲେ। ସ୍ଥାନୀୟ ବିଧାୟକ ତଥା କୃଷି ଓ ଉଚ୍ଚ ଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ଅତିଥି ଭାବେ ଯୋଗ ଦେଇ ଜିଲା ମହୋତ୍ସବ ତାର ଉତ୍କର୍ଷତା ପ୍ରତିପାଦନ କରୁଥିବା ପ୍ରକାଶ କରିଥିଲେ। ଜିଲା ପରିଷଦ ଉପାଧ୍ୟକ୍ଷ ଅଖିଳ କୁମାର ଜାନୀ ସମ୍ମାନିତ ଅତିଥିଭାବେ ଯୋଗ ଦେଇ ନୟାଗଡ଼ ଜିଲାର ଗରିମା ବିଷୟରେ ବର୍ଣ୍ଣନା କରିଥିଲେ। ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ବିଧାନ ଚନ୍ଦ୍ର ରାୟ, ପିଡି ସୁବାସ ଚନ୍ଦ୍ର ରାୟ , ଉପ ଜିଲାପାଳ ଲଗ୍ନଜିତ ରାଉତ, ଏସ୍ପି ଶଶିଭୂଷଣ ଶତପଥୀ ପ୍ରମୁଖ ଅତିଥିଭାବେ ଯୋଗ ଦେଇଥିଲେ । ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ କାର୍ଯ୍ୟକ୍ରମ ପରିଚାଳନା କରିଥିଲେ। କାର୍ଯ୍ୟକ୍ରମ ପରେ ବର୍ଷା ଡ୍ୟାନ୍ସ ଗ୍ରୁପ୍ ନୟାଗଡ଼ ପକ୍ଷରୁ ବନ୍ଦନା ପରିବେଷଣ କରାଯାଇଥିଲା। ଏହା ପରେ ଓଡ଼ିଆ କଣ୍ଠଶିଳ୍ପୀ ଅଭିଜିତ ମଜୁମଦାରଙ୍କ ଗୀତ ଶୀତୁଆ ସନ୍ଧ୍ୟାକୁ ମତୁଆଲା କରିଥିଲା। ଅଭିଜିତ୍ଙ୍କ ଗୀତ ଶୁଣିବା ପାଇଁ ପ୍ରବଳ ଭିଡ଼ ଜିମିଥିଲା। ୨ ପ୍ଲାଟୁର୍ନ ଫୋର୍ସ ମୁତୟନ ହୋଇ ଶାନ୍ତି ଶୃଙ୍ଖଳା ବଜାୟ ରହିଥିଲା।
