ଲକ୍ଷ୍ନୌ,୧୦।୮: ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସରକାର ଏବେ ଉତ୍ତର ପ୍ରଦେଶରେ ହାଇଟେକ୍ କ୍ଲିନିକ୍ର ଯୋଜନା କରୁଥିବା ସୂଚନା ମିଳିଛି। ଗୋରଖପୁରର ଚିଫ୍ ମେଡିକାଲ ଅଫିସର ଡ. ଶ୍ରୀକାନ୍ତ ତିଓ୍ବାରୀ ଗଣମାଧ୍ୟମକୁ ସୂଚନା ଦେଇ କହିଛନ୍ତି କି ଆଗକୁ ଡାକ୍ତର ନୁହେଁ ରୋଗୀଙ୍କୁ ରୋବୋ ଔଷଧ ଦେବ। ସେ କହିଛନ୍ତି ଓପିଡିରେ ଆଉ କେହି ଡାକ୍ତର ରହିବେ ନାହିଁ। କେବଳ ନର୍ସ, ଲ୍ୟାବ ଟେକ୍ନିସିଆନ୍ ଓ ସ୍ବିପର ରହିବେ। ଏଠାରେ ଲାଗିଥିବା ମେଶିନ୍ ରୋଗୀଙ୍କ ରକ୍ତଚାପଠାରୁ ହୃଦସ୍ପନ୍ଦନ ପର୍ଯ୍ୟନ୍ତ ସବୁକୁ ଯାଞ୍ଚ କରିବ। ଏହାପରେ ଡାକ୍ତର ଟେଲିକନଫରେନ୍ସିଂ ଜରିଆରେ ରୋଗୀଙ୍କ ସହ କଥା ହେବେ। ସେଠାରେ ଥାଇ ଡାକ୍ତର ସ୍କ୍ରିନ୍ ମାଧ୍ୟମରେ ରିପୋର୍ଟ ଦେଖିନେବେ। ଏହାପରେ ଡାକ୍ତର ଯେଉଁ ଔଷଧ କହିବେ ତାହା ମେଶିନ ବା ରୋବୋ ଯୋଗାଇ ଦେବ। ଏକ ମଲ୍ଟି ନ୍ୟାଶନାଲ କମ୍ପାନୀ ସହାୟତାରେ ଏହା ଆରମ୍ଭ କରାଯାଇଥିବା ବେଳେ ପ୍ରଥମେ ପାଇଲଟ୍ ପ୍ରୋଜେକ୍ଟ ଭାବେ ଏହା ୧୦ଟି ପିଏଚ୍ସିରେ ଲାଗିବ ବୋଲି ଜଣାପଡିଛି।
