ମାଲକାନଗିରି, ୨୯।୫(ଡି.ଏନ୍.ଏ.) – ହାଇସ୍କୁଲରେ ପାଠ ପଢିବା ପାଇଁ ଜାତିଗତ ପ୍ରମାଣପତ୍ର ଆବଶ୍ୟକ। କିନ୍ତୁ ବାରମ୍ବାର ଆବେଦନ କଲେ ମଧ୍ୟ ପ୍ରମାଣପତ୍ର ମିଳୁନି। ଫଳରେ ପିଲାମାନଙ୍କ ଭବିଷ୍ୟତ ଏବେ ଅନ୍ଧାରରେ। ଏହାର ବିକଳ୍ପ ବ୍ୟବସ୍ଥା କରିବାକୁ ମାଲକାନଗିରି ଜିଲା ସଦର ବ୍ଲକ ସିନ୍ଧ୍ରିମାଳ ପଞ୍ଚାୟତ ଦୋରାଗୁଡ଼ା ଗ୍ରାମବାସୀ ଓ ପାଠପଢୁଆ ପିଲା ଦାବି କରିଛନ୍ତି। ଏଭଳି ନ ହେଲେ ଉପାୟଶୂନ୍ୟ ହୋଇ ମାଓବାଦୀ ସଙ୍ଗଠନରେ ସାମିଲ ହେବୁ ବୋଲି ସେମାନେ ଚେତାବନୀ ଦେଇଛନ୍ତି।
ଗାଁରେ ପ୍ରାୟ ୩୦ରୁ ଊର୍ଦ୍ଧ୍ୱ କୋୟା, ଭୂମିଆ, ହାଲବା, ପରଜା ସମ୍ପ୍ରଦାୟର ଆଦିବାସୀ ପରିବାର ବସବାସ କରୁଛନ୍ତି। ସେମାନଙ୍କୁ ଜଙ୍ଗଲ ଜମି ପଟ୍ଟା ମିଳିଛି। କିନ୍ତୁ ଜାତିଗତ ପ୍ରମାଣପତ୍ର ମିଳୁ ନ ଥିବାରୁ ପିଲାମାନେ ହାଇସ୍କୁଲରେ ପଢିବା ପାଇଁ ବିଭିନ୍ନ ଅସୁବିଧା ହେଉଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଗାଁ ର କେତେକ ଛାତ୍ରୀ ଦୋରାଗୁଡା ସ୍କୁଲରୁ ପଞ୍ଚମ ପାସ୍ କଲାପରେ ସିନ୍ଧ୍ରିମାଳ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ ପଢିଥିଲେ। ଏହି ସମୟରେ ଆଦିବାସୀଙ୍କ ପାଇଁ ରହିଥିବା ବିଭିନ୍ନ ସୁବିଧା ସେମାନଙ୍କୁ ମିଳିଥିଲା। ପରେ ହାଇସ୍କୁଲରେ ପଢିବା ପାଇଁ ଅନ୍ୟ ସ୍କୁଲରେ ନାମ ଲେଖାଇ ଥିଲେ ମଧ୍ୟ ସେହି ସବୁ ବିଦ୍ୟାଳୟରେ ପ୍ରଧାନଶିକ୍ଷକମାନେ ଜାତିଗତ ପ୍ରମାଣ ପତ୍ର ଦାଖଲ କରିବା ପାଇଁ ବାରମ୍ବାର କହୁଛନ୍ତି। ଗତ ଶିକ୍ଷା ବର୍ଷରେ ଗ୍ରାମର ନଅଜଣ ଛାତ୍ରୀଛାତ୍ର ପଡିଆ ବ୍ଲକର ଇରାଲ ଗୁଣ୍ଡି ଉଚ୍ଚ ବିଦ୍ୟାଳୟରେ ନବମ ଶ୍ରେଣୀରେ ନାମ ଲେଖାଇଥିଲେ ମଧ୍ୟ ଜାତିଗତ ପ୍ରମାଣ ପତ୍ର ନ ପାଇବାରୁ ପାଠ ଛାଡି ଘରେ ରହି କୁଲି ମଜୁରି କାମ କରୁଛନ୍ତି ବୋଲି ଗ୍ରାମବାସୀ କହିଛନ୍ତି। ଚଳିତ ଶିକ୍ଷାବର୍ଷରେ ଦୋରାଗୁଡା ଗ୍ରାମର ଛାତ୍ରୀ ଯମୁନା ଖିଲ ପେଡାକୋଣ୍ଡା ଉଚ୍ଚ ବିଦ୍ୟାଳୟରେ ପଢୁଥିବାବେଳେ ଜାତିଗତ ପ୍ରମାଣ ପତ୍ର ପାଇଁ ମାଲକାନଗିରିରେ ଅନ୍ଲାଇନରେ ଆବେଦନ କରିଥିବା ରସିଦ ଦେଖାଇ ପାଠ ପଢୁଛନ୍ତି। ଗାଁର ସବିତା ହନ୍ତାଳ ଚିତ୍ରକୋଣ୍ଡା ଅନୁସୂଚିତ ଜାତି ଓ ଜନଜାତି ବିଦ୍ୟାଳୟରେ ନବମ ଶ୍ରେଣୀରେ ପାଠ ପଢୁଥିବା ବେଳେ ସେ ମଧ୍ୟ ଅନୁରୂପ ଜାତିଗତ ପ୍ରମାଣ ପତ୍ର ପାଇଁ ଅନ୍ଲାଇନ୍ରେ ଆବେଦନ କରିଥିବା ରସିଦ ଦେଖାଇ ପାଠ ପଢୁଛନ୍ତି। କିନ୍ତୁ ଜାତିଗତ ପ୍ରମାଣପତ୍ର ପାଇଁ ଗତ ଦୁଇମାସ ଧରି ସିନ୍ଧ୍ରିମାଳ ରାଜସ୍ବ ନିରୀକ୍ଷକ ଏବଂ ମାଲକାନଗିରି ତହସିଲ କାର୍ଯ୍ୟାଳୟକୁ ବାରମ୍ବାର ଦୌଡୁଥିଲେ ମଧ୍ୟ କୌଣସି ଲାଭ ହେଉନି। ଜାତିଗତ ପ୍ରମାଣପତ୍ର ମିଳୁ ନ ଥିବାରୁ ମାଓବାଦୀ ସଙ୍ଗଠନରେ ମିଶିବୁ ବୋଲି ଗ୍ରାମର ପଦଲାମ ଭୂମିଆ, ଯମୁନା ଖିଲ ଓ ସବିତା ହନ୍ତାଳ ଗଣମାଧ୍ୟମ ଆଗରେ କହିଛନ୍ତି। ଏ ନେଇ ମାଲକାନଗିରି ତହସିଲଦାର ଡା. ଗୁଣନିଧି ନାୟକଙ୍କୁ ପଚାରିବାରୁ ସେ କହିଛନ୍ତି, କେଉଁ କାରଣରୁ ସେମାନଙ୍କୁ ଜାତିଗତ ପ୍ରମାଣପତ୍ର ମିଳିବାରେ ବିଳମ୍ବ ହେଇଛି ତାହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ। କୌଣସି ଛାତ୍ରୀଛାତ୍ରଙ୍କୁ ଜାତିଗତ ପ୍ରମାଣପତ୍ର ପାଇଁ ପାଠପଢାରୁ ବଞ୍ଚତ୍ତ କରାଯିବନି।
