ଆରଡ଼ି,୨୧।୨ (ଡି.ଏନ.ଏ.)-ମହାଶିବରାତ୍ରି ପାଇଁ ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ିର ବାବା ଆଖଣ୍ଡଳମଣିଙ୍କ ପୀଠ ଚଳଚଞ୍ଚଳ ହୋଇଉଠିଛି। ଜିଲା, ପୋଲିସ ଓ ମନ୍ଦିର ପ୍ରଶାସନ ତତ୍ପର ହୋଇପଡ଼ିଛନ୍ତି। ଶୁକ୍ରବାର ଭୋର ୪ଟାରେ ମନ୍ଦିର ପହଡ଼ ଖୋଲାଯାଇ ମଙ୍ଗଳ ଆଳତି କରାଯିବ। କନିକା ରାଜାଙ୍କ ପକ୍ଷରୁ ପହିଲି ଘର୍ଷଣ କରାଯିବା ପରେ ୫ଟା ୧୫ରେ ପାଳିଆଙ୍କ ଦ୍ୱାରା ପହିଲି ଖେଚୁଡି ଭୋଗ, ୫ଟା ୪୫ରୁ ରାତି ୧୧ଟା ୩୦ ପର୍ଯ୍ୟନ୍ତ ସର୍ବସାଧାରଣଙ୍କ ଦିଅଁ ଦର୍ଶନ ଓ ଘର୍ଷଣ ଭୋଗ କରାଯିବ। ରାତି ୧ଟା ୩୦ରୁ ୩ଟା ୧୫ ପର୍ଯ୍ୟନ୍ତ ସର୍ବସାଧାରଣଙ୍କ ସୁନାବେଶ ଦର୍ଶନ ଓ ୪ଟା ୩୦ରୁ ୫ ଟା ମଧ୍ୟରେ ମନ୍ଦିର ଚୂଡାକୁ ମହାଦୀପ ଉଠିବ ବୋଲି ମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ସୂଚନା ଦିଆଯାଇଛି।
ପୀଠରେ ମହାଦୀପ ଦର୍ଶନ ଲାଗି ଦୂରଦୂରାନ୍ତରୁ ଭକ୍ତଙ୍କ ଆଗମନ ବି ଧୀରେ ଧୀରେ ହେଲାଣି। ସ୍ଥାୟୀ ବ୍ୟବସାୟୀମାନେ ନିଜର ଦୋକାନ ସଜାଇବାରେ ଲାଗିଛନ୍ତି। ଉଠାଦୋକାନୀ ମଧ୍ୟ ନିଜର ଦୋକାନ ମେଲି ଦେଲେଣି। ପାରମ୍ପରିକ ପ୍ରଥା ଅନୁସାରେ ଶିବରାତ୍ରି ପୂର୍ବଦିନ ମନ୍ଦିର ପ୍ରଶାସନ ପକ୍ଷରୁ ପୀଠରେ ଅବସ୍ଥାନ କରୁଥିବା ୨୭୦ ସେବାୟତ ପରିବାରଙ୍କୁ ମିଠା ପ୍ୟାକେଟ ବଣ୍ଟନ କରାଯାଇଛି। ଏହାଦ୍ୱାରା ସେବାୟତ ଓ ମନ୍ଦିର ପ୍ରଶାସନ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କ ସୁଦୃଢ଼ ହୁଏ ବୋଲି ମନ୍ଦିର ପରିଚାଳକ ବିଦ୍ୟାଧର ପଲାଇ ସୂଚନା ଦେଇଛନ୍ତି। ଭିଡ଼ ନିୟନ୍ତ୍ରଣ ପାଇଁ ପୋଲିସ ପକ୍ଷରୁ ବ୍ୟାରିକେଡ୍ ବ୍ୟବସ୍ଥା ସହ ପୀଠର ଅନ୍ୟାନ୍ୟ ସ୍ଥାନରେ ବାଉଁଶ ଖୁଣ୍ଟ ପୋତା ଚାଲିଛି। ପୂର୍ବବର୍ଷ ପରି ପୀଠକୁ ଲାଗି ରହିଥିବା ତିନିତର, ଧାନଖଣିଆ, ମୂଅଁା-ମାନପୁର ଘାଟ ଶିବରାତ୍ରିର ସନ୍ଧ୍ୟା ସାଢ଼େ ୬ଟାରୁ ବନ୍ଦ ରହିବା ପାଇଁ ଜିଲା ପ୍ରଶାସନ ନିଷ୍ପତ୍ତି ନେଇଛି। ପୂର୍ବଦିନ ଉପଜିଲାପାଳ ପୀଠରେ ଉପସ୍ଥିତ ରହି ପରିସ୍ଥିତି ଅନୁଧ୍ୟାନ କରିଛନ୍ତି। ପୀଠରେ ଥିବା ନଦୀଘାଟରେ ପ୍ରଶାସନ ପକ୍ଷରୁ ଓଡ୍ରାଫ ଟିମ୍ ଏବଂ ଅଗ୍ନିଶମ ବାହିନୀ ପୂର୍ବଦିନଠାରୁ ପହଞ୍ଚିଛନ୍ତି। ୨୪ ଘଣ୍ଟା ଉଭୟ ଟିମ୍ ନଦୀଘାଟରେ ସଜାଗ ରହିବା, ପୀଠ ବାହାରେ ଆମ୍ବୁଲାନ୍ସ ଯାନ ରଖାଯିବା, ସ୍ବାସ୍ଥ୍ୟକେନ୍ଦ୍ର ବ୍ୟତୀତ ଅନ୍ୟାନ୍ୟ ଅସ୍ଥାୟୀ ସ୍ବାସ୍ଥ୍ୟ ଶିବିରରେ ଡାକ୍ତର ଓ ସ୍ବାସ୍ଥ୍ୟ କର୍ମଚାରୀଙ୍କୁ ଆଲର୍ଟ ରଖିବା, ୨୪ ଘଣ୍ଟା ବିଦ୍ୟୁତ୍ ସେବା ଯୋଗାଇଦେବା, ଜଳ ଯୋଗାଣ ଓ ଅନ୍ୟାନ୍ୟ କାର୍ଯ୍ୟ ପାଇଁ ବିଭିନ୍ନ ବିଭାଗ କର୍ମଚାରୀ ପୀଠ ମଣ୍ଡନ କରିସାରିଲେଣି। ମନ୍ଦିର ବେଢ଼ା ଓ ବାହାରେ ବ୍ୟାପକ ପୋଲିସ ମୁତୟନ କରାଯିବାର ନିଷ୍ପତ୍ତି ନିଆଯାଇଛି ବୋଲି ଆରଡ଼ି ଫାଣ୍ଡି ଅଧିକାରୀ ପ୍ରଦୀପ ନାୟକ ସୂଚନା ଦେଇଛନ୍ତି। ଏଥର ପୀଠରେ ଜଣେ ଅତିରିକ୍ତ ଏସ୍ପିଙ୍କ ସହ ୪ ଡିଏସ୍ପି, ୮ ଇନ୍ସପେକ୍ଟର, ୨୫ ସବଇନ୍ସପେକ୍ଟର, ୩୦ ଏଏସ୍ଆଇ, ୧୮ ପ୍ଲାଟୁନ ପୋଲିସ ଫୋର୍ସ, ୫୦ରୁ ଅଧିକ ମହିଳା ଫୋର୍ସ ପୀଠରେ କର୍ତ୍ତବ୍ୟ ସମ୍ପାଦନ କରିବେ। ସେମାନଙ୍କ ମଧ୍ୟରୁ ଅନେକ ଏବେ ପୀଠ ଓ ନିକଟରେ ଥିବା ବିଭିନ୍ନ ବିଦ୍ୟାଳୟରେ ରହିଛନ୍ତି। ଟ୍ରାଫିକ ନିୟନ୍ତ୍ରଣ ପାଇଁ ୧୦ ଜଣ ଟ୍ରାଫିକ ପୋଲିସ ଏଠାରେ ନିଯୁକ୍ତ ହେବା ସହ ଅନ୍ୟ ପୋଲିସ କର୍ମଚାରୀ ମଧ୍ୟ ସେମାନଙ୍କୁ ସାହାଯ୍ୟ ସକାଶେ ନିଯୁକ୍ତ ରହିବା ଉପରେ ଗୁରୁତ୍ୱାରୋପ କରାଯାଇଛି। ଜିଲା ଆରକ୍ଷୀ ଅଧୀକ୍ଷକ ରାଜେଶ ପଣ୍ଡିତ ପୋଲିସ ଅଧିକାରୀ ଓ ଅନ୍ୟ କର୍ମଚାରୀମାନଙ୍କୁ ଦାୟିତ୍ୱ ବଣ୍ଟନ କରିଛନ୍ତି।
