ସିଡନୀ, ୧୫।୧୦(ଏଏଫ୍ପି)- କ୍ରିକେଟ ଅଷ୍ଟ୍ରେଲିଆ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଆସନ୍ତାବର୍ଷ ଘରୋଇ ପରିବେଶ୍ରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ଉଭୟ ପୁରୁଷ ଓ ମହିଳା ଦଳ ପାଇଁ ସମାନଭାବେ ପୁରସ୍କାର ରାଶି ଦିଆଯିବ ବୋଲି କ୍ରିକେଟ ଅଷ୍ଟ୍ରେଲିଆ ଘୋଷଣା କରିଛି। ଅର୍ଥାଟ ବିଶ୍ୱକପ୍ ଜିତିଲେ ପୁରୁଷ ଓ ମହିଳା ଦଳକୁ ସମାନ ଭାବେ ଆର୍ଥିକ ପୁରସ୍କାର ପ୍ରଦାନ କରାଯିବ। ପୂର୍ବରୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ସୋମବାର ୨୦୨୦ ମହିଳା ବଶ୍ୱକପ୍ର ପୁରୁସ୍କାର ରାଶିରେ ୩୨୦ ପ୍ରତିଶତ ବୃଦ୍ଧି କରିଛି। ଏଥର ମହିଳା ଚାମ୍ପିୟନ ଦଳ ୧ ମିଲିୟନ ବା ୧୦ ଲକ୍ଷ ଆମେରିକୀୟ ଡଲାର ପୁରସ୍କାର ହାସଲ କରିବ। ଅନ୍ୟପଟେ ରନର୍ସଅପ୍ ଦଳ ୫ ଲକ୍ଷ ଡଲାର ପୁରସ୍କାର ପାଇବ ବୋଲି ଆଇସିସି ସ୍ପଷ୍ଟ କରିଛି।
ଯଦି ଆସନ୍ତା ବର୍ଷ ମହିଳା ଦଳ ଟି୨୦ ବିଶ୍ୱକପ୍ ହାସଲ କରିବ ତାହାଲେ ଅତିରିକ୍ତ ୬ ଲକ୍ଷ ଡଲାର ପୁରସ୍କାର ରାଶି ଦେବ। ସେହିପରି ଦଳ ରନର୍ସଅପ୍ ହେଲେ ଅତିରିକ୍ତ ୫ ଲକ୍ଷ ଡଲାର ପୁରସ୍କାର ରାଶି ହାସଲ କରିବ। ଏହି ଅତିରିକ୍ତ ପୁରସ୍କାର ରାଶି ମଳିଲେ ପୁରୁଷ ଓ ମହିଳା ଦଳର ପୁରସ୍କାର ରାଶି ସାମାନ ହେବ ବୋଲି କ୍ରିକେଟ ଅଷ୍ଟ୍ରେଲିଆ କହିଛି। ମହିଳା ଓ ପୁରୁଷ କ୍ରିକେଟରଙ୍କ ମଧ୍ୟରେ ଥିବା ଅସମାନତାକୁ ଦୂର କରିବା ପାଇଁ ଆମେ ବଦ୍ଧପରିକର ବୋଲି କ୍ରିକେଟ ଅଷ୍ଟ୍ରେଲିଆ ମୁଖ୍ୟ କେଭିନ ରବଟର୍ସ କହିଛନ୍ତି। ଆମ ପ୍ରତିଭାସମ୍ପନ୍ନ କ୍ରିକେଟରଙ୍କ ଆର୍ଥିକ ଅବସ୍ଥା ସୁଧାରିବାକୁ ପ୍ରୟାସ ଜାରି ରଖିବୁ। ତେବେ ଏଥିପାଇଁ ଆମକୁ ଆହୁରି ବହୁତ କିଛି କରିବାକୁ ପଡିବ। କ୍ରୀଡ଼ାବିତ୍ଙ୍କ ମଧ୍ୟରେ ସମାନତା ଅଣିବା ଉପରେ ପ୍ରୟାସ ଜାରି ରହିବ ବୋଲି ସେ କହିଛନ୍ତି।
ଦୁଇ ବର୍ଷ ତଳେ କ୍ରିକେଟ ଅଷ୍ଟ୍ରେଲିଆ ଓ ଅଷ୍ଟ୍ରେଲିଆନ କ୍ରିକେଟର୍ସ ଆସୋସିଏଶନ ଗୋଟିଏ ବୁଝାମଣା କରିଥିଲେ। ମହିଳା ଓ ପୁରୁଷ କ୍ରିକେଟରଙ୍କ ପାଇଁ ସମାନ ଆଭିମୁଖ୍ୟ ପୋଷଣ କରାଯିବ ବୋଲି ଦୁଇ ସଂସ୍ଥା ସହିମତିରେ ପହଞ୍ଚିଥିଲେ। ଟପ୍ ର଼୍ୟାଙ୍କର ଅଷ୍ଟ୍ରେଲିଆ ମହିଳା ଦଳ ଏଥର ଟି୨୦ ବିଶ୍ୱକପ୍ରେ ହଟ୍ ଫେଭରାଇଟ୍ ବିବେଚିତ ହେଉଛି। ଘରୋଇ ପରିବେଶରେ ଅଷ୍ଟ୍ରେଲିଆ ମହିଳା ଦଳ ବେଶ୍ ପ୍ରଭାବୀ ସାବ୍ୟସ୍ତ ହେବ ବୋଲି ଆଶା କରାଯାଉଛି। ମହିଳା କ୍ରିକେଟରେ ଅଧିକ ଅର୍ଥ ଉପାର୍ଜନ ହେଉଛି। ତେଣୁ ୨୦୨୧ ବିଶ୍ୱକପ୍ର ପୁରସ୍କାର ରାଶିକୁ ୨ ମିଲିୟନ ଆମେରିକୀୟ ଡଲାରରୁ ୩.୫ ମିଲିୟନକୁ ବୃଦ୍ଧି କରାଯାଇଛି ବୋଲି ଆଇସିସି ତରଫରୁ କୁହାଯାଇଛି।
