ଝରିଗାଁ,୨୪।୫(ସ୍ବ.ପ୍ର): ନବରଙ୍ଗପୁର ଜିଲା ଝରିଗାଁ ଥାନା ଅନ୍ତର୍ଗତ ବଡନି ଗ୍ରାମରେ ୩ ହଜାର ଟଙ୍କାକୁ ନେଇ ଅଭାବନୀୟ ଘଟଣା ଦେଖିବାକୁ ମିଳିଛି।
ସୂଚନାନୁଯାୟୀ, ଝରିଗାଁ ବ୍ଲକ ପାଲି ପଞ୍ଚାୟତ ବଡନି ଗ୍ରାମର ଜଣେ ବିହାରୀ ବ୍ୟବସାୟୀ ଶିବପ୍ରସାଦ ଗୁପ୍ତା ଗ୍ରାମର ବୁଟୁ ଗୌଡଙ୍କୁ ପ୍ରାୟ ଚାରିମାସ ପୂର୍ବରୁ ୩ ହଜାର ଟଙ୍କା ଦେଇଥିଲେ। ମାତ୍ର ବୁଟୁ ଟଙ୍କା ଫେରାଇ ନ ଥିଲେ। ଏହାପରେ ଶିବପ୍ରସାଦ ଗତ ରବିବାର ସଂନ୍ଧ୍ୟା ପ୍ରାୟ ସାଢେ ଛଅଟା ସମୟରେ ବୁଟୁଙ୍କ ଘରକୁ ଯାଇ ଟଙ୍କା ମାଗିଥିଲେ। ସେହି ସମୟରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏହାପରେ ବୁଟୁଙ୍କ ପୁଅ ଡମ୍ବରୁ ଗୌଡ ଘଟଣାସ୍ଥଳରେ ପହଞ୍ଚି ଶିବ ପ୍ରସାଦଙ୍କୁ ମାଡ ମାରିଥିଲେ। ଏ ନେଇ ସୋମବାର ପ୍ରଥମେ ବୁଟୁ ଗୌଡ ଥାନାରେ ଏତଲା ଦେଇଥିଲେ। ସେହି ଅପରାହ୍ନରେ ଶିବପ୍ରସାଦ ଥାନାରେ ଆଉ ଏକ ଅଭିଯୋଗ ଦେଇଥିଲେ। ଏହାପରେ ଥାନା ଅଧିକାରୀ ଉଭୟଙ୍କୁ ମଙ୍ଗଳବାର ଥାନାକୁ ଡକାଇଥିଲେ ମଧ୍ୟ କେହି ଆସି ନ ଥିଲେ। ବୁଧବାର ସକାଳ ପ୍ରାୟ ୮ଟା ସମୟରେ ଶିବ ପ୍ରସାଦଙ୍କ ଦୁଇ ପୁଅ ରିତେଶ ଏବଂ ଅନିଲ ବୁଟୁ ଗୌଡଙ୍କ ଘରକୁ ଯାଇ ପୁଣି ପାଟିତୁଣ୍ଡ କରି ଗଣ୍ଡଗୋଳ କରିଥିଲେ। ଏଥିରେ ଆହତ ହୋଇ ଟୁଟୁ ଝରିଗାଁ ମେଡିକାଲରେ ଚିକିତ୍ସିତ ଅଛନ୍ତିି। ଖବରପାଇ ପୋଲିସ ପହଞ୍ଚି ଶିବପ୍ରସାଦଙ୍କ ସମେତ ତାଙ୍କ ଦୁଇ ପୁଅକୁ ଥାନାକୁ ନେଇଥିଲେ। ଗୁରୁବାର ଘରେ କୌଣସି କାମ ରହିଥିବା ନେଇ ପୋଲିସ ଜିମାରେ ଅନିଲ ଘରକୁ ଆସିଥିଲେ। ଶୁକ୍ରବାର ବୁଟୁଙ୍କ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ଗୁଜବ ପ୍ରକାଶ ପରେ ଉତ୍ତ୍ୟକ୍ତ ଗ୍ରାମବାସୀ ପ୍ରଥମେ ରାମସା ଛକରେ ରାସ୍ତାରୋକୋ କରିଥିଲେ। ଏହାପରେ ଶିବ ପ୍ରାସାଦଙ୍କ ଘରକୁ ଯାଇ ଟେକା ପଥର ମାରିବା ସହ ଘରେ ରହିଥିବା ଦୋକାନ ସାମଗ୍ରୀ ତଥା ବିକ୍ରି କରିବା ପାଇଁ ରହିଥିବା ଡିଜେଲ ଏବଂ ପେଟ୍ରୋଲ ଢାଳି ଦେଇଥିଲେ। ପୋଲିସ ପହଞ୍ଚି ଗ୍ରାମବାସୀଙ୍କୁୁ ବୁଝାଶୁଝା କରିବା ସହ ଅନିଲଙ୍କୁ ଥାନାକୁ ଆଣିବା ସମୟରେ ଗ୍ରାମବାସୀ ଟେକାପଥର ମାରିଥିଲେ।
ରାସ୍ତା ଅବରୋଧ କରିବା ସହ ଘର ଭାଙ୍ଗିଥିବା ଏବଂ ପୋଲିସ ସମ୍ମୁଖରେ ଯୁବକଙ୍କୁ ମାଡ ମାରିଥିବା ଲୋକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ଥାନା ଅଧିକାରୀ ପ୍ରମୋଦ କୁମାର ନାୟକ ପ୍ରକାଶ କରିଛନ୍ତି।
