ଅଡିସ୍ ଅବାବା,୨୪ା୬ (ପି.ଟି./ଏ.ଏଫ୍.ପି): ଆଫ୍ରିକୀୟ ରାଷ୍ଟ୍ର ଇଥିଓପିଆରେ ସାମରିକ ବିଦ୍ରୋହ ଦେଖାଦେଇଛି। ଉତ୍ତର ପ୍ରାନ୍ତର ଅମ୍ହାରା ରାଜ୍ୟରେ ଚାଲିଥିବା କ୍ଷମତା ଦଖଲ ଉଦ୍ୟମକୁ ପଣ୍ଡ କରିବା ପାଇଁ ସେନା ମୁଖ୍ୟ ସିୟରେ ମେକୋନେନ୍ ପ୍ରୟାସ ଚଳାଇଥିବାବେଳେ ତାଙ୍କ ଅଙ୍ଗରକ୍ଷୀ ତାଙ୍କୁ ଗୁଳିକରି ହତ୍ୟା କରିଛନ୍ତି। ଆକ୍ରମଣରେ ଆଉ ଜଣେ ଜେନେରାଲ ମଧ୍ୟ ନିହତ ହୋଇଛନ୍ତି।
ହେଉଛି ଆଫ୍ରିକାର ସବୁଠୁ ପୁରୁଣା ସ୍ବାଧୀନ ରାଷ୍ଟ୍ର। ଏହି ଦେଶରେ ୮୦ରୁ ଊର୍ଦ୍ଧ୍ୱ ବିଭିନ୍ନ ଜାତିର ୧୦୨.୫ ନିୟୁତ ଲୋକ ବସବାସ କରନ୍ତି। ଇଥିଓପିଆରେ ଚଳିତବର୍ଷ ଶେଷ ଆଡ଼କୁ ସାଧାରଣ ନିର୍ବାଚନ ଥିବାବେଳେ ୨୦୧୮ ଏପ୍ରିଲରେ କ୍ଷମତାସୀନ ପ୍ରଧାନମନ୍ତ୍ରୀ ଏବି ଅହମ୍ମଦଙ୍କ ସଂସ୍କାରବାଦୀ କାର୍ଯ୍ୟକ୍ରମକୁ ନେଇ ଦେଶରେ ରାଜନୈତିକ ଅସ୍ଥିରତା ସୃଷ୍ଟି ହୋଇଛି। ଅମ୍ହାରା ସମେତ ଦେଶର ବିଭିନ୍ନ ଭାଗରେ ଜାତିଆଣ ହିଂସା ଲାଗିରହିଛି। ଏଥିଯୋଗୁ ୩୦ ଲକ୍ଷ ଲୋକ ବିସ୍ଥାପିତ ହୋଇ ଅନ୍ୟ ଦେଶକୁ ପଳାୟନ କରିବାରେ ଲାଗିଛନ୍ତି। ଏହି ସମସ୍ୟାକୁ ଦୂର କରିବା ଲାଗି ପ୍ରଧାନମନ୍ତ୍ରୀ ରାଜନୈତିକ ବନ୍ଦୀମାନଙ୍କୁ ମୁକ୍ତ କରିବାସହ ଦଳଗୁଡ଼ିକ ଉପରୁ କଟକଣା ହଟାଇବାରେ ଲାଗିଛନ୍ତି। ଏହାସହ ସେ ମାନବାଧିକାର ଉଲ୍ଲଂଘନକାରୀ ଅଧିକାରୀମାନଙ୍କୁ କାଠଗଡ଼ାକୁ ଟାଣିବା ଲାଗି ସେମାନଙ୍କ ବିରୋଧରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି। ଏଭଳି ସମୟରେ ଅମରାହାରେ କ୍ଷମତା ପରିବର୍ତ୍ତନ ପାଇଁ ଚାଲିଥିବା ଉଦ୍ୟମକୁ ବିଫଳ କରିବା ଲାଗି ସେନା ମୁଖ୍ୟ ସିୟରେ ମେକୋନେନ୍ ଶନିବାର ରାତିରେ ଅଡିସ୍ ଅବାବାସ୍ଥିତ ନିଜ ବାସଭବନରେ ଆଉ ଜଣେ ଜେନେରାଲ ଗେଜାଇ ଅବେରାଙ୍କ ସହ ମିଶି ବୈଠକ କରିଥିଲେ। ଏହାକୁ ନେଇ ସେନା ମୁଖ୍ୟ ମେକୋନେନ୍ଙ୍କ ଅଙ୍ଗରକ୍ଷୀ ଉଭୟଙ୍କୁ ଗୁଳିକରି ହତ୍ୟା କରିଥିଲେ। ଅଙ୍ଗରକ୍ଷୀଙ୍କୁ ଗିରଫ କରି ହାଜତକୁ ନିଆଯାଇଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସୂତ୍ରରୁ ପ୍ରକାଶ।
ଏହାର କିଛି ସମୟ ପୂର୍ବରୁ ଅମ୍ହାରା ଗଭର୍ନର ଆମବାଚିଉ ମେକୋନେନ୍ ଓ ତାଙ୍କର ଜଣେ ଉପଦେଷ୍ଟାଙ୍କୁ ମଧ୍ୟ ରାଜଧାନୀ ବାହିର ଦରରେ ହତ୍ୟା କରାଯାଇଥିଲା। ଏହି ଦୁଇ ହତ୍ୟାକାଣ୍ଡର ସମ୍ପର୍କ ଥିବା କୁହାଯାଉଛି। ସାମରିକ ବିଦ୍ରୋହ ଜରିଆରେ କ୍ଷମତା ହାସଲ ପାଇଁ ଲାଗିଥିବା ଅନେକ ଲୋକଙ୍କୁ ଗିରଫ କରାଯିବା ପରେ ସ୍ଥିତି ନିୟନ୍ତ୍ରଣାଧୀନ ଥିବା ସରକାରଙ୍କ ପକ୍ଷରୁ କୁହାଯାଇଛି। ପ୍ରଧାନମନ୍ତ୍ରୀ ଏବି ଅହମ୍ମଦ ଏକ ଟିଭି ଚ୍ୟାନେଲରେ ଦେଶବାସୀଙ୍କୁ ସମ୍ବୋଧିତ କରି ଶାନ୍ତି ପାଇଁ ଅନୁରୋଧ କରିଛନ୍ତି। ଦେଶର ବିଭାଜନକାରୀ ତତ୍ତ୍ୱଗୁଡ଼ିକୁ ସାମ୍ନା କରିବା ଲାଗି ସେ ଏଥିରେ ଆହ୍ବାନ ଦେଇଛନ୍ତି। ଦେଶବ୍ୟାପୀ ଇଣ୍ଟରନେଟ ସେବାକୁ ବନ୍ଦ କରାଯାଇଛି। ସେଠାରେ ଥିବା ଆମେରିକା ଦୂତାବାସ ପକ୍ଷରୁ ଆଲର୍ଟ ଜାରି କରାଯାଇଛି। ଅନ୍ୟପକ୍ଷରେ କ୍ଷମତା ଦଖଲ ଉଦ୍ୟମର ଖଳନାୟକ କୁହାଯାଉଥିବା ଅମ୍ହାରାର ଆଞ୍ଚଳିକ ନିରାପତ୍ତା ମୁଖ୍ୟ ବ୍ରିଗେଡିୟର ଜେନେରାଲ ଅସାମିନ୍ୟୁ ସିଜେଙ୍କ ପତ୍ତା ମିଳୁନି। ଅସାମନ୍ୟୁ ଜଣେ ଉଚ୍ଚପାହ୍ୟାର ସେନା ଅଧିକାରୀ। ୯ ବର୍ଷ ତଳେ ସେ ଏଭଳି ଉଦ୍ୟମ କରି ଜେଲ ଯାଇଥିଲେ। ତାଙ୍କୁ ଗତବର୍ଷ ମୁକ୍ତ କରାଯାଇଥିଲା।
