ଟିଟିଲାଗଡ଼, ୩୧।୮(ଡି.ଏନ.ଏ.): ରାଜ୍ୟ ମହିଳା ଓ ଶିଶୁ ବିକାଶ ତଥା ମିଶନ ଶକ୍ତି ମନ୍ତ୍ରୀ ଟୁକୁନୀ ସାହୁ ଅଙ୍ଗଦାନ ମହାଦାନ ସଚେତନତା କାର୍ଯ୍ୟକ୍ରମକୁ ଶନିବାର ପତକା ଦେଖାଇ ଶୁଭାରମ୍ଭ କରିଛନ୍ତି। ବଲାଙ୍ଗୀର ଜିଲା ଟିଟିଲାଗଡ ମାରୱାଡି ମହିଳା ସମିତି ଆନୁକୂଲ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମିତି ସଦସ୍ୟା ଏବଂ ସ୍ଥାନୀୟ ମହିଳା ମହାବିଦ୍ୟାଳୟର ଛାତ୍ରୀମାନେ ସାମିଲ ହୋଇଥିଲେ। ସ୍ଥାନୀୟ ମହାବୀର ପଞ୍ଚାୟତି ଧର୍ମଶାଳାରୁ ଏକ ସଚେତନତା ଶୋଭାଯାତ୍ରା ନଗର ପରିକ୍ରମା କରିଥିଲା। କାର୍ଯ୍ୟକ୍ରମରେ ମନ୍ତ୍ରୀ ସାହୁଙ୍କ ସହ ସମିତିର ଅଙ୍ଗଦାନ ପ୍ରମୁଖ ଅନିତା ଗୋଏଙ୍କା, ଅଧ୍ୟକ୍ଷା ଆଶା ଅଗ୍ରୱାଲ, ସଚିବ ସରୋଜ ଅଗ୍ରୱାଲ, ଯୁଗ୍ମସଚିବ ଲତା ଅଗ୍ରୱାଲ, ଉପାଧ୍ୟକ୍ଷା ଉମା ଜୈନ, ରୀତା ମିତଲ, ବବିତା ଅଗ୍ରୱାଲ, ସନ୍ତୋଷ ସୋନି, ଗୀତା ବୈଠାରୁ, ମନିଷା ଖୈତାନ ପ୍ରମୁଖ ଶତାଧିକ କର୍ମକର୍ତ୍ତା ସାମିଲ ହୋଇଥିଲେ। ମରଣ ପରେ ମନୁଷ୍ୟର ଶରୀର ପୋଡି ଭସ୍ମ ହୋଇଯାଉଥିବା ବେଳେ ଚକ୍ଷୁ, କିଡନୀ ଆଦି ଅନେକ ପ୍ରତ୍ୟଙ୍ଗ ଆବଶ୍ୟକ ଲୋକଙ୍କଠାରେ ପ୍ରତ୍ୟାରୋପଣ ହୋଇପାରିବ ବୋଲି ଏହି ଅବସରରେ କୁହାଯାଇଛି।
