ରୂପ୍ସା, ୨୦।୨(ଡି.ଏନ.ଏ.)-ବାଲେଶ୍ୱର ସଦର ବ୍ଲକ ଶ୍ରୀରାମପୁର ପଞ୍ଚାୟତ ଅନ୍ତର୍ଗତ ନିମା, ଖିରଂ ଓ ଗୁଣ୍ଡୁରିପଦା ଅଙ୍ଗନୱାଡ଼ି କେନ୍ଦ୍ରରେ ମଙ୍ଗଳବାର ତଦନ୍ତ ଆରମ୍ଭ ହୋଇଛି। ଏହି ଅଙ୍ଗନୱାଡି କେନ୍ଦ୍ରଗୁଡ଼ିକରେ ଅନିୟମିତତା ହେବା ସହ ଶିଶୁଙ୍କୁ ପାଠପଢ଼ା ଯାଉ ନ ଥିବା ନେଇ ସ୍ବଚ୍ଛ ସବୁଜ ଯୁବସଙ୍ଗଠନ ଓ ସ୍ଥାନୀୟ ଗ୍ରାମବାସୀଙ୍କ ତରଫରୁ ଅଭିଯୋଗ ହୋଇଥିଲା। ବ୍ଲକ ଚେୟାରମ୍ୟାନ ନାରାୟଣ ପ୍ରଧାନ, ଏବିଡ଼ିଓ ରବିନାରାୟଣ ବେହେରା ଉକ୍ତ ୩ଟି ଅଙ୍ଗନୱାଡ଼ି କେନ୍ଦ୍ରରେ ପହଞ୍ଚତ୍ ଘଟଣାର ଅନୁଧ୍ୟାନ କରିଥିଲେ। ଅଭିଯୋଗକାରୀ ଗ୍ରାମବାସୀ ଓ ସଙ୍ଗଠନର କର୍ମକର୍ତ୍ତାଙ୍କ ସମେତ ଅଙ୍ଗନୱାଡ଼ି କର୍ମୀଙ୍କୁ ଅଭିଯୋଗ ସମ୍ପର୍କରେ ପଚାରି ବୁଝିଥିଲେ। ୩ବର୍ଷ ଧରି ଗୁଣ୍ଡୁରିପଦା ଅଙ୍ଗନୱାଡ଼ି କେନ୍ଦ୍ର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେଉ ନ ଥିବାରୁ ବିପଦସଙ୍କୁଳ ଭଙ୍ଗା ଘରେ ଶିଶୁମାନଙ୍କୁ ପାଠପଢ଼ା ଯାଉଥିବା ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରିଥିଲେ। ସେହିପରି ନିମା, କ୍ଷୀରଂ କେନ୍ଦ୍ରରେ ପାଠପଢ଼ା ଓ ଅଙ୍ଗନୱାଡ଼ି ଖାଦ୍ୟ ପ୍ରଦାନରେ ଅନିୟମିତତା ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଥିଲେ। ସଙ୍ଗଠନ ସଭାପତି ରାଜେଶ ସେଠୀ, ସଞ୍ଜୟ ଦାସ, ଗୌରାଙ୍ଗ ପ୍ରଧାନ, ତପନ ବେହେରା ଓ ପଦ୍ମଲୋଚନ ଗୋଚ୍ଛାୟତଙ୍କ ସମେତ ବହୁ ଅଭିଭାବକ, ଗ୍ରାମବାସୀ ଉପସ୍ଥିତ ଥିଲେ। ତଦନ୍ତ ଅନୁଯାୟୀ ଅନିୟମିତତା ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସାଧାରଣରେ ଦାବି ହୋଇଛି।
