ବ୍ରହ୍ମପୁର ଅଫିସ,୨୧ା୩: ଗଞ୍ଜାମ ଜିଲା ସଦର ଥାନା ପୋଲିସ ଏକ ଲୁଟ୍ ଘଟଣାର ମାଷ୍ଟରମାଇଣ୍ଡ୍ଙ୍କ ସମେତ ୨ ଜଣ ପେସାଦାର ଲୁଟେରାଙ୍କୁ ଗିରଫ କରିଛି। ସେମାନେ ହେଲେ ଗୋଶାଣିନୂଆଗାଁ ଥାନା ଅନ୍ତର୍ଗତ ଆମ୍ବ ମାର୍କେଟରେ ରହୁଥିବା ବୈଦ୍ୟନାଥ ପାଣିଗ୍ରାହୀ (୨୬) ଓ ଛତ୍ରପୁର ପୋଲିସ କଲୋନୀର ଶିବରାମ ପଟ୍ଟନାୟକ (୩୨) ବୋଲି ସଦର ଏସ୍ଡିପିଓ ଜୟନ୍ତ ମହାପାତ୍ର ସୂଚନା ଦେଇଛନ୍ତି। ଉଭୟ ଅଭିଯୁକ୍ତଙ୍କୁ ଶନିବାର କୋର୍ଟଚାଲାଣ କରାଯାଇଛି। ଜାମିନ ନାମଞ୍ଜୁର ପରେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ପୋଲିସ କହିଛି। ଅଭିଯୁକ୍ତମାନେ ପେସାଦାର ଲୁଟେରା ହୋଇଥିବା ବେଳେ ସେମାନଙ୍କ ନାମରେ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ସେ କହିଛନ୍ତି।
ଶୁକ୍ରବାର ଅପରାହ୍ନରେ ଜଣେ ମହିଳାଙ୍କୁ ବୈଦ୍ୟନାଥ, ଶିବରାମ ମାରଣାସ୍ତ୍ର ଦେଖାଇ ତାଙ୍କଠାରୁ ସୁନା ଗହଣା ଓ ଟଙ୍କା ଲୁଟି ନେଇଥଲେ। ସଦର ଥାନା ପୋଲିସ ବୈଦ୍ୟନାଥଙ୍କଠାରୁ ଏକ ଭ୍ୟାନିଟ୍ ବ୍ୟାଗ ଯେଉଁଥିରେ ଗୋଟିଏ ସୁନା ଚେନ୍, ଗୋଟିଏ ମଙ୍ଗଳସୂତ୍ର , ୨ ହଳ କାନଫୁଲ ସହ ୪ ହଜାର ଟଙ୍କା ରହିଥିଲା, ତାକୁ ଜବତ କରିଛି । ଏହା ସହିତ ସେମାନେ ଗୋଶାଣିନୂଆଗାଁ ଥାନା ଅଞ୍ଚଳରୁ ଜଣେ ଲୋକଙ୍କଠାରୁ ମୋବାଇଲ ଝାମ୍ପି ନେଇଥିବା ବେଳେ ସେଗୁଡ଼ିକ ମଧ୍ୟ ଅଭିଯୁକ୍ତମାନଙ୍କଠାରୁ ଜବତ ହୋଇଥିବା ଏସ୍ଡିପିଓ ମହାପାତ୍ର କହିଛନ୍ତି । ଘଟଣା ବେଳେ ବ୍ୟବହୃତ ଏକ ସ୍କୁଟି, ଗୋଟିଏ ଛୋଟ କାତି ଓ ଛୁରି ମଧ୍ୟ ପୋଲିସ ଜବତ କରିଛି।
ପ୍ରକାଶ ଯେ, ସଦର ଥାନା ନିକଟ ଆଙ୍କୁଶପୁର ଗ୍ରାମର ମୂଳନିବାସୀ ଜନୈକା ମହିଳା ପ୍ରଣତି ସାହୁ ଗୋବିନ୍ଦ ବିହାରରେ ରହୁଥିଲେ। ଶୁକ୍ରବାର ଅପରାହ୍ନରେ ସେ ଆଙ୍କୁଶପୁରରେ ଥିବା ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଶାଖା ଲକରରେ ସୁନା ଗହଣାଗୁଡିକ ରଖିବା ପାଇଁ ପୁଅ ସହିତ ବ୍ୟାଙ୍କକୁ ଯାଉଥିଲେ। ଅପରାହ୍ନ ପ୍ରାୟ ୩ଟା ବେଳେ ଲୁଟେରାମାନେ ତାଙ୍କ ପିଛା କରିଥିବା ବେଳେ ଜଗଦଳପୁର ନିକଟରେ ଥିବା ଏକ ନିଛାଟିଆ ସ୍ଥାନରେ ମହିଳାଙ୍କୁ ମାରଣାସ୍ତ୍ର ଦେଖାଇ ଭୟଭୀତ କରିବା ସହ ସେ ଧରିଥିବା ଏକ ଭେନିଟ ବ୍ୟାଗ ନେଇଯାଇଥିଲେ । ଅଭିଯୋଗ ପରେ ପୋଲିସ ୯୩/୨୦ ମାମଲା ରୁଜୁ କରି ଅଭିଯୁକ୍ତଙ୍କୁ ଶୁକ୍ରବାର ରାତିରେ ଗିରଫ କରିଥିଲା।
