କଟକ ଅଫିସ,୧।୩: ମାମଲା ବୋଝ କମାଇବା ପାଇଁ ଶନିବାର ଛୁଟିଦିନ ହୋଇଥିଲେ ମଧ୍ୟ ହାଇକୋର୍ଟର ସ୍ବତନ୍ତ୍ର ବେଞ୍ଚ ବସିଥିଲା। ଜେଲ୍ କ୍ରିମିନାଲ ଅପିଲ୍ର ଶୁଣାଣି ପାଇଁ ଗଠିତ ସ୍ବତନ୍ତ୍ର ବେଞ୍ଚରେ ଶନିବାର ୯ ମାମଲାର ସମାଧାନ ହୋଇଛି। ୩ଟି ମାମଲାକୁ ଆଂଶିକ ଗ୍ରହଣ କରାଯାଇଥିବା ବେଳେ ୨ଟି ଆବେଦନକୁ ଅଦାଲତ ଗ୍ରହଣ କରିଥିବା ଜଣାପଡ଼ିଛି। ଜଷ୍ଟିସ୍ ସଙ୍ଗମ କୁମାର ସାହୁ ଏବଂ ଜଷ୍ଟିସ୍ ବିଭୁ ପ୍ରସାଦ ରାଉତରାୟଙ୍କୁ ନେଇ ଗଠିତ ଖଣ୍ଡପୀଠରେ ୩ଟି ମାମଲାର ଶୁଣାଣି ହୋଇ ସମାଧାନ ହୋଇଥିଲା। ଜଷ୍ଟିସ୍ ସଙ୍ଗମ କୁମାର ସାହୁଙ୍କୁ ନେଇ ଗଠିତ ଜଣିକିଆ ଖଣ୍ଡପୀଠରେ ଗୋଟିଏ ମାମଲାର ସମାଧାନ ହୋଇଥିଲା। ସେହିପରି ଜଷ୍ଟିସ୍ ପ୍ରମଥ ପଟ୍ଟନାୟକ ଏବଂ ଜଷ୍ଟିସ୍ ଏ.କେ. ମିଶ୍ରଙ୍କୁ ନେଇ ଗଠିତ ଖଣ୍ଡପୀଠରେ ୫ ମାମଲାର ଶୁଣାଣି ସାଙ୍ଗକୁ ସମାଧାନ କରାଯାଇଥିଲା। ନିମ୍ନ ଅଦାଲତଙ୍କ ନିର୍ଦ୍ଦେଶରେ ଅନେକ ବିଚାରାଧୀନ କଏଦୀ ରାଜ୍ୟର ବିଭିନ୍ନ ଜେଲ୍ରେ ବନ୍ଦୀ ଅଛନ୍ତି। ସେମାନେ ନିମ୍ନ ଅଦାଲତ ରାୟକୁ ଚ୍ୟାଲେଞ୍ଜ କରି ହାଇକୋର୍ଟରେ ଆବେଦନ କରିଥାନ୍ତି। କିନ୍ତୁ ଅନେକ ସମୟରେ ଏହି ଆବେଦନର ଶୁଣାଣିରେ ବହୁ ବିଳମ୍ବ ଦେଖାଦେଉଛି। ଦିନକୁ ଦିନ ମାମଲା ବୋଝ ମଧ୍ୟ ବଢ଼ିଚଲୁଛି। ତେଣୁ ଛୁଟିଦିନରେ ସ୍ବତନ୍ତ୍ର ବେଞ୍ଚରେ ଏଭଳି ମାମଲାଗୁଡ଼ିକର ଶୁଣାଣି କରାଯାଇଥିଲା। ନିମ୍ନ ଅଦାଲତର ରାୟଗୁଡ଼ିକୁ ତର୍ଜମା କରାଯାଇ ରାୟ ପ୍ରକାଶ ପାଇଥିଲା। ଫଳରେ ନିମ୍ନ ଅଦାଲତରୁ ଦଣ୍ଡିତ ହୋଇ ଜେଲ୍ଦଣ୍ଡ ଭୋଗୁଥିବା କେତେଜଣ ଉପକୃତ ହୋଇଛନ୍ତି। ପ୍ରାୟ ତିନିବର୍ଷ ପରେ ଏଭଳି ଛୁଟିଦିନରେ ସ୍ବତନ୍ତ୍ର ବେଞ୍ଚ ବସିଥିବା କୁହାଯାଉଛି।
