ଜାକର୍ତ୍ତା,୧୭।୭- ଦେଶର ଷ୍ଟାର ଶଟଲର ପି. ଭି. ସିନ୍ଧୁ ଓ କିଡାମ୍ବି ଶ୍ରୀକାନ୍ତ ଏଠାରେ ଚାଲିଥିବା ଇଣ୍ଡୋନେସିଆ ଓପନ ବିଡବ୍ଲ୍ୟୁଏଫ୍ ଓ୍ବାଲର୍ଡ ଟୁର ସୁପର ୧୦୦୦ ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ବିଜୟ ସହ ଅଭିଯାନ ଆରମ୍ଭ କରିଛନ୍ତି। ଏକ ମାସ ଧରି କୋର୍ଟରୁ ଦୂରେଇ ରହିବା ପରେ ସିନ୍ଧୁ ଓ ଶ୍ରୀକାନ୍ତ ଯଥାକ୍ରମେ ଜାପାନିଜ ବ୍ୟାଡ୍ମିଣ୍ଟନ ଖେଳାଳି ଆୟର ଓହରି ଓ କେଣ୍ଟା ନିଶିମୋଟୋଙ୍କୁ ନିଜ ନିଜ ପ୍ରଥମ ରାଉଣ୍ଡ ମ୍ୟାଚ୍ରେ ହରାଇଛନ୍ତି। ଚଳିତ ସିଜନରେ ପ୍ରଥମ ଟାଇଟଲ ଅପେକ୍ଷାରେ ଥିବା ୫ମ ସିଡ୍ ସିନ୍ଧୁ ମହିଳା ସିଙ୍ଗଲ୍ସ ବର୍ଗରେ ୧୧-୨୧, ୨୧-୧୫, ୨୧-୧୫ ଗେମ୍ରେ ମ୍ୟାଚ୍ ଜିତି ନେଇଥିଲେ। ସେହିଭଳି ଇଣ୍ଡିଆ ଓପନ ଫାଇନାଲିଷ୍ଟ ୮ମ ସିଡ୍ ଶ୍ରୀକାନ୍ତ ୨୧-୧୪, ୨୧-୧୩ ଗେମ୍ରେ ନିଶିମୋଟାଙ୍କୁ ପରାସ୍ତ କରିଥିଲେ। ପରବର୍ତ୍ତୀ ରାଉଣ୍ଡରେ ଏହି ଦୁଇ ଭାରତୀୟ କାହାକୁ ଭେଟିବେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଅନ୍ୟପକ୍ଷରେ ବି. ସାଇ ପ୍ରଣୀଥ ପରାଜୟ ସହ ପ୍ରଥମ ରାଉଣ୍ଡରୁ ବିଦାୟ ନେଇଛନ୍ତି। ପ୍ରଣୀଥ ୧୫-୨୧, ୨୧-୧୩, ୧୦-୨୧ ଗେମ୍ରେ ହଂକଂର ଓ୍ବଙ୍ଗ ଓ୍ବିଙ୍ଗ କି ଭିନସେଣ୍ଟଙ୍କଠାରୁ ହାରିଯାଇଥିଲେ।
