ନୂଆଦିଲ୍ଲୀ, ୨୯।୪: କ୍ୟାରିବିୟାନ ପ୍ରିମିୟର ଲିଗ୍(ସିପିଏଲ)ର ଜାମାଇକା ତଲୱାସ ଫ୍ରାଞ୍ଚାଇଜ୍ କ୍ରିସ୍ ଗେଲ୍ଙ୍କୁ ଅପରିବର୍ତ୍ତିତ ରଖି ନାହିଁ। ଏହା ପଛରେ ପୂର୍ବତନ ୱେଷ୍ଟଇଣ୍ଡିଜ ଅଧିନାୟକ ରାମନରେଶ ସରୱନଙ୍କ ପ୍ରଚ୍ଛନ୍ନ ହାତରହିଛି ବୋଲି ଅନୁଭବ କରୁଛନ୍ତି ଗେଲ୍। ଏଥିପାଇଁ ସେ ସରୱନଙ୍କୁ ଏକ ‘ସାପ’ ଏବଂ ବର୍ତ୍ତମାନ ବିଶ୍ୱରେ ଆତଙ୍କ ସୃଷ୍ଟି କରିଥିବା ‘କରୋନା ଭାଇରସଠାରୁ ମାରାତ୍ମକ’ ବୋଲି ଗେଲ୍ ନିଜ ଅଫିସିଆଲ୍ ୟୁଟ୍ୟୁବ୍ ଚ୍ୟାନେଲରେ ଏକ ଭିଡିଓ ମାଧ୍ୟମରେ ପ୍ରକାଶ କରିଛନ୍ତି। ଗେଲ୍ ସିପିଏଲର ପ୍ରଥମ ୪ ସଂସ୍କରଣ ୨୦୧୩ରୁ ୨୦୧୬ ପର୍ଯ୍ୟନ୍ତ ଜାମାଇକା ତଲୱାସ ପକ୍ଷରୁ ଖେଳିଥିଲେ। ପରବର୍ତ୍ତୀ୨ ସିଜନ ସେଣ୍ଟ କିଟ୍ସ ଓ ନେଭିସ ପ୍ୟାଟ୍ରିଅଟ୍ସ ପକ୍ଷରୁ ଖେଳିବାପରେ ଗତ ସିଜନରେ ପୁଣି ତଲୱାସରେ ଯୋଗ ଦେଇଥିଲେ। ସେ ଏହି ଫ୍ରାଞ୍ଚାଇଜ୍ ପକ୍ଷରୁ ନିଜର ଦ୍ୱିତୀୟ ମ୍ୟାଚରେ ଶତକ ହାସଲ କରିଥିଲେ ମଧ୍ୟ। ମାତ୍ର ଓଭରଅଲ୍ ପ୍ରଦର୍ଶନ ଦୃଷ୍ଟିରୁ ତଲୱାସ ପଏଣ୍ଟ ଟେବୁଲର ନିମ୍ନରେ ରହିଥିଲା। ତଲୱାସ ଫ୍ରାଞ୍ଚାଇଜ୍ ଅପରିବର୍ତ୍ତିତ ନ ରଖିବାରୁ ଗେଲ୍ ୨୦୨୦ ସିପିଏଲ ସିଜନରେ ସେଣ୍ଟ ଲୁସିଆ ଜୁକ୍ସ ପକ୍ଷରୁ ପ୍ରତିନିଧିତ୍ୱ କରିବାକୁ ଯାଉଛନ୍ତି। ଏହି ଦଳର ଅଧିନାୟକ ଅଛନ୍ତି ଡାରେନ ସାମି ଏବଂ କୋଚ୍ ଆଣ୍ଡି ଫ୍ଲାୱାର।
ସରୱନଙ୍କ ଉଦ୍ଦେଶ୍ୟରେ ଭିଡିଓ ବାର୍ତ୍ତାରେ ଗେଲ୍ କହିଛନ୍ତି ଯେ, ”ତଲୱାସ ନିଷ୍ପତ୍ତିରେ କ’ଣ ସ୍ବଚ୍ଛତା ରହିଛି। ଏଥିରେ ତୁମେ ଗୁରୁତ୍ୱପୂର୍ଣ୍ଣ ଭୂମିକା ନେଇଛ। ଆମେ ଦୀର୍ଘଦିନଧରି କିପରି ଖେଳି ଆସିଛନ୍ତି ସେ ସମ୍ପର୍କରେ ତୁମେ ମୋ ଜନ୍ମଦିନ ପାର୍ଟିରେ ବଡ଼ ଭାଷଣ ଦେଇଥିଲ। ମାତ୍ର ପର ମୁହୂର୍ତ୍ତରେ ବଦଳିଗଲ। ତୁମେ ଏକ ସାପ। ତୁମେ ଜାଣିଛ ଯେ କ୍ୟାରିବିୟାନ କ୍ରିକେଟରେ ତୁମେ ଲୋକପ୍ରିିୟ ନୁହଁ। ତୁମେ ଜଣେ ପ୍ରତିଶୋଧ ପରାୟଣ ବ୍ୟକ୍ତି ଏବଂ ଏବେ ମଧ୍ୟ ଅପରିପକ୍ବ। ମୋତେ ଦଳରୁ ବାହାର କରିବାକୁ ଯୋଜନା କରିବା ସହ ପଛରୁ ଛୁରିକାଘାତ କରିଛ। ଏଥିପାଇଁ ହିଁ ଲୋକମାନେ ତୁମକୁ ଅଣଦେଖା କରନ୍ତି“ । ଗେଲ୍ ଆହୁରି କହିଛନ୍ତି ଯେ, ”୧୯୯୬ରେ ଖେଳିଥିବା ଖେଳାଳିଙ୍କ ମଧ୍ୟରେ ମୁଁ ଏକମାତ୍ର ସକ୍ରିୟ ଅଛି। ଅନ୍ୟ ସମସ୍ତେ ଅବସର ନେଇ ଯାଇଛନ୍ତି। ମୁଁ ଏକମାତ୍ର ଏହି ଯୁଗର ପ୍ରତିନିଧିତ୍ୱ କରୁଛି ଏବଂ ଏମେ ମଧ୍ୟ ଦୃଢ଼ ଅଛି। ଗେଲ୍ ଏବେ ମଧ୍ୟ ଖେଳୁଛି ଏବଂ ସଫଳତା ପାଉଛି ବୋଲି ଦେଖି କେତେକ ଆଘାତ ପାଉଛନ୍ତି। ମୁଁ ପୂର୍ବତନ ଏବଂ ବର୍ତ୍ତମାନର ଖେଳାଳିଙ୍କ କଥା କହୁଛି। ସମୟ ଆସିଲେ ପୁଣି ତୁମସହ ଦେଖାହେବ“। ପ୍ରକାଶ ଯୋଗ୍ୟ ଯେ, ସିପିଏଲ ଆସନ୍ତା ଅଗଷ୍ଟ ୧୯ରୁ ସେପ୍ଟେମ୍ବର ୨୬ ପର୍ଯ୍ୟନ୍ତ ଅନୁଷ୍ଠିତ ହେବ। ଏହା ବିଦେଶୀ ଖେଳାଳି ଏବଂ ଦର୍ଶକଙ୍କ ବିନା ଖେଳାଯିବ। ତେବେ କରୋନା ଭାଇରସ ସଂକ୍ରମଣ ଜନିତ କାରଣରୁ ପୂର୍ବ କାର୍ଯ୍ୟସୂଚୀରେ ପରିବର୍ତ୍ତନ କରାଯାଇପାରେ ।
