ଲଣ୍ଡନ,୧୫।୭- ଭାରତୀୟ ଦଳର ଚୟନକର୍ତ୍ତା, ସାଥୀ ଖେଳାଳି ଓ ପ୍ରଶଂସକମାନେ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ସନ୍ନ୍ୟାସ ନେବେ କି ନାହିଁ ବୋଲି ଅନୁମାନ ଚଳାଇଛନ୍ତି। କିନ୍ତୁ ଭାରତୀୟ ଖେଳାଳି ଭାବେ ଧୋନୀଙ୍କ କ୍ୟାରିୟରର ପ୍ରାୟତଃ ଶେଷ ହୋଇସାରିଛି। ୩୮ ବର୍ଷୀୟ କ୍ରିକେଟର ଯୁବ ଖେଳାଳିଙ୍କ ଲାଗି ବାଟ ଛାଡ଼ିବା ଉଚିତ ବୋଲି କେତେକ ପୂର୍ବତନ ଖେଳାଳି ମତ ଦେଇଛନ୍ତି। ବିଶ୍ୱକପ୍ରେ ଇଂଲଣ୍ଡ ବିପକ୍ଷ ମ୍ୟାଚ୍ରେ ଧୋନୀ ନିମ୍ନ କ୍ରମରେ ବ୍ୟାଟିଂ କରି ୩୧ ବଲରୁ ୪୨ ରନ୍ କରିଥିଲେ। ଏହି ମ୍ୟାଚ୍ରେ ଭାରତୀୟ ଦଳ ନିକଟରେ ବିଜୟ ସୁଯୋଗ ଥିଲା। ହେଲେ ଧୋନୀ ବାଉଣ୍ଡ୍ରି ଲଗାଇବାକୁ ଉଦ୍ୟମ କରି ନ ଥିଲେ। ଏହି ପରାଜୟ ପାଇଁ କିଛି ପୂର୍ବତନ ଖେଳାଳି ଧୋନୀଙ୍କୁ ଦାୟୀ କରିଥିଲେ। ମିଳିଥିବା ସୂଚନା ଅନୁଯାୟୀ, ଚୟନ କମିଟି ମୁଖ୍ୟ ଏମ୍ଏସ୍କେ ପ୍ରସାଦ ଖୁବଶୀଘ୍ର ଧୋନୀଙ୍କ ସହ ଆଲୋଚନା କରିବେ। ଯଦି ସେ ଏପର୍ଯ୍ୟନ୍ତ ନିଷ୍ପତ୍ତି ନେଇ ନାହାନ୍ତି ତେବେ ତାଙ୍କ ଅବସର ନେବାର ସମୟ ଆସିପାରେ ବୋଲି ବୁଝାଇବେ। ସେ ଏପର୍ଯ୍ୟନ୍ତ ଅବସର ସମ୍ପର୍କରେ ଘୋଷଣା କରି ନାହାନ୍ତି, ଯାହା କି ଆମକୁ ଆଶ୍ଚର୍ଯ୍ୟ କରିଛି। ରିଷଭ ପନ୍ତଙ୍କ ଭଳି ଯୁବ ଖେଳାଳି ସୁଯୋଗ ହାତେଇବା ଅପେକ୍ଷାରେ ରହିଛନ୍ତି। ଆମେ ବିଶ୍ୱକପ୍ରେ ଦେଖିଛୁ, ଧୋନୀ ଆଉ ପୂର୍ବଭଳି ବ୍ୟାଟ୍ସମ୍ୟାନ ନାହାନ୍ତି। ବ୍ୟାଟିଂ କ୍ରମର ୬ଷ୍ଠ କିମ୍ବା ୭ମ ସ୍ଥାନରେ ଆସିବା ସତ୍ତ୍ୱେ ସେ ଦ୍ରୁତ ବୋଲରଙ୍କ ବିପକ୍ଷରେ ସ୍କୋର କରିପାରୁ ନାହାନ୍ତି। ଏହା ଦଳକୁ କ୍ଷତି ପହଞ୍ଚାଉଛି ବୋଲି ସୂତ୍ରରୁ ଜଣାପଡ଼ିଛି। ଏହାବାଦ୍ ଆଗାମୀ ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜ୍ ଲାଗି ଧୋନୀଙ୍କୁ ଚୟନ କରାଯିବ ନାହିଁ। କାରଣ ସେ ୨୦୨୦ ଟି୨୦ ବିଶ୍ୱକପ୍ ଲାଗି ଚୟନକର୍ତ୍ତାଙ୍କ ଯୋଜନାରେ ନାହାନ୍ତି। ତାଙ୍କୁ ଏବେ ଅନ୍ତର୍ଜାତୀୟ କ୍ରିକେଟରୁ ଅବସର ନେବାକୁ ପଡ଼ିବ। ଆଉ ତାଙ୍କୁ ସିଧାସଳଖ ଜାତୀୟ ଦଳକୁ ଚୟନ କରାଯିବ ନାହିଁ। ସେ ଅନ୍ତର୍ଜାତୀୟ ସ୍ତରରେ ସବୁପ୍ରକାର ସଫଳତା ପାଇସାରିଛନ୍ତି। ଧୋନୀଙ୍କ ଐତିହାସିକ ଅନ୍ତର୍ଜାତୀୟ କ୍ୟାରିୟରରେ ୩୫୦ ମ୍ୟାଚ୍ରୁ ୧୦,୭୭୩ ଓ ୯୮ ଟି୨୦ରୁ ୧୬୧୭ ରନ କରିସାରିଛନ୍ତି।
