ଝୁମ୍ପୁରା, ୧୩।୫(ଡି.ଏନ.ଏ.)-ବିଦ୍ୟୁତ ବିତରକ କମ୍ପାନୀ ନେସ୍କୋର ମନମୁଖି ନୀତି ସୀମା ଟପିଗଲାଣି। ମେରିରାୟ ନୀତିରେ ବିଦ୍ୟୁତ ଉପଭୋକ୍ତାଙ୍କୁ ସେବା ଯୋଗାଉଥିବା ନେସ୍କୋ କେବଳ ବିଦ୍ୟୁତ ଦେୟ ଆଦାୟରେ ବ୍ୟସ୍ତ ରହୁଥିବାବେଳେ ବିଦ୍ୟୁତ ଉପଭୋକ୍ତାଙ୍କର ସେବା ପାଇଁ ଆଖି ବୁଜି ଦେଇଛି। ପ୍ରବଳ ଗରମ ସହିତ ଅସହ୍ୟ ତାତିରେ ଜନଜୀବନ ଛଟପଟ ହେଉଥିବା ବେଳେ ଘଣ୍ଟା ଘଣ୍ଟା ଧରି ଅଘୋଷିତ ବିଦ୍ୟୁତ କାଟ ଯୋଗୁ ସାଧାରଣ ଜୀବନ ଦୁର୍ବିଷହ ହୋଇ ପଡୁଛି। ବାରମ୍ବାର ଅଭିଯୋଗ ପରେ ମଧ୍ୟ ସୁଧୁରୁନାହିଁ ବିଦ୍ୟୁତ ବିଭାଗ।
ସୂଚନା ଯୋଗ୍ୟ ଝୁମ୍ପୁରାସ୍ଥିତ ନେସ୍କୋର ବିଦ୍ୟୁତ୍ ଷ୍ଟ୍ରକଚର୍ରେ ୩ଟି ଫିଡର ରହିଛି। ନିୟମ ଅନୁଯାୟୀ ୩ଟି ଫିଡରରେ ୩ଟି ପାୱାର ଟ୍ରାନ୍ସଫର୍ମରରେ କାମ ଚଳାଇ ନିଆ ଯାଉଥିଲା। ୨ମାସ ହେଲା ସେହି ପାୱାର ଟ୍ରାନ୍ସଫର୍ମର ମଧ୍ୟରୁ ଗୋଟିଏ ୩.୧୫ ଏମଭିଏ ପାୱାର ଟ୍ରାନ୍ସଫର୍ମର ପୋଡି ଯାଇଛି। ବାରମ୍ବାର ଅଭିଯୋଗ ପରେ ମଧ୍ୟ ପୋଡିଯାଇଥିବା ପାୱାର ଟ୍ରନ୍ସଫର୍ମରକୁ ଷ୍ଟ୍ରକଚର୍ରୁ ହଟାଯାଉନାହିଁ କିମ୍ବା ସଜଡା ଯାଉନାହିଁ। ଏବେ ଗୋଟିଏ ପାୱାର ଟ୍ରାନ୍ସଫର୍ମର ଉପରେ ସମୁଦାୟ ୩ଟି ଫିଡରର ଲୋଡ ଦିଆଯାଇ ବିଦ୍ୟୁତ୍ ଯୋଗାଣ ଚାଲିଛି। ଓଭରଲୋଡ ରହୁଥିବାରୁ ବାରମ୍ବାର ବିଦ୍ୟୁତ ସରବରାହ ବନ୍ଦ ହେଉଛି। ଏପରିସ୍ଥଳେ ଯେ କୌଣସି ମୁହୂର୍ତ୍ତରେ ବିଦ୍ୟୁତ ଯୋଗାଣ ଚାଲିଥିବା ପାୱାର ଟ୍ରାନ୍ସଫର୍ମର ପୋଡି ଯିବାର ସମ୍ଭାବନା ସୃଷ୍ଟି ହୋଇଛି। ଏପରି ହେଲେ ଝୁମ୍ପୁରା ଷ୍ଟ୍ରକଚର ଉପରେ ନିର୍ଭରଶୀଳ ଥିବା ୧୦ ହଜାରରୁ ଊର୍ଦ୍ଧ୍ୱ ବିଦ୍ୟୁତ ଉପଭୋକ୍ତା ଅନ୍ଧାରକୁ ଚାଲିଯିବେ। ଏ ନେଇ ପଞ୍ଚାୟତ ପ୍ରତିନିଧିଙ୍କ ସହିତ ବିଦ୍ୟୁତ ଉପଭୋକ୍ତା ବାରମ୍ବାର ନେସ୍କା କର୍ତ୍ତୃପକ୍ଷଙ୍କୁ ଭେଟିଛନ୍ତି ହେଲେ ା କର୍ତ୍ତୃପକ୍ଷ କେବଳ ପ୍ରତିଶ୍ରୁତିରେ କାମ ଚଳାଇ ନେଉଛନ୍ତି।
ଏ ସମ୍ପର୍କରେ କେନ୍ଦୁଝରସ୍ଥିତ ନେସ୍କା ଅଧୀକ୍ଷଣ ଯନ୍ତ୍ରୀ ନାରାୟଣ ଦାସ ଏବଂ ଯୋଡାସ୍ଥିତ ନେସ୍କୋ ନିର୍ବାହୀ ଯନ୍ତ୍ରୀ ଏ.କେ. ମହାନ୍ତଙ୍କୁ ପଚାରିବାରୁ ସେହି ପୁରୁଣା ପ୍ରତିଶ୍ରୁତି ଦୋହରାଇ କହିଛନ୍ତି ଯେ, ପ୍ରୟାସ ଜାରି ରହିଛି। ଆଉ ଗୋଟିଏ ପାୱାର ଟ୍ରାନ୍ସଫର୍ମର ଲଗାଯିବ। ଅସନ୍ତୁଷ୍ଟ ବିଦ୍ୟୁତ ଉପଭୋକ୍ତା ଜାତୀୟ ରାଜପଥ ଅବରୋଧ କରିବା ପାଇଁ ଜିଲା ପ୍ରଶାସନ ଏବଂ ନେସ୍କୋ କର୍ତ୍ତୃପକ୍ଷଙ୍କୁ ଚେତାଇ ଦେଇଛନ୍ତି।
