ଖଣ୍ଡପଡ଼ା,୫ା୮(ସ୍ବ.ପ୍ର.): ଜଗନ୍ନାଥ ସଂସ୍କୃତିର ଆଦି ଦେବତା ଭାବେ ପରିଚିତ କଣ୍ଟିଲୋ ଶ୍ରୀ ନୀଳମାଧବ ଜୀଉଙ୍କ ମନ୍ଦିର ପୂର୍ବ ଦ୍ୱାର ତଥା ସିଂହଦ୍ୱାରକୁ ଲାଗି ୨ଟି ପାଇଖାନା ନିର୍ମାଣ କରାଯାଉଛି। ଏଥିଯୋଗୁ ମନ୍ଦିର ନିୟମ ଓ ପରମ୍ପରା ଭଙ୍ଗ ହେଉଥିବା ଅଭିଯୋଗ ହୋଇ ସାଧାରଣରେ ଅସନ୍ତୋଷ ଦେଖାଦେଇଛି। ସୂଚନାଯୋଗ୍ୟ, ପ୍ରଧାନମନ୍ତ୍ରୀ ସ୍ବଚ୍ଛ ଭାରତ ଯୋଜନା କଣ୍ଟିଲୋ ପଞ୍ଚାୟତ ଅଞ୍ଚଳରେ ଚାଲିଛି। ତେବେ ହିନ୍ଦୁଧର୍ମର ନିୟମ, ପରମ୍ପରା ଅନୁଯାୟୀ କୌଣସି ମନ୍ଦିରକୁ ଲାଗି ଶୌଚାଳୟ ନିର୍ମାଣ ପାଇଁ ନିଷେଧ ରହିଛି। ତେଣୁ ତୁରନ୍ତ ପାଇଖାନା ବନ୍ଦ କରିବା ପାଇଁ ସେବାୟତ ଗୋବର୍ଦ୍ଧନ ମିଶ୍ର ଏବଂ କେତେଜଣ ଶ୍ରଦ୍ଧାଳୁ ଦାବି କରିଛନ୍ତି। ବର୍ଷସାରା ବିଭିନ୍ନ ପର୍ବପର୍ବାଣୀରେ ଠାକୁରଙ୍କ ଚଳନ୍ତି ପ୍ରତିମା ମଦନମୋହନ ଏବଂ ଠାକୁରାଣୀ, ଠାକୁର ସିଂହଦ୍ୱାରରୁ ଓହ୍ଲାଇ ଦୋଳବେଦୀ ଅତିକ୍ରମ କରି ଗ୍ରାମ ବିଜେ କରନ୍ତି। ଦୋଳ ପୂର୍ଣ୍ଣିମାରେ ଲକ୍ଷ୍ମୀ, ସରସ୍ବତୀଙ୍କ ସହ ଶ୍ରୀ ମଦନମୋହନ ଦୋଳବେଦୀରେ ବିଜେ ହୋଇ ଦୋଳି ଖେଳିଥାନ୍ତି। ଏହାର ଅତି ନିକଟରେ ପାଇଖାନା ନିର୍ମାଣ ହେଉଥିବାରୁ ଶ୍ରଦ୍ଧାଳୁମାନେ ବିରୋଧ କରିଛନ୍ତି। ଏ ନେଇ ଖଣ୍ଡପଡ଼ା ଦେବୋତ୍ତର କାର୍ଯ୍ୟନିର୍ବାହୀ ଅଧିକାରୀ ତଥା ତହସିଲଦାର ସଞ୍ଜୟ କୁମାର ସାମନ୍ତରାୟ ଆବଶ୍ୟକ ପଦକ୍ଷେପ ଗ୍ରହଣ କରିବେ ବୋଲି ସୂଚନା ଦେଇଛନ୍ତି।
