ଲୋଇସିଂହା,୧୦।୪(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହାସ୍ଥିତ ଏସ୍ବିଆଇ ବ୍ୟାଙ୍କ ପାସ୍ବୁକ ପ୍ରିଣ୍ଟର ମେଶିନ ଆଗରେ ଶୁକ୍ରବାର ପ୍ରିଣ୍ଟ ପାଇଁ ଉପଭୋକ୍ତାଙ୍କ ନାହିଁ ନ ଥିବା ଭିଡ଼ ଦେଖିବାକୁ ମିଳିଛି। ଏଠାରେ ସାମାଜିକ ଦୂରତା ରକ୍ଷା କରାଯାଉ ନ ଥିବାରୁ କରୋନା ଭୁତାଣୁ ସଂକ୍ରମଣ ଭୟ ରହିଛି।
ସୂଚନାନୁଯାୟୀ, ମହାମାରୀ କରୋନା ପାଇଁ ସାରାଦେଶରେ ଲକ୍ଡାଉନ୍ ଲାଗୁ କରଯାଇଛି। ଶ୍ରମିକଠାରୁ ବ୍ୟବସାୟୀ ଙ୍କ ରୋଜଗାର ଠପ୍ ହୋଇପଡିଛି । ଏଭଳିପରିସ୍ଥିତିରେ କେନ୍ଦ୍ର ସରକାର ପ୍ରତ୍ୟେକ ମହିଳାଙ୍କ ଜନଧନ ଖାତାକୁ ୫ଶହ ଟଙ୍କା ସହାୟତା ପ୍ରଦାନ କରିଛନ୍ତି। ଉକ୍ତ ଟଙ୍କା ଉଠାଇବା ପାଇଁ ମହିଳା ଓ ତାଙ୍କ ପରିବାର ଲୋକେ ବ୍ୟାଙ୍କରେ ଭିଡ଼ ଜମାଇଛନ୍ତି। ବ୍ୟାଙ୍କ ବାହାରେ ଏଟିଏମ୍ କାଉଣ୍ଟର ନିକଟରେ ଏହି ମେଶିନ ସ୍ଥାପନ କରାଯାଇଛି। ତେବେ ପାସ୍ବୁକରେ ଟଙ୍କା ଅଛି କି ନାହିଁ, ଜାଣିବା ପାଇଁ ଲୋକେ ନାହିଁ ନ ଥିବା ଭିଡ଼ ଜମାଇଛନ୍ତି। ଏଠାରେ ତଦାରଖ ପାଇଁ ମଧ୍ୟ କେହି ନଥିବାରୁ ସାଧାରଣରେ ଭୟର ବାତାବରଣ ଖେଳିଯାଇଛି। ଏ ଦିଗରେ ଦୃଷ୍ଟି ଦେବାକୁ ଦାବି ହେଉଛି।
