ଢେଙ୍କାନାଳ ଅଫିସ, ୨୫।୫- ଢେଙ୍କାନାଳ ସଦର ଥାନା ଅଧୀନ ହରିପୁର-ବେଶାଳିଆ ଗ୍ରାମ ନିକଟ ସବୁଜିମାଭରା ପାହାଡ଼ ଖୋଲ ମଧ୍ୟରେ ପୂଜା ପାଉଥିବା ଶ୍ରୀମହାକାଳେଶ୍ୱର ଶୈବପୀଠରୁ ଲୁଟ୍ ହୋଇଥିବା ପ୍ରାଚୀନ ମୂର୍ତ୍ତି ଶନିବାର ମିଳିଛି। ଲୁଟେରାମାନେ ମୂର୍ତ୍ତି ସମେତ ଅନ୍ୟ ମୂଲ୍ୟବାନ ସାମଗ୍ରୀ ଲୁଟି ନେଇଥିଲେ ମଧ୍ୟ ନିଜ ପାଖରେ ବେଶିଦିନ ରଖିପାରି ନ ଥିଲେ। ସେମାନେ ପୁଣିଥରେ ଲୁଟ୍ ସାମଗ୍ରୀ ପୀଠରେ ରଖିଦେଇ ଫେରାର ହୋଇଯାଇଛନ୍ତି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଦୁଇ ମାସ ତଳେ ପୀଠରେ ପୂଜା ପାଉଥିବା ପିତଳ ନିର୍ମିତ ପ୍ରାଚୀନ ମୂର୍ତ୍ତି, ନାଗ, ଘଣ୍ଟ ଏବଂ ଅନ୍ୟାନ୍ୟ ଆସବାବପତ୍ର ଚୋରି ହୋଇଥିଲା। ଏ ନେଇ ଉକ୍ତ ସମୟରେ ଥାନାରେ ଅଭିଯୋଗ ହୋଇଥିଲା। ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଥିଲା। ତେବେ ଶନିବାର ଆଶ୍ଚର୍ଯ୍ୟଜନକ ଭାବେ ମନ୍ଦିର ନିକଟରୁ ଚୋରି ସାମଗ୍ରୀ ଠାବ କରାଯାଇଥିଲା। ଏହି ଘଟଣା ପ୍ରଚାରିତ ହେବାପରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ଶ୍ରୀ ମହାକାଳେଶ୍ୱରଙ୍କ ଅଲୌକିକ ମହିମା ଯୋଗୁ ଲୁଟେରାମାନେ ଚୋରି ସାମଗ୍ରୀ ଫେରାଇ ଦେଇଥିବା ସାମାଜିକ କର୍ମୀ ବିଷ୍ଣୁପ୍ରସାଦ ସାମଲ କହିଛନ୍ତି।
