ନୂଆଦିଲ୍ଲୀ,୩୧।୫: ନରେନ୍ଦ୍ର ମୋଦିଙ୍କ ଶପଥ ଗ୍ରହଣ ସମାରୋହରେ ସାମିଲ ହେବା ପାଇଁ ଗୁରୁବାର ନୂଆଦିଲ୍ଲୀରେ ହଜାର ହଜାର ସଂଖ୍ୟାରେ ଲୋକ ସାମିଲ ହୋଇଥିଲେ। ରାଜନୀତିଜ୍ଞଙ୍କଠାରୁ ଆରମ୍ଭ କରି କ୍ରୀଡ଼ା ଓ ବଲିଉଡ ଜଗତର ବହୁ ମାନ୍ୟଗଣ୍ୟ ବ୍ୟକ୍ତି ସାମିଲ ହୋଇଥିଲେ। ଏହି ପରିପ୍ରେକ୍ଷୀରେ ଗାୟିକା ଆଶା ଭୋଁସଲେ ମଧ୍ୟ ଶପଥ ଗ୍ରହଣ ସମାରୋହରେ ପହଞ୍ଚିଥିଲେ। ଏହି ସମାରୋହ ରାତି ୯ଟା ପର୍ଯ୍ୟନ୍ତ ଚାଲିଥିଲା। ସମାରୋହ ଶେଷ ହେବା ପରେ ଗାୟିକା ଆଶା ଭିଡ ଭିତରେ ଫଶିଯାଇଥିଲେ। ତାଙ୍କୁ ସାହାଯ୍ୟ ପାଇଁ କେହି ଆଗକୁ ଆସି ନ ଥିବା ବେଳେ ସ୍ମୃତି ଇରାନୀ ସାହାଯ୍ୟର ହାତ ବଢ଼ାଇଥିଲେ। ଆଶାଙ୍କୁ ସୁରକ୍ଷିତ ଭାବେ ସେହି ସ୍ଥାନରୁ ବାହାର କରିବା ସହ କିଭଳି ସେ ଘରେ ପହଞ୍ଚିବେ ସେନେଇ ସୁନିଶ୍ଚିତ କରିଥିଲେ। ଏନେଇ ଆଶା ନିଜ ଟୁଇଟର ଆକାଉଣ୍ଟରେ ସ୍ମୃତିଙ୍କ ସହ ଏକ ଫଟୋ ଶେୟାର କରି ଘଟଣା ବାବଦରେ ସମସ୍ତଙ୍କୁ ଜଣାଇଛନ୍ତି। ଏଥିସହ ସେ ସ୍ମୃତିଙ୍କୁ ବହୁ ପ୍ରଶଂସା ମଧ୍ୟ କରିଛନ୍ତି। ସ୍ମୃତି ସମସ୍ତଙ୍କ କଥା ଚିନ୍ତା କରୁଥିବାରୁ ନିର୍ବାଚନ ଜିତିଛନ୍ତି ବୋଲି ଆଶା କହିଛନ୍ତି।
