ଭୁବନେଶ୍ୱର,୨୮।୪(ବ୍ୟୁରୋ): ରାଜଧାନୀରେ ମାତିଛନ୍ତି ନକଲି ପୋଲିସ। ଆପଣେଇଛନ୍ତି ନୂଆ ଫର୍ମୁଲା। ଆଇପିଏସ୍ ଅଫିସର ଏବଂ ଇନ୍ସପେକ୍ଟର ପରିଚୟ ଦେଇ ଗିରଫ ହୋଇଥିବା ଘଟଣାଭଳି ଅନୁରୂପ ଘଟଣା ଶହୀଦନଗର ଥାନା ଅଞ୍ଚଳରେ ଘଟିଛିି। ଲକ୍ଡାଉନ୍ ନିୟମ ଉଲ୍ଲଂଘନ କରିଥିବାରୁ ଜବତ ଆଳରେ ସ୍କୁଟି ଲୁଟ୍ କରିନେଇଛନ୍ତି। ଜଣେ ପୋଲିସ ବର୍ଦ୍ଦି ପିନ୍ଧିଥିବାରୁ ଲୋକଙ୍କ ସନ୍ଦେହ ହୋଇନଥିଲା, ଯାହାର ଫାଇଦା ନେଇ ୨ ଲୁଟେରା ସ୍କୁଟି ନେଇ ଫେରାର ହୋଇଯାଇଛନ୍ତି। ଲୁଟର ଶିକାର ହୋଇଥିବା ବିଶ୍ୱନାଥ ଦାଶ ଶହୀଦନଗର ଥାନାରେ ଅଭିଯୋଗ କରିଛନ୍ତି। ପୋଲିସ କେସ୍ ନଂ-୧୯୪/୨୦ ଦଫା ୩୭୯ରେ ମାମଲା ରୁଜୁ କରି ତଦନ୍ତ କରୁଛି।
ଅଭିଯୋଗ ଅନୁଯାୟୀ,ରବିବାର ପୂର୍ବାହ୍ନ ୧୧ଟାରେ ବିଶ୍ୱନାଥ ଏବଂ ତାଙ୍କ ବାପା ପୋଷ୍ଟାଲ କଲୋନୀରେ ଥିବା ଏକ ଓମ୍ଫେଡ୍ ଦୋକାନକୁ ଯାଇଥିଲେ। କେତେକ ସାମଗ୍ରୀ କିଣିବା ସମୟରେ ୨ ଜଣ ବାଇକରେ ଆସି ପହଞ୍ଚିଥିଲେ। ଜଣେ ବାଇକରୁ ଓହ୍ଲାଇ ସ୍କୁଟିର ତାଲା ଭାଙ୍ଗି ଗଡ଼ାଇ ଗଡ଼ାଇ ନେଉଥିଲେ। ସ୍କୁଟି କଣ ପାଇଁ ନେଉଛ ବୋଲି ପଚାରିବାରୁ ସେମାନେ କହିଥିଲେ, ଲକ୍ଡାଉନ୍ ନିୟମ ଉଲ୍ଲଂଘନ ପାଇଁ ଜବତ କରୁଛୁ, ଫାଇନ୍ ଦେଇ ଥାନାରୁ ନେଇଆସିବ। ଏହାପରେ ସ୍କୁଟି ନେଇ ଚମ୍ପଟ ମାରିଥିଲେ। ବିଶ୍ୱନାଥ ଥାନାକୁ ଆସି ବୁଝିବାରୁ ଜାଣିଥିଲେ ତାଙ୍କ ସ୍କୁଟିକୁ ଅଭିନବ ଉପାୟରେ ଲୁଟ୍ କରାଯାଇଛି। ସେହିଭଳି ଖଣ୍ଡଗିରି ଥାନା ଅଧୀନ ବରମୁଣ୍ଡା ଏଚ୍ବି କଲୋନୀର ବିଷ୍ଣୁପ୍ରସାଦ ତ୍ରିପାଠୀଙ୍କ ବାଇକ୍କୁ ମଧ୍ୟ ଲୁଟେରା ରବିବାର ସନ୍ଧ୍ୟାରେ ଲୁଟି ନେଇଛନ୍ତି। ତେବେ କିଏ ଅସଲି କିଏ ନକଲି ତାକୁ ନେଇ ଜନସାଧାରଣ ଚିନ୍ତାରେ ପଡ଼ିଛନ୍ତି।
