ଲଣ୍ଡନ, ୧୮।୬: ଚଳିତ ବିଶ୍ୱକପରେ ବିପର୍ଯ୍ୟୟ ଘଟାଇଛି ବାଂଲାଦେଶ। ସୋମବାର ଅନୁଷ୍ଠିତ ହାଇ ସ୍କୋରିଂ ମ୍ୟାଚ୍ରେ ସାକିବ-ଅଲ-ହାସନଙ୍କ ଶତକ ଏବଂ ଲିଟନ ଦାସଙ୍କ ବିସ୍ଫୋରକ ବ୍ୟାଟିଂ ବଳରେ ଓ୍ବେଷ୍ଟଇଣ୍ଡିଜକୁ ୭ ଓ୍ବିକେଟରେ ପରାସ୍ତ କରିଛି ବାଂଲାଦେଶ। ସାକିବ ୯୯ ବଲରେ ୧୨୪ ରନ କରିଥିବାବେଳେ ଲିଟନ ୬୯ ବଲରୁ ୮ଟି ଚୌକା ଏବଂ ୪ଟି ଛକା ସହ ୯୪ରନରେ ଅପରାଜିତ ରହିଥିଲେ। ଏହି ମ୍ୟାଚ୍ରେ ସାକିବଙ୍କ ଅପେକ୍ଷା ଲିଟନଙ୍କ ପାଳିର ଅଧିକ ଚର୍ଚ୍ଚା ହେଉଛି। ଲିଟନ ଜଣେ ହିନ୍ଦୁ ଖେଳାଳି। ସେ ମା’ ଦୁର୍ଗାଙ୍କ ଜଣେ ବଡ ଭକ୍ତ। ୨୦୧୫ରେ ସୋସିଆଲ ମିଡିଆରେ ଦଶହରା ପୂଜାବେଳେ ମା’ ଦୁର୍ଗାଙ୍କ ଫଟୋ ପୋଷ୍ଟ କରି ବିବାଦ ଘେରକୁ ଆସିଥିଲେ। ଅନେକ ୟୁଜର୍ସ ତାଙ୍କୁ ସମାଲୋଚନା କରିଥିଲେ। ଏହାର ସଫେଇ ଦେଇ ଲିଟନ କହିଥିଲେ, ମୁଁ ପ୍ରଥମେ ଜଣେ ବାଂଲାଦେଶୀ, ମୋତେ ମୋ ଧର୍ମଠାରୁ ଅଲଗା କରା ନ ଯାଉ। ସୂଚନାଯୋଗ୍ୟ, ଲିଟନ ୨୯ଟି ଏକଦିବସୀୟ ମ୍ୟାଚ୍ ଖେଳି ୬୭୮ରନ୍ କରିଛନ୍ତି।
