ଖଲ୍ଲିକୋଟ,୭ା୬(ଡି.ଏନ.ଏ.)- ଖଲ୍ଲିକୋଟ କେଶପୁର ବଜାର ହନୁମାନ ମନ୍ଦିର ନିକଟରେ ଗତ ୧୬ ତାରିଖ ରାତିରେ ଭିକାରୀ ତରେଇଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାରେ୨ ଅଭିଯୁକ୍ତଙ୍କୁ ପୋଲିସ ଗିରଫ କରି ଗୁରୁବାର କୋର୍ଟଚାଲାଣ କରିଛି। ସେମାନେ ହେଲେ ଖଲ୍ଲିିକୋଟ ଥାନା ବିକ୍ରମପୁର ଗ୍ରାମର ପ୍ରମୋଦ ରାଉଳ ଏବଂ ମୋହନପୁର ଗ୍ରାମର କାର୍ତ୍ତିକ ପରିଡ଼ା। ସେମାନଙ୍କଠାରୁ ୨ ବାଇକ୍, ଦୁଇଟି ଗୁଳି ଏବଂ ଗୋଟିଏ ମୋବାଇଲ ଫୋନ ଜବତ କରାଯାଇଛି। ଜମିଜମା ବ୍ୟବସାୟ ଏବଂ ପୂର୍ବ ଶତ୍ରୁତାକୁ ନେଇ ଭିକାରୀଙ୍କୁ ହତ୍ୟା କରାଯାଇଥିବା ଆଇଆଇସି ସୁନୀଲ କୁମାର ବେହେରା ସୂଚନା ଦେଇଛନ୍ତି। ଏହି ଘଟଣାରେ ଆଉ ୪ ଜଣ ଫେରାର୍ ଥିବା ଜଣାପଡିଛି।
ପୋଲିସ ସୂଚନା ଅନୁଯାୟୀ, ଭିକାରୀ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ଲଙ୍ଗଳେଶ୍ୱରର ଜଣେ କଣ୍ଟ୍ରାକ୍ଟର। ସେ ଏକ ରାସ୍ତା କାମ କରୁଥିବା ବେଳେ ମାଟି ଚାଲାଣକୁ ନେଇ ଭିକାରୀଙ୍କ ସହ ତାଙ୍କର ଶତ୍ରୁତା ହୋଇଥିଲା। ଏପରିକି ନିକଟରେ ସରିଥିବା ନିର୍ବାଚନ ବେଳେ ଭିକାରୀ ଏବଂ ସମ୍ପୃକ୍ତ କଣ୍ଟ୍ରାକ୍ଟରଙ୍କ ଗୋଷ୍ଠୀ ମଧ୍ୟରେ ବିବାଦ ହୋଇ ଖଲ୍ଲିିକୋଟ ଥାନାରେ ଉଭୟ ପକ୍ଷରୁ ଏତଲା ଦିଆଯାଇଥିଲା। ପୂର୍ବରୁ ଭିକାରୀଙ୍କ ସହ ଅଭିଯୁକ୍ତ ପ୍ରମୋଦଙ୍କର ଜମିଜମା କିଣାବିକା ନେଇ ବିବାଦ ଥିଲା। ସେହିପରି ୨୦୧୧ରେ ଭିକାରୀଙ୍କର ଅଭିଯୁକ୍ତ କାର୍ତ୍ତିକଙ୍କ ମଧ୍ୟରେ ମାରପିଟ ହୋଇଥିଲା। ତେଣୁ ମୁଖ୍ୟ ଅଭିଯୁକ୍ତ ଜଣକ ପ୍ରମୋଦ ଓ କାର୍ତ୍ତିକଙ୍କୁ ଏକାଠି କରି ଭିକାରୀଙ୍କୁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲେ। ମେ ୧୫ରେ ବାଲୁଗାଁ ନିକଟ ଖଡ଼ିକାପଲି ରାମେଶ୍ୱର ମନ୍ଦିରରେ ଏ ନେଇ ୩ ଅଭିଯୁକ୍ତ ଯୋଜନା ପ୍ରସ୍ତୁତ କରିଥିଲେ। ପରେ ସେମାନେ ସୁପାରିକିଲର ଡ଼ାକି ହତ୍ୟାକାଣ୍ଡ ଘଟାଇଥିବା ଜଣାପଡ଼ିଛି। ୬ ଲକ୍ଷ ଟଙ୍କାରେ ଏହା ଡିଲ୍ ହୋଇଥିବାର କୁହାଯାଉଛି। ମୁଖ୍ୟ ଅଭିଯୁକ୍ତ ଧରାଗଲେ ସମସ୍ତ ତଥ୍ୟ ପଦାକୁ ଆସିବ ବୋଲି ପୋଲିସ କହିଛି। ଅଭିଯୁକ୍ତଙ୍କୁ ଧରିବା ପାଇଁ ଏକ ସ୍ବତନ୍ତ୍ର ଟିମ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଥିଲା। ଉକ୍ତ ଟିମରେ ଏସଆଇ ସିଲୁ ଧଳ, ଏଏସଆଇ ଡିଏମଆର ଦୋରାଙ୍କ ସମେତ ଅନ୍ୟ ପୋଲିସ ସାମିଲ ଥିଲେ। ଖୁବଶୀଘ୍ର ଅନ୍ୟ ଅଭିଯୁକ୍ତ ଧରାପଡ଼ିବେ ବୋଲି ଆଇଆଇସି ବେହେରା କହିଛନ୍ତି।
