ନୂଆଦିଲ୍ଲୀ,୮।୭(ପି.ଟି.)- ଦୁଇ ଥର ବିଶ୍ୱ ଚାମ୍ପିୟନ ଅଷ୍ଟ୍ରେଲିଆ ହକି ଖେଳାଳି ଫର୍ଗୁସ କାଭାନାଗଙ୍କ ତତ୍ତ୍ୱାବଧାନରେ ବେଙ୍ଗାଲୁରୁସ୍ଥିତ ସାଇ କେନ୍ଦ୍ରଠାରେ ଭାରତୀୟ ଡିଫେଣ୍ଡରଙ୍କ ଲାଗି ଏକ ସ୍ବତନ୍ତ୍ର କ୍ୟାମ୍ପ ଆୟୋଜନ କରାଯିବ। ଜୁଲାଇ ୧୪ ତାରିଖରୁ ଆରମ୍ଭ ହେବାକୁ ଥିବା ଟ୍ରେନିଂ ଶିବିର ୭ଦିନ ଧରି ଚାଲିବ। ଏଥିରେ ଯୋଗଦେବା ଲାଗି ୫ ଓଡ଼ିଆ ମନୋନୀତ ହୋଇଛନ୍ତି। ସେମାନେ ହେଲେ ବୀରେନ୍ଦ୍ର ଲାକ୍ରା, ସୁମନ ବେକ୍, ପ୍ରତାପ ଲାକ୍ରା, ନିଲମ ସଞ୍ଜୀବ ଖେସ୍ ଓ ଅମିତ ରୋହିଦାସ। ନୂଆଦିଲ୍ଲୀଠାରେ ୨୦୧୦ ଓ ହେଗ୍ଠାରେ ୨୦୧୪ ବିଶ୍ୱକପ୍ ଜିତିଥିବା ଅଷ୍ଟ୍ରେଲିଆ ଦଳର ଅଂଶ ଥିଲେ କାଭାନାଗ। ଏହାବାଦ୍ ତାଙ୍କ ପ୍ରତିନିଧିତ୍ୱରେ ଦଳ ୨୦୦୮ରୁ ୧୨ ପର୍ଯ୍ୟନ୍ତ କ୍ରମାଗତ ଏଫ୍ଆଇଏଚ୍ ଚାମ୍ପିୟନ୍ସ ଟ୍ରଫି ଜିତିଥିବା ଦଳର ସଦସ୍ୟ ଥିଲେ। ସେ ହକି ଇଣ୍ଡିଆ (ଏଚ୍ଆଇ) ଦ୍ୱାରା ଚିହ୍ନଟ ୧୪ ଜଣ ଡିଫେଣ୍ଡରଙ୍କ ସହ କାର୍ଯ୍ୟ କରିବେ। ଏହି ଶିବିର ସମ୍ପର୍କରେ ଭାରତୀୟ ଦଳର ମୁଖ୍ୟ କୋଚ୍ ଗ୍ରାହମ ରିଡ୍ କହିଛନ୍ତି, ଆମ ଡିଫେନ୍ସ ବିଭାଗର ଦକ୍ଷତାରେ ଉନ୍ନତି ଦରକାର। ପୂର୍ବତନ କୁକାବୁରା କିମ୍ବଦନ୍ତୀ ଫର୍ଗୁସଙ୍କ ସହ କାର୍ଯ୍ୟ କରିିବାକୁ ସୁଯୋଗ ପାଇଥିବାରୁ ଆମେ ଭାଗ୍ୟବାନ୍। ଶିବିରରେ ଆମେ ପୂର୍ବତନ ଅଷ୍ଟ୍ରେଲିଆନ ଖେଳାଳିଙ୍କ ୧୦ ବର୍ଷର ଅଭିଜ୍ଞତାକୁ ଆମ ଡିଫେଣ୍ଡରଙ୍କ ସମସ୍ତ ବିଭାଗର ଉନ୍ନତି ଉପରେ କାର୍ଯ୍ୟ କରିବୁ।
