ଖଇରା, ୯।୧୧(ଡି.ଏନ.ଏ.): ବୁଲୁବୁଲ ପ୍ରଭାବରେ ଖଇରା ବ୍ଲକରେ ବ୍ୟାପକ କ୍ଷତି ହୋଇଛି। ବହୁ ସ୍ଥାନରେ ଘର ଉପରେ ଗଛ ପଡିବା ଯୋଗୁ ଛପର ଘର ଭାଙ୍ଗିରୁଜି ନଷ୍ଟ ହୋଇଯାଇଛି। କିଛି ସ୍ଥାନରେ ରାସ୍ତାରେ ଗଛ ପଡିବା ଯୋଗୁ ଯାତାୟାତ ଠପ୍ ହୋଇ ଯାଇଛି। ପ୍ରବଳ ବର୍ଷା ଯୋଗୁ ପାଚିଲା ଧାନ ପାଣିରେ ଭାସୁଛି। ଫଳରେ ଚାଷୀମାନଙ୍କର ବର୍ଷକର ଅମଳ ଏକପ୍ରକାର ନଷ୍ଟ ହୋଇଯାଇଛି। ସେପଟେ ବିଦ୍ୟୁତ ସଂଯୋଗ ଅଭାବରୁ ସମଗ୍ର ଖଇରା ବିଦ୍ୟୁତ୍ ସବ୍ଡିଭିଜନର ଉପଭୋକ୍ତାମାନେ ୨୪ଘଣ୍ଟା ଧରି ଅନ୍ଧାରରେ ରହିଛନ୍ତି। ତେଲଦିଆ ବଟେଶ୍ୱର ରାସ୍ତାର ନାହୁଲଠାରେ ରାସ୍ତାରେ ଗଛ ପଡିବାରୁ ଯାତାୟାତ ବାଧାପ୍ରାପ୍ତ ହୋଇଛି। ସେହିଭଳି ଖଇରା ପଞ୍ଚାୟତ ଆଳଦା ଗ୍ରାମରେ ଅଭିମନ୍ୟୁ ସାହୁଙ୍କ ଘର ଉପରେ ଗଛ ଭାଙ୍ଗି ପଡିବାରୁ ବାସଗୃହ ନଷ୍ଟ ହୋଇଛି। ଖଇରା ଅଗ୍ନିଶମ ବିଭାଗ ପହଞ୍ଚି ଗଛକୁ ବାସଗୃହ ଉପରୁ ହଟାଇବାକୁ ସକ୍ଷମ ହୋଇଛନ୍ତି। ସେପଟେ ଖଇରା ବ୍ଲକରେ ଆନୁମାନିକ ୧୯ହଜାର ୪ଶହ ହେକ୍ଟର ଚାଷଜମିରେ ଚଳିତବର୍ଷ ଧାନଚାଷ କରାଯାଇଥିଲା। ଏବେ ଧାନ ପାଚି ଆସୁଥିବା ବେଳେ ମାତ୍ର ଆଉ ୧୦ କି ୧୫ଦିନ ମଧ୍ୟରେ ଚାଷୀମାନେ ଧାନକାଟି ଖଳାକୁ ଆଣିବା ପାଇଁ ପ୍ରସ୍ତୁତ ହେଉଥିଲେ। ପାଚିଲା ଧାନରେ ବର୍ଷା ମାଡ ଯୋଗୁ ଅନ୍ୟୁନ ୮ହଜାର ହେକ୍ଟର ଜମିର ଧାନନଷ୍ଟ ହେବା ନେଇ ଆଶଙ୍କା କରାଯାଉଛି। ତୁରନ୍ତ ସରକାର କ୍ଷୟକ୍ଷତିର ଆକଳନ କରି କ୍ଷତିପୂରଣ ଦେବାକୁ ମାଣିତ୍ରୀ ପଞ୍ଚାୟତର ଚାଷୀ ଅକ୍ଷୟ କୁମାର ଦାସ, ଉମାକାନ୍ତ ପଣ୍ଡା, ଅର୍ଜୁନ ପଣ୍ଡା, ଶମ୍ଭୁନାଥ ଦଳେଇ, ସୁଶାନ୍ତ ମହାପାତ୍ର, ସାରଡାଙ୍ଗ ପଞ୍ଚାୟତ ଅଲିପୁର ଗ୍ରାମର ଚାଷୀ ସୁଦର୍ଶନ ପୃଷ୍ଟି, ପ୍ରଭାତ କୁମାର ପଣ୍ଡା ଓ ଅନାଦି ପରିଡା ପ୍ରମୁଖ ଦାବି କରିଛନ୍ତି। ଏହାଛଡା ବ୍ଲକର ସାରଡାଙ୍ଗ, ଝିଙ୍କିରିଆ, ବର୍ତ୍ତନା, ମହତୀପୁର, କୁପାରୀ, ଝିଙ୍କିରିଆ, ଗୋବିନ୍ଦପୁର, ଶ୍ୟାମସୁନ୍ଦରପୁର, ମାାଖନପୁର ଓ ସାରୁଗାଁ ଆଦି ପଞ୍ଚାୟତ ସମେତ ୩୭ ପଞ୍ଚାୟତରେ ଧାନ ପାଣିରେ ପଡି ନଷ୍ଟ ହୋଇଥିବା ଚାଷୀମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ଖଇରା କୃଷି ପରାମର୍ଶ କେନ୍ଦ୍ରର ସହକାରୀ କୃଷି ଅଧିକାରୀ ବାସୁଦେବ ଶତପଥିଙ୍କୁ ଯେଗାଯୋଗ କରାଯିବାରୁ ବହୁ ଅଞ୍ଚଳରୁ କ୍ଷତି ସମ୍ପର୍କିତ ଅଭିଯୋଗ ତାଙ୍କ ନିକଟକୁ ଆସିଛି। ଖୁବଶୀଘ୍ର ରାଜସ୍ବ ଓ କୃଷି ବିଭାଗର ମିଳିତ ତଦନ୍ତ କରାଯିବ ବୋଲି କହିଛନ୍ତି।
