ନୂଆଦିଲ୍ଲୀ,୧୬ା୪: ଭାରତର ବିମାନ ଚଳାଚଳ କ୍ଷେତ୍ର ଏବଂ ସ୍ବାଧୀନ କ୍ଷେତ୍ରଗୁଡିକରେ ୨୦ ଲକ୍ଷ ଚାକିରି ଏବେ ବିପଦରେ ରହିଛି। କରୋନା ଯୋଗୁ ବଜାର କ୍ଷତିଗ୍ରସ୍ତ ହେବାରୁ ଏଭଳି ବିପଦ ଆସିଛି ବୋଲି ଇଣ୍ଟରନ୍ୟାଶନାଲ ଏୟାର ଟ୍ରାନ୍ସପୋର୍ଟ ଆସୋସିଏଶନ( ଆଇଏଟିଏ) ପକ୍ଷରୁ ସୂଚନା ଦିଆଯାଇଛି। ଏବେ ସାରା ଦେଶରେ ବିମାନ ସେବା ମେ ୩ ତାରିଖ ଯାଏ ବନ୍ଦ ରହିଛି। ବର୍ତ୍ତମାନ ବାଣିଜ୍ୟ ସ୍ଥିତି ଅଧିକ ଚ୍ୟାଲେଞ୍ଜିଂ ହେବା ଯୋଗୁ ବିମାନ କମ୍ପାନୀଗୁଡିକ ପରିଚାଳନାରେ ବିଭିନ୍ନ ଅସୁବିଧା ସାମ୍ନା କରୁଛନ୍ତି। ଏବେ ବିମାନ ଚଳାଚଳ କ୍ଷେତ୍ରରେ କିଛି କମ୍ପାନୀ ଛଟେଇ ଆରମ୍ଭ କରିଥିବା ବେଳେ ଅନ୍ୟ କିଛି କମ୍ପାନୀ ବେତନ ହ୍ରାସ କରିବା ସହ କର୍ମଚାରୀଙ୍କୁ ଛୁଟିରେ ପଠାଇ ଦେଇଛନ୍ତି।
କୋଭିଡ-୧୯ ଯୋଗୁ ସାରା ବିଶ୍ୱରେ ବିମାନ କମ୍ପାନୀଙ୍କ ସାମ୍ନାରେ ଏବେ ପରିଚାଳନା ଚାଲୁ ରଖିବା ଏବଂ ଅସ୍ତିତ୍ୱ ବଜାୟ ରଖିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏଭଳି ବିଭିନ୍ନ ସମସ୍ୟା ଲାଗି ବିମାନ ଶିଳ୍ପରେ ଯାତ୍ରୀ ରାଜସ୍ବ ୮.୮ ବିଲିୟନ ଡଲାର କ୍ଷତି ହେବ ବୋଲି ଅନୁମାନ କରାଯାଇଛି। ଏହି ସମୟରେ ବିମାନ ଯାତ୍ରା ସୁବିଧା ୩୬% ଖସିଛି। ବିମାନ ଶିଳ୍ପ ଏବଂ ଅନ୍ୟ ସ୍ବାଧୀନ କ୍ଷେତ୍ରରେ ୨ ନିୟୁତ ନିଯୁକ୍ତି ଏବେ ସଙ୍କଟ ସ୍ଥିତିକୁ ଚାଲି ଯାଇଛି ବୋଲି ଆଇଏଟିଏର ଏସିଆ ପ୍ରଶାନ୍ତ ମହାସାଗରୀୟ କର୍ପୋରେଟ ବ୍ୟାପାର ସହକାରୀ ନିର୍ଦ୍ଦେଶକ ଏ.ଜୋଏଙ୍ଗ କହିଛନ୍ତି।
ବିମାନ କମ୍ପାନୀଗୁଡିକର ପରିଚାଳନାରେ ଯେଭଳି କୌଣସି ଅସୁବିଧା ନ ହୁଏ ସେ ପ୍ରସଙ୍ଗକୁ ଭାରତ ସରକାର ଧ୍ୟାନରେ ରଖିବାର ଆବଶ୍ୟକତା ରହିଛି । ଭାରତ ସରକାର ଆର୍ଥତ୍କ ସହାୟତା, ଋଣ ଯୋଗାଣ ଏବଂ ଋଣ ଗ୍ୟାରେଣ୍ଟି ଭଳି ପଦକ୍ଷେପ ନିଅନ୍ତୁ ବୋଲି ଜୋଏଙ୍ଗ ମତ ଦେଇଛନ୍ତି। କୋଭିଡ-୧୯ଲାଗି ସାରା ବିଶ୍ୱରେ ବିମାନଶିଳ୍ପକୁ ୩୧୪ ବିଲିୟନ ଡଲାରର କ୍ଷତି ସହିବାକୁ ପଡିବ। ଏହାବାଦ ଯାତ୍ରୀ ଚାହିଦା ୪୮% ଖସିବ ବୋଲି ସେ ଆଶଙ୍କା କରିଛନ୍ତି।
