ବାରିପଦା ଅଫିସ,୨୦ା୨- ମୟୂରଭଞ୍ଜ ଜିଲା ବାରିପଦା ସର୍କଲ-୧ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରୁ ବୁଧବାର ରାତିରେ ଜଣେ ନକଲି ଆର୍ଆଇଙ୍କୁ ଟାଉନ ଥାନା ପୋଲିସ କାବୁ କରିଛି। ତାଙ୍କୁ ଥାନାରେ ଅଟକ ରଖି ପୋଲିସ ପଚରା ଉଚରା ଜାରି ରଖିଛି।
ପୋଲିସ ସୂଚନା ଅନୁଯାୟୀ, ରାତି ୮ଟା ବେଳେ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ସାମ୍ନାପଟ ବନ୍ଦ ଥିବା ବେଳେ ପଛ ପଟ ଦ୍ୱାର ଖୋଲି ଜଣେ ବ୍ୟକ୍ତି ଭିତରେ ପ୍ରବେଶ କରିଥିଲେ। ସେ ନିଜକୁ ଆରଆଇ ବୋଲି ପରିଚୟ ଦେଇ ସର୍କଲ-୧ ଆରଆଇଙ୍କ ସିଟ୍ରେ ବସି ସ୍ଥାନୀୟ ଜଣେ ବ୍ୟକ୍ତିଙ୍କୁ ଉତ୍ତରାଧିକାରୀ ପ୍ରମାଣପତ୍ର ଦେବା ପାଇଁ କାଗଜପତ୍ର ପ୍ରସ୍ତୁତ କରୁଥିଲେ। ତେବେ ବାରିପଦା ଟାଉନଥାନା ପୋଲିସ କୌଣସି ସୂତ୍ରରୁ ଖବର ପାଇ ସେଠାରେ ଚଢାଉ କରି ସମ୍ପୃକ୍ତ ବ୍ୟକ୍ତିଙ୍କୁ କାବୁ କରି ଥାନାକୁ ଧରି ଆଣିଥିଲେ। ଧରା ପଡ଼ିଥିବା ନକଲି ଆରଆଇଙ୍କଠାରୁ ପୋଲିସ ୨ଟି ଲାପ୍ଟପ ଓ ସେ ବ୍ୟବହାର କରିଥିବା ବାଇକ୍ ଜବତ କରିଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଥାନା ଅଧିକାରୀ ବୀରେନ୍ଦ୍ର ସେନାପତି କହିଛନ୍ତି।
