ବ୍ରହ୍ମପୁର ଅଫିସ,୧୫ା୮-ବ୍ରହ୍ମପୁର ଉପକଣ୍ଠ ହଳଦିଆପଦରରେ ନିର୍ମିତ ନୂତନ ବସ୍ ଟର୍ମିନାଲ ଉଦ୍ଘାଟନକୁ ୩ ବର୍ଷରୁ ଊର୍ଦ୍ଧ୍ୱ ସମୟ ବିତିଛି ା ତଥାପି ଟର୍ମିନାଲରୁ ବସ୍ ଚଳାଚଳ ତଥା କାର୍ଯ୍ୟକ୍ଷମ କରିବାରେ ପ୍ରଶାସନ ବିଫଳ ହୋଇଛି ା ବାରମ୍ବାର ବୈଠକ ବସୁଥିଲେ ମଧ୍ୟ ସମାଧାନର ରାସ୍ତା ବାହାରି ପାରୁନାହିଁ ା ଏନେଇ ବିଡିଏ ସମ୍ମିଳନୀ କକ୍ଷରେ ପ୍ରଶାସନିକ ଅଧିକାରୀ ଓ ବସ୍ମାଲିକ ସଂଘ କର୍ମକର୍ତ୍ତାଙ୍କ ମଧ୍ୟରେ ଜୁଲାଇ ୧୬ରେ ଆଲୋଚନା ହୋଇଥିବା ବେଳେ ବୁଧବାର ପୁଣି ଏକ ଆଲୋଚନା ବୈଠକ ସର୍କିଟ ହାଉସ୍ରେ ଅନୁଷ୍ଠିତ ହୋଇଥିଲା ା ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ ପଣ୍ଡା ଘରୋଇ ବସ ମାଲିକ ସଂଘ ସହ ବସ୍ଷ୍ଟାଣ୍ଡ ସ୍ଥାନାନ୍ତରରେ ରହିଥିବା ବିଭିନ୍ନ ସମସ୍ୟା ଉପରେ ଆଲୋଚନା କରିଥିଲେ। ପୂର୍ବ ବୈଠକରେ ପ୍ରଥମେ ସରକାରୀ ବସ୍ ତଥା ଓଏସ୍ଆରଟିସି ଓ ଇଣ୍ଟର ଷ୍ଟେଟ ବସ୍ଗୁଡିକୁ ଟର୍ମିନାଲରୁ ଚଳାଚଳ ଆରମ୍ଭ କରିବାକୁ ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଥିଲା ା କିନ୍ତୁ ତାହା ଏଯାଏ କାର୍ଯ୍ୟକାରୀ ହୋଇ ନ ଥିବା ସଂଘ କର୍ମକର୍ତ୍ତାମାନେ ଅଭିଯୋଗ କରିଥିଲେ ା ବସ୍ମାଲିକଙ୍କ ସହ ଆଲୋଚନା ବିନା ହଳଦିଆପଦରରେ ଟର୍ମିନାଲ ନିର୍ମାଣ ସହ ଉଦ୍ଘାଟନ କରାଯାଇଛି ା ଏହା ବ୍ୟତୀତ ନୂତନ ଟର୍ମିନାଲକୁ ବସ୍ଯାତାୟାତ କରିବାକୁ ମୌଳିକ ସୁବିଧା ନ ଥିବା ସଂଘ କର୍ମକର୍ତ୍ତାମାନେ ବିଧାୟକ, ଏମ୍ପିଙ୍କୁ ଅବଗତ କରାଇଥିଲେ ା ସଂଘ ପକ୍ଷରୁ ବହୁବାର ଟର୍ମିନାଲକୁ ବସ୍ ଚଳାଚଳ ନିମିତ୍ତ ଫ୍ଲାଏ ଓଭର ତଥା ଅଣ୍ଡରପାସ୍ କରିବାକୁ ଦାବି କରାଯାଇଥିଲେ ମଧ୍ୟ ଏଯାଏ ନିର୍ମାଣ ହୋଇ ନାହିଁ। ଯାତାୟାତ ନିମିତ୍ତ ରାସ୍ତା ସୁବିଧା ନ ହେବା ପର୍ଯ୍ୟନ୍ତ ଘରୋଇ ବସ୍ ନୂତନ ଟର୍ମିନାଲକୁ ଯାତାୟାତ କରିବା ଅସମ୍ଭବ ବୋଲି ସଂଘ ପକ୍ଷରୁ ସ୍ପଷ୍ଟ କରାଯାଇଥିଲା ା ହଳଦିଆପଦର ନୂତନ ସିଟି ବସ୍ଷ୍ଟାଣ୍ଡକୁ ସହର ମଧ୍ୟଦେଇ ଆଞ୍ଚଳିକ ବସ୍ଗୁଡିକୁ ଯାତାୟାତ କରିବାକୁ ଲାଗୁଥିବା ଅଧିକ ସମୟ ଏବଂ ସେହି ସମୟରେ ସୃଷ୍ଟି ହେବାକୁ ଥିବା ଟ୍ରାଫିକ ସମସ୍ୟା ସମାଧାନ ନେଇ ମଧ୍ୟ ଏଯାଏ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ସେମାନେ କହିଥିଲେ ା ଏଥିସହ ବର୍ତ୍ତମାନ କାର୍ଯ୍ୟକ୍ଷମ ହେଉଥିବା ସିଟି ବସ୍ଷ୍ଟାଣ୍ଡରେ ମଧ୍ୟ ଥିବା ବିିଭିନ୍ନ ସମସ୍ୟା ଉପରେ ବସ୍ ମାଲିକମାନେ କହିଥିଲେ ା ବର୍ତ୍ତମାନର ସିଟି ବସ୍ଷ୍ଟାଣ୍ଡ ଦୀର୍ଘ ୬ ମାସ ଧରି ଅନ୍ଧକାର ମଧ୍ୟରେ ରହିଛି ା ଏଥିସହ ଷ୍ଟାଣ୍ଡରେ ଯାତ୍ରୀଙ୍କ ଆନୁଷଙ୍ଗିକ ସୁବିଧା ନ ଥିବା ସେମାନେ ସୂଚାଇଥିଲେ ା କେବଳ ଆଲୋଚନା ନ କରି ଏହାର ସମାଧାନର ରାସ୍ତା ବାହାର କରିବାକୁ ମାଲିକମାନେ ଯୁକ୍ତି ବାଡିଥିଲେ ା ବୈଠକରେ ବିଜେଡି ଜିଲା ଉପସଭାପତି ସଞ୍ଜିତ କୁମାର ପାଣିଗ୍ରାହୀଙ୍କ ସମେତ ଗଞ୍ଜାମ ଜିଲା ବସ୍ମାଲିକ ସଂଘର ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ ା
