ରତ୍ନଗିରି, ୧୨।୫(ଡି.ଏନ୍.ଏ.): ଯାଜପୁର ଜିଲା ବରୀରେ ମଙ୍ଗଳବାର ୨ ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଏହି ଦୁଇ ସଂକ୍ରମିତଙ୍କ ମଧ୍ୟରେ ରହିଛନ୍ତି ୪୫ ବର୍ଷୀୟ ପୁରୁଷ ଏବଂ ତାଙ୍କ ୧୨ ବର୍ଷୀୟ ଝିଅ। ଆକ୍ରାନ୍ତମାନେ ଚନ୍ଦନପୁର ପଞ୍ଚାୟତ ଅଞ୍ଚଳର ବୋଲି ଜଣାପଡିଛି।
ସୂଚନାନୁଯାୟୀ, ଆକ୍ରାନ୍ତମାନେ ଏକ କାରରେ ସପରିବାର କୋଲକାତାରୁ ଆସିଥିଲେ। ଗତ ୮ ତାରିଖରେ ଚନ୍ଦନପୁର ଅଞ୍ଚଳରେ ଥିବା ନିଜ ଗାଁରେ ପହଞ୍ଚିଥିଲେ। ସେମାନେ ଆସିବା ପୂର୍ବରୁ ନିଜକୁ ପଞ୍ଜିକୃତ କରିଥିବାରୁ ସ୍ଥାନୀୟ ସରପଞ୍ଚ କେଦାର ସାମଲ ତାଙ୍କୁ ସେହି ପଞ୍ଚାୟତର ମିର୍ଜାପୁର ୟୁ.ଜି.ଏମ୍ ସ୍କୁଲରେ ଥିବା କ୍ୱାରାଣ୍ଟାଇନ୍ ସେଣ୍ଟରରେ ରଖିବାର ବ୍ୟବସ୍ଥା କରିଥିଲେ। ଗତ ୯ ତାରିଖରେ ପରିବାରର ସମସ୍ତଙ୍କ ସ୍ବାବ୍ ସଂଗ୍ରହ କରାଯାଇ ଜିଲା ସ୍ବାସ୍ଥ୍ୟ ବିଭାଗ ତରଫରୁ ପରୀକ୍ଷାଗାରକୁ ପଠାଯାଇଥିଲା। ମଙ୍ଗଳବାର ବାପା ଓ ଝିଅଙ୍କ ସ୍ବାବ ନମୂନା ପଜିଟିଭ ଆସିବା ପରେ ବରୀ ସ୍ବାସ୍ଥ୍ୟ ବିଭାଗ ଓ ପ୍ରଶାସନ ତରଫରୁ ତତ୍ପରତା ପ୍ରକାଶ ପାଇଥିଲା। ବରୀ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଭାରପ୍ରାପ୍ତ ଅଧିକାରୀ ଡ. କୌଶିକ ପାତ୍ର, ବରୀ ଥାନା ଅଧିକାରୀ ମାର୍କଣ୍ଡ ଚନ୍ଦ୍ର ମିଶ୍ର, ବରୀ ତହସିଲଦାର ସରୋଜକାନ୍ତ ନାୟକ, ବରୀ ଭାରପ୍ରାପ୍ତ ବିଡିଓ ଶାଶ୍ୱତ ଜେନା, ସ୍ବାସ୍ଥ୍ୟ କର୍ମୀ ପ୍ରଶୋଲ କୁମାର ସ୍ବାଇଁ ଘଟଣାସ୍ଥଳରେ ପହଞ୍ଚି ସଂକ୍ରମିତଙ୍କୁ କଳିଙ୍ଗନଗର ଟାଟା କୋଭିଡ୍ ହସ୍ପିଟାଲକୁ ପଠାଇଥିବା ବୋଲି ଡ଼.କୌଶିକ ପାତ୍ର ସୂଚନା ଦେଇଛନ୍ତି।
ପ୍ରକାଶଯୋଗ୍ୟ, ପୂର୍ବରୁ ବରୀ ବ୍ଲକରେ ୪ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି। ଏହାକୁ ନେଇ ଲୋକେ ଆତଙ୍କିତ ଥିବା ବେଳେ ପୁନଶ୍ଚ ଚନ୍ଦନପୁର ପଞ୍ଚାୟତରେ ୨ ଆକ୍ରାନ୍ତ ଚିହ୍ନଟ ହେବା ଘଟଣା ଘଟିଛି। ଏହା ପ୍ରଶାସନର ମୁଣ୍ଡ ବ୍ୟଥାର କାରଣ ମଧ୍ୟ ପାଲଟିଛି।
