ଭୁବନେଶ୍ୱର,୨୫ା୨(ବ୍ୟୁରେ।): ଓଡ଼ିଶା ପାଲଟିଛି ବ୍ରାଉନସୁଗାର କାରବାରର ଗନ୍ତାଘର। ଯେତେ ଜବତ ହେଉଛି, ସେତେ ବାହାରୁଛି। ବିଶେଷକରି ବାଂଲାଦେଶ ଓ କଲିକତାରୁ ଓଡ଼ିଶା ଆସୁଥିବା ଏହି ବ୍ରାଉନସୁଗାରର ବଡ଼ ବଜାର ପାଲଟିଛି ରାଜଧାନୀ ଭୁବନେଶ୍ୱର। ଇତିମଧ୍ୟରେ ବହୁ ହୋଲ୍ସେଲର, ଡିଲରଙ୍କଠାରୁ ଆରମ୍ଭ କରି ଏଜେଣ୍ଟ, ଦଲାଲ ଓ ଖୁଚୁରା ବେପାରୀ ଭୁବନେଶ୍ୱରକୁ ଆସି କ୍ରାଇମବ୍ରାଞ୍ଚ ଏସ୍ଟିଏଫ୍ ଏବଂ କମିଶନରେଟ ପୋଲିସ ହାତରେ ଧରାପଡିଥିଲେ ମଧ୍ୟ ଏହି ବେଆଇନ ବେପାର ବନ୍ଦ ହେବାର ନାଁ ଧରୁନି। ସୋମବାର ଏସ୍ଟିଏଫ୍ ବରମୁଣ୍ଡାରୁ ୬ ପ୍ୟାକେଟରେ ଥିବା ୪୦୫ ଗ୍ରାମ ବ୍ରାଉନସୁଗାର ଜବତ କରିଛି। ଏହାର ବଜାର ମୂଲ୍ୟ ପ୍ରାୟ ଅଧକୋଟି ହେବ। ତେବେ ଏହାକୁ ଚୋରା ଚାଲାଣ କରୁଥିବା ବାଲେଶ୍ୱରର ଦୁଇଜଣ ବ୍ରାଉନସୁଗାର ଡିଲରଙ୍କୁ ମଧ୍ୟ ଏସ୍ଟିଏଫ୍ ଗିରଫ କରିଛି। ସେମାନେ ହେଲେ ବାଲେଶ୍ୱର ଜିଲା ସହଦେବଖୁଣ୍ଡା ଗଳାପୋଲ ଅଞ୍ଚଳର ସେକ୍ ସାରୁକ୍ ଓ ସୁନହଟ ଅଞ୍ଚଳର ସଞ୍ଜୀବ କୁମାର ଦେହୁରୀ। ଦଫା ୨୧(ସି)୨୯ ଏନ୍ଡିପିଏସ୍ରେ ମାମଲା (ନଂ.୧୪/୨୦) ରୁଜୁ କରାଯାଇ ସେମାନଙ୍କୁ କୋର୍ଟ ଚାଲାଣ କରାଯାଇଥିବା ଏସ୍ଟିଏଫ୍ ଏଡିଜି ସୌମେନ୍ଦ୍ର ପ୍ରିୟଦର୍ଶୀ ସୋମବାର ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
କିଭଳି ଥିଲା ଏସ୍ଟିଏଫ୍ ଅପରେଶନ
କିଛି ମାସ ହେବ ବ୍ରାଉନସୁଗାର କାରବାର ଉପରେ ପୂରା ନଜର ରଖିଛି କ୍ରାଇମବ୍ରାଞ୍ଚ ଏସ୍ଟିଏଫ୍। ସୁରାକ ପାଇବାମାତ୍ରେ ଯୋଜନା କରି ଧରୁଛି। ଇତିମଧ୍ୟରେ ବହୁ ଅନ୍ତର୍ଜାତୀୟ ବ୍ରାଉନ୍ସୁଗାର ମାଫିଆ, ହୋଲ୍ସେଲରଙ୍କଠାରୁ ଛୋଟ ବେପାରୀ ଏସ୍ଟିଏଫ୍ ଜାଲରେ ଫସିଛନ୍ତି। ସେମାନଙ୍କୁ ପଚରାଉଚରା କରି ଅନ୍ୟମାନଙ୍କୁ ଖୋଜି ବାହାର କରୁଛି। ରବିବାର ଗିରଫ ସାରୁକ୍ ଓ ସଞ୍ଜୀବଙ୍କ ସମ୍ପର୍କରେ ଏସ୍ଟିଏଫ୍କୁ ପୂର୍ବରୁ ସୂଚନା ମିଳିଥିଲା। ସେମାନେ ହେଉଛନ୍ତି କୋଲକାତା, ଖଡ଼ଗପୁର, ମୁର୍ସିଦାବାଦ ଓ ଓଡ଼ିଶାର ଜଳେଶ୍ୱରରେ ଥିବା ହୋଲ୍ସେଲରଙ୍କଠାରୁ ବ୍ରାଉନସୁଗାର ଆଣି ଡିଲରଶିପ୍ କରନ୍ତି। ସେମାନଙ୍କ ପାଖରୁ ଓଡ଼ିଶାର ବିଭିନ୍ନ ଅଞ୍ଚଳରେ ଥିବା ସବ୍ଡିଲର ଓ ଏଜେଣ୍ଟମାନେ ବ୍ରାଉନସୁଗାର ଆଣି ଖୁଚୁରା ବେପାରୀଙ୍କୁ ଦେଇଥାନ୍ତି। କିନ୍ତୁ କିଛିଦିନ ହେବ ଏସ୍ଟିଏଫ୍ ଓ ପୋଲିସର ଧରାପଗଡ଼ ଚାଲିଥିବାରୁ ବିଶେଷକରି ସବ୍ଡିଲର ଓ ଏଜେଣ୍ଟମାନେ ସେମାନଙ୍କ ନିକଟକୁ ଯିବାକୁ ଭୟ କରୁଛନ୍ତି। ତେଣୁ ସେମାନେ ନିଜେ ବସ୍, ବାଇକ୍ ଓ ଟ୍ରେନ୍ରେ ଆସି ବ୍ରାଉନସୁଗାର ପହଞ୍ଚାଉଛନ୍ତି। ସାରୁକ୍ ଓ ସଞ୍ଜୀବ କୋଲକାତାର ଜଣେ ହୋଲ୍ସେଲରଙ୍କଠାରୁ ବ୍ରାଉନସୁଗାର ଆଣି ବସ୍ରେ ଭୁବନେଶ୍ୱର ଆସୁଥିବା ନେଇ ସୂଚନା ପାଇବା ପରେ ଏସ୍ଟିଏଫ୍ ଟିମ୍ ବରମୁଣ୍ଡା ସମେତ ଆଉ କେତେକ ସ୍ଥାନରେ ଜଗି ରହିଥିଲା। ସେମାନେ ବସ୍ଷ୍ଟାଣ୍ଡରେ ପହଞ୍ଚତ୍ ବାହାରକୁ ଆସି ପେଟ୍ରୋଲପମ୍ପ୍ ନିକଟରେ ବେପାରୀଙ୍କୁ ଅପେକ୍ଷା କରିଥିବାବେଳେ ଏସ୍ଟିଏଫ୍ ଅଧିକାରୀମାନେ ଘେରିଯାଇ କାବୁ କରିନେଇଥିଲେ। ଯାଞ୍ଚ କରିବାରୁ ସେମାନଙ୍କ ପକେଟରୁ ୭ ବ୍ରାଉନସୁଗାର ପ୍ୟାକେଟ ମିଳିଥିଲା।
