ଭୁବନେଶ୍ୱର,୧୪।୨(ବ୍ୟୁରୋ): କେନ୍ଦ୍ର ସରକାର ଗତ ୧ ଜାନୁୟାରୀ ୨୦୧୬ରୁ ସରକାରୀ କର୍ମଚାରୀଙ୍କ ପାଇଁ ୭ମ ବେତନ କମିଶନ ଲାଗୁ କରିଥିଲେ, ଯାହା ଓଡ଼ିଶା ସରକାର ସେପ୍ଟେମ୍ବର ୨୦୧୭ରେ ଘୋଷଣା କରି ପିଛିଲା ଭାବେ ୧ ଜାନୁୟାରୀ ୨୦୧୬ରୁ ଲାଗୁ କରାଯିବା ନେଇ କହିଥିଲେ। ତେବେ ୨୦୧୬ ଜାନୁୟାରୀରୁ ଘୋଷଣା କରାଯାଇଥିବା ତାରିଖ ମଧ୍ୟରେ ରାଜ୍ୟ ସରକାରଙ୍କ କର୍ମଚାରୀ ପାଇବାକୁ ଥିବା ଏରିୟର ବାବଦ ଅର୍ଥରୁ ମାତ୍ର ୪୦ ପ୍ରତିଶତ ପାଇଥିଲେ। ବାକି ୬୦ ପ୍ରତିଶତ ଏରିୟର ଏପର୍ଯ୍ୟନ୍ତ ପ୍ରଦାନ କରି ନ ଥିଲେ। ମାତ୍ର ଗୁରୁବାର ରାଜ୍ୟ ସରକାର ସମସ୍ତ ବିଭାଗର ମୁଖ୍ୟ ଏବଂ ଜିଲାପାଳମାନଙ୍କୁ ଚିଠି ଲେଖି କର୍ମଚାରୀମାନେ ପାଇବାକୁ ଥିବା ୬୦ ପ୍ରତିଶତ ବକେୟା ଦରମାରୁ ୧୦ ପ୍ରତିଶତ ପ୍ରଦାନ କରିବା ପାଇଁ ଘୋଷଣା କରିଛନ୍ତି। ପୂର୍ବରୁ ସରକାରୀ କର୍ମଚାରୀ ୪୦ ପ୍ରତିଶତ ଏରିୟର ଟଙ୍କା ନେବା ସମୟରେ ରହିଥିବା ନିୟମ ଓ ସର୍ତ୍ତାବଳୀ ଅନୁଯାୟୀ ଏଥର ମଧ୍ୟ ସମାନ ନିୟମ ରହିବ। ୧୦ ପ୍ରତିଶତ ଏରିୟର ଅର୍ଥ ନେବା ସମୟରେ ସେହି ନିୟମ ଓ ସର୍ତ୍ତାବଳୀ ଅନୁସାରେ ଟଙ୍କା ନେବେ। ଏହାସହ ଯେଉଁମାନେ ୪୦ ପ୍ରତିଶତ ବକେୟା ଦରମା ପୂର୍ବରୁ ନେଇଥିବେ ସେହି କର୍ମଚାରୀମାନେ ହିଁ ବର୍ତ୍ତମାନ ଘୋଷଣା କରାଯାଇଥିବା ୧୦ ପ୍ରତିଶତ ଅର୍ଥ ଉଠାଇ ପାରିବେ। ଏହାସହ ଇଞ୍ଜିନିୟରିଂ ବିଭାଗରେ କାର୍ଯ୍ୟରତ ଥିବା ଓ୍ବାର୍କଚାର୍ଜଡ କର୍ମଚାରୀମାନେ ମଧ୍ୟ ୧୦ ପ୍ରତିଶତ ଏରିୟର ଅର୍ଥ ଉଠାଇପାରିବେ ବୋଲି ସରକାର ଘୋଷଣା କରିଛନ୍ତି। ମାର୍ଚ୍ଚ ୨୦ ସୁଦ୍ଧା କର୍ମଚାରୀମାନଙ୍କୁ ଏହି ଅର୍ଥ ପ୍ରଦାନ କାର୍ଯ୍ୟ ଶେଷ କରିଦେବା ପାଇଁ ନିର୍ଦ୍ଦେଶ ଦିଆଯାଇଛି। ଅନ୍ୟପଟେ କେତେଜଣ ସରକାରୀ କର୍ମଚାରୀ ଏଭଳି ନିଷ୍ପତ୍ତିକୁ ନିନ୍ଦା କରିଛନ୍ତି। ସେମାନଙ୍କ କହିବାନୁଯାୟୀ, ୬୦ ପ୍ରତିଶତବକେୟା ଦରମା ଚାରିବର୍ଷ ଧରି ବାକି ରଖିବାପରେ ସେଥିରୁ ମାତ୍ର ୧୦ ପ୍ରତିଶତ ଦେବା ନିନ୍ଦନୀୟ ଘଟଣା। ଯଦି ସରକାରଙ୍କ ପାଖରେ ଦରମା ଏବଂ ମହଙ୍ଗା ଭତ୍ତା ଦେବାକୁ ଅର୍ଥର ଅଭାବ ରହିଛି, ତେବେ ଏହି ରାଶି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ନେଇଯାଆନ୍ତୁ ବୋଲି କର୍ମଚାରୀମାନେ କହିଛନ୍ତି।
