ପ୍ୟାରିସ୍, ୧।୬-ପୂର୍ବତନ ଚାମ୍ପିୟନ ରୋଜର ଫେଡରର ଓ ରାଫାଲ ନାଡାଲ ଉଭୟେ ରେକର୍ଡ ୧୪ତମ ଥର ପାଇଁ ଫ୍ରେଞ୍ଚ୍ ଓପନ ପୁରୁଷ ସିଙ୍ଗଲ୍ସ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି। ପ୍ୟାରିସରେ ସର୍ବାଧିକ ଥର ଚତୁର୍ଥ ରାଉଣ୍ଡରେ ପ୍ରବେଶ କରି ରେକର୍ଡ ପ୍ରତିଷ୍ଠା କରିଥିବା ପୂର୍ବତନ ବିଶ୍ୱର ନମ୍ବର ଓ୍ବାନ ଖେଳାଳି ଆମେରିକାର ବଜ୍ ପ୍ୟାଟିଙ୍କ ରେକର୍ଡକୁ ଭଙ୍ଗ କରିଦେଇଛନ୍ତି। ଫେଡରର ଶୁକ୍ରବାର ନରଓ୍ବେରେ କାସ୍ପର ରୁଡ୍ଙ୍କୁ ୬-୩, ୬-୧, ୭-୬ (୧୦-୮) ସେଟ୍ରେ ହରାଇ ଦେଇଛନ୍ତି। ଏହା ଦ୍ୱାରା ସେ ଇତିହାସରେ ପ୍ରଥମ ଖେଳାଳି ଭାବେ ୪୦୦ ଗ୍ରାଣ୍ଡସ୍ଲାମ ମ୍ୟାଚ ଖେଳିବାର ଗୌରବ ଅର୍ଜନ କରିଛନ୍ତି। କେବଳ ସେତିକି ନୁହେଁ, ୩୭ ବର୍ଷୀୟ ଫେଡରର ୧୯୯୧ ପରେ ସବୁଠାରୁ ବୟସ୍କ ଖେଳାଳି ହିସାବରେ ଏକ ଗ୍ରାଣ୍ଡସ୍ଲାମରେ ଚତୁର୍ଥ ରାଉଣ୍ଡକୁ ଉନ୍ନୀତ ହୋଇପାରିଛନ୍ତି। ପୂର୍ବରୁ ୧୯୯୧ରେ ଜିମ୍ମି କନ୍ନର୍ସ ୩୯ ବର୍ଷ ବୟସରେ ୟୁଏସ ଓପନ୍ରେ ଏହି ପର୍ଯ୍ୟାୟରେ ପ୍ରବେଶ କରିପାରିଥିଲେ। ଏହାଛଡ଼ା ୨୦ଥର ଗ୍ରାଣ୍ଡସ୍ଲାମ ଚାମ୍ପିୟନ ଫେଡରର ପ୍ରଥମ ଖେଳାଳି ହିସାବରେ ଫ୍ରେଞ୍ଚ ଓପନରେ ୧୪ଥର ଚତୁର୍ଥ ରାଉଣ୍ଡକୁ ଉନ୍ନୀତ ହୋଇ ପାରିଛନ୍ତି। ନାଡାଲ ୨୭ତମ ସିଡ୍ ତଥା ବେଲଜିୟମର ଡେଭିଡ ଗଫିନଙ୍କୁ ୬-୧, ୬-୩, ୪-୬, ୬-୩ ସେଟ୍ରେ ହରାଇ ଦେଇଛନ୍ତି।
