ସିନସିନାଟି,୧୪।୮(ଏଏଫ୍ପି)- ଓ୍ବିମ୍ବେଲଡନ ଓପନ ଫାଇନାଲ ପରେ କିମ୍ବଦନ୍ତୀ ପୁରୁଷ ସିଙ୍ଗଲ୍ସ ଟେନିସ ଖେଳାଳି ରୋଜର ଫେଡରର ଓ ଶୀର୍ଷ ର଼୍ୟାଙ୍କଧାରୀ ନୋଭାକ ଜୋକୋଭିଚ୍ କୋର୍ଟକୁ ବିଜୟ ସହ ଫେରିଛନ୍ତି। ଦୁଇ ତାରକା ଖେଳାଳି ସିନସିନାଟି ମାଷ୍ଟର୍ସରେ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ୩ୟ ସିଡ୍ ତଥା ୭ ଥର ଚାମ୍ପିୟନ ଫେଡରର ୬-୩, ୬-୪ ସେଟ୍ରେ ଆର୍ଜେଣ୍ଟିନାର ଜୁଆନ ଲୋଣ୍ଡେରୋଙ୍କୁ ପରାସ୍ତ କରି ଦ୍ୱିତୀୟ ରାଉଣ୍ଡରେ ସ୍ଥାନ ପକ୍କା କରିଛନ୍ତି। ଡିଫେଣ୍ଡିଂ ଚାମ୍ପିୟନ ଜୋକୋଭିଚ୍ ଆମେରିକାର ସାମ କୁରେଙ୍କୁ ୭-୫, ୬-୧ ବ୍ୟବଧାନରେ ହରାଇ ଦେଇଛନ୍ତି। ଅନ୍ୟପକ୍ଷରେ ସେରେନା ଓ୍ବିଲିୟମ୍ସ ପିଠି ଜନିତ ସମସ୍ୟା ଯୋଗୁ ଟୁର୍ନାମେଣ୍ଟରେ ନ ଖେଳିବାକୁ ନିଷ୍ପତ୍ତି ନେଇଛନ୍ତି। ସମାନ କାରଣରୁ ୨୩ ଥର ଗ୍ରାଣ୍ଡସ୍ଲାମ ଚାମ୍ପିୟନ ଟରୋଣ୍ଟୋ ଓପନ ଫାଇନାଲ ମ୍ୟାଚ୍ ମଝିରୁ ଓହରି ଯାଇଥିଲେ। ଏଥିଯୋଗୁ ୟୁଏସ୍ ଓପନରେ ତାଙ୍କ ଖେଳିବା ନେଇ ଅନିଶ୍ଚିତତା ସୃଷ୍ଟି ହୋଇଛି।
