ହାଇଦ୍ରାବାଦ,୨୧ା୭: ସ୍ଥାନୀୟ ଗୋଚିବାଓ୍ବଲି ଇନ୍ଡୋର ଷ୍ଟାଡ଼ିୟମରେ ପ୍ରୋ-କବାଡ଼ି ଲିଗ୍ର ସିଜନ-୭ ଶନିବରଠାରୁ ଆରମ୍ଭ ହୋଇଛି। ପ୍ରତିଯୋଗିତାର ଉଦ୍ଘାଟନୀ ମ୍ୟାଚରେ ୟୁ ମୁମ୍ବା ୬ ପଏଣ୍ଟରେ ତେଲଗୁ ଟାଇଟାନ୍ସକୁ ପରାସ୍ତ କରି ବିଜୟରୁ ଅଭିଯାନ ଆରମ୍ଭ କରିଛି। ଫାଜଲ ଆଟ୍ରାଚାଲିଙ୍କ ନେତୃତ୍ୱାଧୀନ ୟୁ ମୁମ୍ବା ମ୍ୟାଚରେ ଚମତ୍କାର ପ୍ରଦର୍ଶନ କରିଥିଲା। ଶେଷରେ ୟୁ ମୁମ୍ବା ଟିମ ୩୧-୨୫ ପଏଣ୍ଟରେ ତେଲଗୁ ଟାଇଟାନ୍ସକୁ ପରାସ୍ତ କରିବାରେ ସମର୍ଥ ହୋଇଥିଲା। ଅଭିଷେକ ସିଂ ଦଳ ଲାଗି ସର୍ବାଧିକ ୧୦ ପଏଣ୍ଟ ହାସଲ କରିଥିଲେ। ଅଭିଷେକ ସମସ୍ତ ପଏଣ୍ଟ୍ ରେଡ୍ କରି ହାସଲ କରିଥିଲେ। ଅନ୍ୟପକ୍ଷରେ ଗତଥର ୟୁ ମୁମ୍ବାରୁ ଖେଳୁ ଥିବା ସିଦ୍ଧାର୍ଥ ଦେଶାଇ ଚଳିତ ଥର ତେଲଗୁ ଟାଇଟାନ୍ସ ପକ୍ଷରୁ ଖେଳିଥିଲେ ମଧ୍ୟ ପ୍ରଭାବୀ ପ୍ରଦର୍ଶନ କରିପାରି ନ ଥିଲେ। ପ୍ରତିଯୋଗିତାର ଦ୍ୱିତୀୟ ମ୍ୟାଚରେ ଡିଫେଣ୍ଡିଂ ଚାମ୍ପିୟନ ବେଙ୍ଗାଲୁରୁ ବୁଲ୍ସ ପାଟନା ପିରାଟିଜକୁ ମାତ୍ର ୨ ପଏଣ୍ଟରେ ପରାସ୍ତ କରିଛି। ଉଭୟ ଦଳ ମଧ୍ୟରେ ମ୍ୟାଚ ସଂଘର୍ଷପୂର୍ଣ୍ଣ ହୋଇଥିଲା। ତେବେ ବେଙ୍ଗାଲୁରୁ ୩୪-୩୨ ପଏଣ୍ଟ୍ରେ ବିଜୟୀ ହୋଇଥିଲା। ବେଙ୍ଗାଲୁରୁ ପକ୍ଷରୁ ପଓ୍ବନ କୁମାର ଓ ପାଟନା ପକ୍ଷରୁ ପ୍ରଦୀପ ନରଓ୍ବାଲ ଦଳ ଲାଗି ୧୦-୧୦ ପଏଣ୍ଟ ଅର୍ଜନ କରିଥିଲେ।
