ବଅଁରପାଳ,୧୯ା୫(ଡି.ଏନ.ଏ.)- କେନ୍ଦ୍ର ସରକାରଙ୍କ ପକ୍ଷରୁ କାର୍ଯ୍ୟକାରୀ ହେଉଥିବା ଗ୍ରାମ୍ୟ ବିଦ୍ୟୁତୀକରଣ ଯୋଜନା ଅନେକ ସ୍ଥାନରେ ପ୍ରହସନରେ ପରିଣତ ହୋଇଛି। ଫଳରେ ବହୁ ଗରିବ ଜନସାଧାରଣ ଏହାର ସୁଫଳ ପାଇପାରୁ ନାହାନ୍ତି। ବଅଁରପାଳ ବ୍ଲକ ତୁରଙ୍ଗ ଅଞ୍ଚଳକୁ ଏହାର ଉଦାହରଣ ବୋଲି କୁହାଯାଉଛି।
କେନ୍ଦ୍ର ସରକାରଙ୍କ ଯୋଜନା ଅନୁଯାୟୀ ଦାରିଦ୍ର୍ୟ ସୀମାରେଖା ତଳେ ବସବାସ କରୁଥିବା ପରିବାରକୁ ରିହାତିରେ ବିଦ୍ୟୁତ୍ ଯୋଗାଇ ଦିଆଯିବା କଥା। ମାତ୍ର ତୁରଙ୍ଗରେ ଉକ୍ତ ଯୋଜନା ଠିକ୍ ଭାବେ କାର୍ଯ୍ୟକାରୀ ହୋଇପାରି ନାହଁି। ଦୀର୍ଘ ୧ ବର୍ଷରୁ ଊର୍ଦ୍ଧ୍ୱ ହେଲା ତୁରଙ୍ଗ ଗୋଚ୍ଛାୟତ ସାହିର ୨୦ରୁ ଊର୍ଦ୍ଧ୍ୱ ବିପିଏଲ ହିତାଧିକାରୀଙ୍କ ଘରେ ମିଟର ବସିବା ସହ ଓ୍ବେୟାରିଂ କରାଯାଇଛି। ହେଲେ ଆଜି ପର୍ଯ୍ୟନ୍ତ ସେମାନଙ୍କ ଘରକୁ ବିଦ୍ୟୁତ୍ ସଂଯୋଗ ଦିଆଯାଇ ନାହିଁ। ଫଳରେ ବହୁ ହିତାଧିକାରୀ ଅସନ୍ତୋଷ ପ୍ରକାଶ କରିଛନ୍ତି। ଏ ପର୍ଯ୍ୟନ୍ତ ଯୋଜନା କାର୍ଯ୍ୟକାରୀ ହୋଇ ନ ଥିବାରୁ କେତେଜଣଙ୍କ ମିଟର ଓ ଓ୍ବେୟାରିଂ ନଷ୍ଟ ହେବାକୁ ବସିଲାଣି। ତୁରନ୍ତ ସମ୍ପୃକ୍ତ ହିତାଧିକାରୀଙ୍କୁ ବିଦ୍ୟୁତ୍ ଯୋଗାଇ ଦେବା ପାଇଁ ବିପିଏଲ୍ଧାରୀମାନେ ଦାବି କରି ଆସୁଥିଲେ ସୁଦ୍ଧା କର୍ତ୍ତୃପକ୍ଷ କୌଣସି ପଦକ୍ଷେପ ନେଉ ନାହାନ୍ତି। ଏ ସମ୍ପର୍କରେ ସାହିର ସୂର୍ଯ୍ୟ ଗୋଛାୟତ, ବିଜୁ ଗୋଚ୍ଛାୟତ, ସନ୍ତୋଷ ଗୋଚ୍ଛାୟତ ପ୍ରମୁଖ କହିଛନ୍ତି, ବର୍ଷେ ହେଲା ଘରେ ସରକାରଙ୍କ ପକ୍ଷରୁ ବିଦ୍ୟୁତ୍ ତାର ଟଣାଯାଇଛି। ମାତ୍ର କେବେ ସଂଯୋଗ ହେବ ତାହାର ଠିକଣା ନାହିଁ। ଏ ନେଇ ଆମେ ଖୁବ୍ଶୀଘ୍ର ପୁଣି ପ୍ରଶାସନର ଦ୍ୱାରସ୍ଥ ହେବୁ ବୋଲି କହିଛନ୍ତି।
