ମୁମ୍ବାଇ,୩୧।୮: ଆଉ କିଛି ମାସରେ ଗୁଜରାଟର ଆର୍ଥିକ ରାଜଧାନୀ ଅହମ୍ମଦାବାଦଠାରେ ରାଜ୍ୟର ନୂଆ କ୍ରିକେଟ ଷ୍ଟାଡିୟମ ଉଦ୍ଘାଟିତ ହେବ। ୧ ଲକ୍ଷ ୧୦ ହଜାର ଦର୍ଶକ କ୍ଷମତା ବିଶିଷ୍ଟ ଷ୍ଟାଡିୟମ ନିର୍ମାଣ କାର୍ଯ୍ୟ ଚଳିତ ବର୍ଷ ଡିସେମ୍ବର ଓ ୨୦୨୦, ଜାନୁୟାରୀ ମଧ୍ୟରେ ଶେଷ ହେବ। ଏହା ୫୦ ହଜାର କ୍ଷମତା ବିଶିଷ୍ଟ ସର୍ଦ୍ଦାର ବଲଭଭାଇ ପଟେଲ ଷ୍ଟାଡିୟମ (୧୯୮୨)ର ସ୍ଥାନ ନେବ। ନୂଆ ବିଶାଳ ଷ୍ଟାଡିୟମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭିଜନ ବୋଲି କେନ୍ଦ୍ରମନ୍ତ୍ରୀ ଓ ଗୁଜରାଟ କ୍ରିକେଟ ଆସୋସିଏଶନ (ଜିସିଏ) ଅଧ୍ୟକ୍ଷ ଅମିତ ଶାହ କହିଛନ୍ତି। ଏହା ବିଶ୍ୱର ସବୁଠୁ ବଡ଼ କ୍ରିକେଟ ସୁବିଧା ଥିବା ଷ୍ଟାଡିୟମ ହେବ। ୨୦୧୭ରେ ଏହାର କାର୍ଯ୍ୟ ଆରମ୍ଭ ହୋଇଥିଲା। ରାଜ୍ୟ ସଭା ସଦସ୍ୟ ଓ ଜିସିଏ ଉପସଭାପତି ପରିମଲ ନାଥଓ୍ବାନିଙ୍କ ତତ୍ତ୍ୱାବଧାନରେ ଭେନ୍ୟୁର ନିର୍ମାଣ କାର୍ଯ୍ୟ ଚାଲୁଛି। ପ୍ରଥମେ ରାଜ୍ୟର ଷ୍ଟାଡିୟମର ନବୀକରଣ କରିବାକୁ ଯୋଜନା କରିଥିଲୁ। ୩୦ ବର୍ଷ ପରେ ଆମକୁ ପୁଣି ଥରେ ଷ୍ଟାଡିୟମ କାର୍ଯ୍ୟ କରିବାର ଥିଲା। ଆମେ ଏକ ପ୍ରେଜେଣ୍ଟେଶନ ପ୍ରସ୍ତୁତ କରି (୨୦୧୩ ଜିସିଏ ସଭାପତି) ମୋଦିଙ୍କୁ ଦେଖାଇଥିଲୁ। କିନ୍ତୁ ତାଙ୍କ ଉଦ୍ଦେଶ୍ୟ ଭିନ୍ନ ଥିଲା। ସେ ପୂରା ନୂଆ ଷ୍ଟାଡିୟମ ବୃହତ ଆକାରରେ ଚାହୁଁଥିଲେ। ଏହାର ଆକାର ପ୍ରାୟତଃ ଇଂଲଣ୍ଡର ଓଭାଲ ଗ୍ରାଉଣ୍ଡ ଭଳି ହୋଇଛି। ବାଉଣ୍ଡାରି ୧୭୦ ମିଟର। ଏଠାରେ ମୋଟ ୧୧ ପିଚ୍ ରହିଛି। ବିସିସିଆଇର ଗ୍ରାଉଣ୍ଡ ପରାମର୍ଶଦାତା ଦଲିଜିତ ସିଂ ଏଥିସହ ଜଡ଼ିତ ଅଛନ୍ତି। ନୂଆ ଷ୍ଟାଡିୟମର ସ୍ବତନ୍ତ୍ରତା ହେଲା କୌଣସି ପିଲର ନାହିଁ। ଏଣୁ ଷ୍ଟାଡିୟମର ଯେ କୌଣସି ଅଞ୍ଚଳରୁ ପଡ଼ିଆକୁ ଠିକ୍ ଭାବେ ଦେଖି ହେବ। ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି) ନିର୍ମାଣ କରିଥିବା ଗ୍ଲୋବାଲ ଡିଜାଇନ ଫାର୍ମ ପପୁଲସ କମ୍ପାନୀକୁ ଷ୍ଟାଡିୟମ୍ର କାର୍ଯ୍ୟ ଦିଆଯାଇଛି। ଏହି କମ୍ପାନୀ ଐତିହାସିକ ଲଡର୍ସ କ୍ରିକେଟ ଗ୍ରାଉଣ୍ଡକୁ ନବୀକରଣ କରିବା ସହ ଟୋଟେନହାମ ଦଳର ଷ୍ଟାଡିୟମ, ଓ୍ବିମ୍ବେଲ ଓ ୨୦୧୨ ଅଲିମ୍ପିକ୍ସ ଭେନ୍ୟୁ ପ୍ରସ୍ତୁତ କରିଥିଲା। ଗତ ୩ ଦଶନ୍ଧିରେ ମୋଟେରା ଗ୍ରାଉଣ୍ଡରେ ଭାରତୀୟ ଦଳର ବହୁ ସ୍ମରଣୀୟ ସ୍ମୃତି ରହିଛି। ୧୯୮୭ରେ ସୁନୀଲ ଗାଭାସ୍କର ଏଠାରେ ଟେଷ୍ଟ କ୍ୟାରିୟରରେ ୧୦ ହଜାର ରନ ପୂରଣ କରିବା ସହ ୧୯୯୩ରେ ରିଚାର୍ଡ ହାର୍ଡଲିଙ୍କୁ ଅତିକ୍ରମ କରି କପିଲ ଦେବ ୪୩୪ ଉଇକେଟ, ୧୯୯୯ରେ ସଚିନ ତେନ୍ଦୁଲକରଙ୍କ ପ୍ରଥମ ଦ୍ୱିଶତକ ଓ ୨୦୧୧ ବିଶ୍ୱକପ୍ରେ ଅଷ୍ଟ୍ରେଲିଆ ବିପକ୍ଷ କ୍ୱାର୍ଟର ଫାଇନାଲ ବିଜୟ ଭଳି ଅଭୁଲା ସ୍ମୃତି ରହିଛି।
