ଜଗତ୍ସିଂହପୁର ଅଫିସ/କୁଜଙ୍ଗ,୩୦।୧୦(ସ୍ବ.ପ୍ର.): ଓଡ଼ିଶାରୁ ପୋସ୍କୋ ବିଦାୟ ନେବା ପରେ କମ୍ପାନୀ ପାଇଁ ଜଗତ୍ସିଂହପୁର ଜିଲାର ଢିଙ୍କିଆ ଚାରି ଦେଶର ଯେଉଁ ଜମି ଅଧିଗୃହିତ ହୋଇଥିଲା, ତା’ ଉପରେ ନଜର ପକାଇଛି ଜେଏସ୍ଡବ୍ଲ୍ୟୁ। ରାଜ୍ୟ ସରକାରଙ୍କ ସହ ବୁଝାମଣା ସର୍ତ୍ତରେ ଏଠାରେ କାରଖାନା ପ୍ରତିଷ୍ଠା ପାଇଁ ଜେଏସ୍ଡବ୍ଲ୍ୟୁ ପ୍ରକ୍ରିୟା ଜାରି ରଖିଛି। ଏଥିପାଇଁ ପରିବେଶ ମଞ୍ଜୁରୀ ନିମନ୍ତେ ଆସନ୍ତା ନଭେମ୍ବର ୨୨ ତାରିଖରେ ଜନଶୁଣାଣି କରାଯିବ ବୋଲି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଚିଠି ସଂଖ୍ୟା-୧୧୦୪୭ରେ ବିଜ୍ଞପ୍ତି ପ୍ରକାଶ ପାଇଛି। ଫଳରେ ଏହି ଅଞ୍ଚଳରେ ଏବେ ପୁଣି ଜନଆନ୍ଦୋଳନ ସୂତ୍ରପାତ ହେବାକୁଯାଉଛି। କାରଣ ପୋସ୍କୋ ପାଇଁ ଜମି ଅଧିଗ୍ରହଣ ବେଳେ ଲୋକଙ୍କୁ ଦିଆଯାଇଥିବା ପ୍ରତିଶ୍ରୁତି ଅଦ୍ୟାବଧି ପାଳନ କରାଯାଇନାହିଁ। ଏପରିକି ଅନେକ ଲୋକଙ୍କୁ କ୍ଷତିପୂରଣ ମିଳିନାହିଁ। ଏ ସବୁକୁ ଅଣଦେଖା କରି ପୁଣି ଏଠାରେ କାରଖାନା ପ୍ରତିଷ୍ଠା କରିବାକୁ ଉଦ୍ୟମ ଚାଲିଥିବାରୁ ସ୍ଥାନୀୟ ଅଞ୍ଚଳରେ ବିରୋଧର ସ୍ବର ଶାଣିତ ହେବାରେ ଲାଗିଲାଣି। ମଙ୍ଗଳବାର ଏନେଇ ଢିଙ୍କିଆ ଚାରିଦେଶର ୩ ପଞ୍ଚାୟତ ଢ଼ିଙ୍କିଆ, ନୂଆଗାଁ ଓ ଗଡ଼କୁଜଙ୍ଗର ଲୋକେ ସ୍ଥାନୀୟ ବାହ୍ଲାଢିପ ମଠରେ ଏକ ବୈଠକ କରିଛନ୍ତି। ବଂଶିଧର ମନ୍ତ୍ରୀଙ୍କ ପୌରୋହିତ୍ୟରେ ଆୟୋଜିତ ଏହି ବୈଠକରେ ଆସନ୍ତା ୨୨ ତାରିଖରେ ହେବାକୁ ଥିବା ଜନଶୁଣାଣିକୁ ତୀବ୍ର ବିରୋଧ କରିବାକୁ ନିଷ୍ପତ୍ତି ହୋଇଛି। ଏଥିସହ ଜେଏସ୍ଡବ୍ଲ୍ୟୁର କର୍ମଚାରୀମାନେ ଯେଭଳି ଲୁଚିଛପି ଜନ ଶୁଣାଣିକୁ ସଫଳ କରିବାକୁ ସ୍ଥାନୀୟ ଯୁବକମାନଙ୍କୁ ପ୍ରଲୋଭିତ କରୁଛନ୍ତି, ତାହା ସଫଳ ହେବାକୁ ଦିଆଯିବ ନାହିଁ ବୋଲି କୁହାଯାଇଛି। ବୈଠକରେ ଭ୍ରମରବର ଦାସ, ସମରେନ୍ଦ୍ର ନାୟକ, ରଶ୍ମିରଞ୍ଜନ ନାୟକ, ପ୍ରକାଶ ଜେନା, ଟୁନା ବରାଳ, ନୃସିଂହ ବେହେରା, ପ୍ରଶାନ୍ତ ଦାସ, ଅକ୍ଷୟ ଦାସ, ଯଦୁନାଥ ପରିଡ଼ା, ନିତ୍ୟାନନ୍ଦ ସ୍ବାଇଁ, ରଞ୍ଜନ ନାୟକ, ମନୋରମା ଖଟୁଆ, ସୂଜାତା ସାହାଣୀ, ଅନିତା ପାତ୍ର ଓ ପ୍ରଶାନ୍ତ ସାମଲ ପ୍ରମୁଖ ଉପସ୍ଥିତ ଥିଲେ।
