ନୂଆଦିଲ୍ଲୀ,୧।୧୦:ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟ୍ଲୀଙ୍କ ମୃତ୍ୟୁ ପରେ ମିଳିବାକୁ ଥିବା ପେନସନ୍କୁ ତାଙ୍କ ପରିବାର ଲୋକେ ଦାନ କରିଦେଇଛନ୍ତି। ଜେଟଲୀଙ୍କ ସ୍ତ୍ରୀ ସଙ୍ଗୀତା ଏନେଇ ରାଜ୍ୟସଭା ସଭାପତି ତଥା ଉପରାଷ୍ଟ୍ରପତି ଭେଙ୍କେୟା ନାଇଡୁଙ୍କୁ ଚିଠି ଲେଖି ଜଣାଇଛନ୍ତି। ତାଙ୍କୁ ମିଳିବାକୁ ଥିବା ପେନସନ୍ ସେହି କର୍ମଚାରୀଙ୍କୁ ଦିଆଯାଉ ଯେଉଁମାନେ କମ୍ ଦରମା ପାଉଛନ୍ତି ବୋଲି ଚିଠିରେ ଉଲ୍ଲେଖ କରିଛନ୍ତି ସଙ୍ଗୀତା। ଜେଟ୍ଲୀଙ୍କ ପରିବାର ପକ୍ଷରୁ ଏଭଳି ନିଷ୍ପତ୍ତି ନିଆଯିବା ପରେ, ଉକ୍ତ ପେନସନକୁ ରାଜ୍ୟସଭା କମ୍ ଦରମା ପାଉଥିବା କର୍ମଚାରୀଙ୍କୁ ଦିଆଯାଇପାରେ ବୋଲି ଜଣାପଡିଛି। ପେନସନ ବାବଦରେ ଜେଟଲୀଙ୍କ ପରିବାରକୁ ମାସକୁ ପାଖାପାଖି ୩ ଲକ୍ଷ ଟଙ୍କା ମିଳିବ। ସ୍ତ୍ରୀ ସଙ୍ଗୀତାଙ୍କ ସହ ଜେଟ୍ଲୀଙ୍କ ଏକ ଝିଅ ସୋନାଲୀ ଏବଂ ପୁଅ ରୋହନ ଅଛନ୍ତି। ଦୁହେଁ ପିତାଙ୍କ ଭଳି ଓକିଲ ଅଛନ୍ତି। ସୂଚନାଯୋଗ୍ୟ,ଅରୁଣ ଜେଟ୍ଲୀଙ୍କ ଗତ ଅଗଷ୍ଟ ୨୪ରେ ଦିଲ୍ଲୀସ୍ଥିତ ଏମ୍ସରେ ପରଲୋକ ଘଟିଥିଲା।
