ଚେନ୍ନାଇ, ୨୪ା୫ (ପି.ଟି.)- ତାମିଲନାଡୁର ପୂର୍ବତନ ଫୁଟ୍ବଲ ଖେଳାଳି ଓ କୋଚ୍ ଆର୍, ଶନ୍ମୁଗମ୍ଙ୍କ ପରଲୋକ ହୋଇଯାଇଛି। ତାଙ୍କୁ ୭୭ ବର୍ଷ ହୋଇଥିଲା। ତାଙ୍କର ଦୁଇ ପୁଅ ଓ ଗୋଟିଏ ଝିଅ ଅଛନ୍ତି। ଶନ୍ମୁଗମ୍ଙ୍କ ଜନ୍ମ ବର୍ମା(ବର୍ତ୍ତମାନ ମ୍ୟାନମାର୍)ରେ ୧୦୪୩ରେ ହୋଇଥିଲା। ସେ ୧୯୬୬-୬୭ରେ ବର୍ମିଜ ଜୁନିୟର ଓ ସିନିୟର ନ୍ୟାଶନାଲ ଟିମ୍ ତରଫରୁ ପ୍ରତିନିଧିତ୍ୱ କରିଥିଲେ। ଶନ୍ମୁଗମ୍ ୧୯୬୯ରେ ଇଣ୍ଡିଆନ ରେଲଓ୍ବେ ତରଫରୁ ସନ୍ତୋଷ ଟ୍ରଫି ଖେଳିଥିଲେ। ୧୯୬୮ରେ ସେ ମୋହନବାଗାନ ଫୁଟ୍ବଲ ଟିମ୍ର ଜଣେ ସଦସ୍ୟ ଥିଲେ। ସେ ୧୯୭୮ ଓ ୯୧ରେ ଫିଫା କୋକାକୋଲା କୋଚିଂ କୋର୍ସ ଏବଂ ୧୯୯୬ରେ ଅଲିମ୍ପିକ ସଲିଡାରିଟି କୋର୍ସ କରିଥିଲେ। ଶନ୍ମୁଗମ୍ ୧୯୭୫-୭୬ରେ ନ୍ୟାଶନାଲ ଇନଷ୍ଟିଚ୍ୟୁଟ୍ ଅଫ୍ ସ୍ପୋଟର୍ସ ଏବଂ ୧୯୯୫ରେ ବ୍ରାଜିଲିଆନ ଫୁଟ୍ବଲ ଏକାଡେମୀରୁ ଫୁଟ୍ବଲ କୋଚିଂରେ ଡିପ୍ଲୋମା ହାସଲ କରିଥିଲେ। ସେ ସନ୍ତୋଷ ଟ୍ରଫିରେ ଆଇସିଏଫ୍, ତାମିଲନାଡୁ ଓ ଇଣ୍ଡିଆନ ରେଲଓ୍ବେର କୋଚ୍ ଭାବେ କାର୍ଯ୍ୟକରିଛନ୍ତି। ତାମିଲନାଡୁ ଓ ରେଲଓ୍ବେ ଦଳର ଚୟନକର୍ତ୍ତା ଦାୟିତ୍ୱ ତୁଲାଇଛନ୍ତି। ଶନ୍ମୁଗମ୍ ଆହୁରି ମଧ୍ୟ ଚେନ୍ନାଇରେ ଫୁଟ୍ବଲ କୋଚ୍ ଆସୋସିଏଶନର ସଭାପତି ରହିଥିଲେ।
