ଭୁବନେଶ୍ୱର, (ବ୍ୟୁରୋ)/ କାମାକ୍ଷାନଗର (ଡି.ଏନ୍.ଏ.) ୧୯ା୫- ନିଜ ପଦବୀର ଅପବ୍ୟବହାର କରି ବ୍ୟାଙ୍କ୍ରୁ ୧.୧୫ କୋଟି ଟଙ୍କା ହପଡ଼ କରିବା ଅଭିଯୋଗରେ କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧ ଶାଖା(ଇଓଡବ୍ଲ୍ୟୁ) ଦୁଇ କର୍ମଚାରୀଙ୍କୁ ଗିରଫ କରିଛି। ସେମାନେ ହେଲେ ଅନୁଗୋଳ ୟୁନାଇଟେଡ୍ ସେଣ୍ଟ୍ରାଲ କୋଅପରେଟିଭ ବ୍ୟାଙ୍କ୍(ୟୁସିସି)ର ପୂର୍ବତନ ଆକାଉଣ୍ଟାଣ୍ଟ ସହଦେବ ସାହୁ ଓ ବ୍ୟାଙ୍କ୍ ଇନ୍ଚାର୍ଜ ଶାନ୍ତନୁ କୁମାର ବରାଳ। ଉଭୟଙ୍କ ଘର ଢେଙ୍କାନାଳ ଜିଲାରେ। ଶନିବାର ସକାଳୁ ଇଓଡବ୍ଲ୍ୟୁ ସେମାନଙ୍କୁ ଢେଙ୍କାନାଳରୁ ଗିରଫ କରିଥିବା ଜଣାପଡିଛି। ଗିରଫ ପରେ ଆଇପିସି ଦଫା ୪୦୯, ୪୬୭, ୪୬୮, ୪୭୧, ୪୭୭(ଏ)୧୨୦(ବି)ରେ ମାମଲା ( ନଂ.୭/୧୯) ରୁଜୁ କରି ସେମାନଙ୍କୁ କାମାକ୍ଷାନଗର ଏସ୍ଡିଜେଏମ୍ କୋର୍ଟକୁ ପଠାଇ ଦେଇଛି। ଏଥିସହ ଏହି ଠକେଇରେ ସଂପୃକ୍ତଥିବା ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ଇଓଡବ୍ଲ୍ୟୁ ତଦନ୍ତ ଜାରି ରଖିଛି। ସୂଚନା ଅନୁଯାୟୀ, ୨୦୧୫ରୁ ୨୦୧୬ ମଧ୍ୟରେ ଅନୁଗୋଳ ୟୁସିସି ବ୍ୟାଙ୍କ୍ରେ ଏହି ଠକେଇ ହୋଇଥିଲା। ସେହି ସମୟରେ ବ୍ୟାଙ୍କ୍ର ଆକାଉଣ୍ଟାଣ୍ଟ ଥିବା ସହଦେବ ସାହୁ, ଇନ୍ଚାର୍ଜ ଶାନ୍ତନୁ କୁମାର ବରାଳଙ୍କ ସମେତ ବ୍ୟାଙ୍କର ଆସିଷ୍ଟାଣ୍ଟ୍ ଓ ଦୁଇ ଜଣ କର୍ମଚାରୀ ଏହି ଠକେଇରେ ସାମିଲ ଥିଲେ। ସେମାନେ ବ୍ୟାଙ୍କ୍ର ୧ କୋଟି ୧୫ ଲକ୍ଷ ୧୬ ହଜାର ୩ଶହ ଟଙ୍କାକୁ ଜାଲିଆତି କରି ଭିନ୍ନ ଭିନ୍ନ ଆକାଉଣ୍ଟକୁ ଟ୍ରାନ୍ସଫର କରି ହଡ଼ପ କରିଥିଲେ।
