ଗୁଡଭେଲିପଦର, ୧୯।୫ (ଡି.ଏନ.ଏ): ଭାରତୀୟ ସଂସ୍କୃତି ଆର ପରମ୍ପରାରେ ଅନେକ ପରକାର ବାଦ୍ୟର ପରଚଲନ ଅଛେ। ପୂଜାପାଠ୍ନୁ ମୂଲ କରି ବିହାବରପନ, ଉଛବ୍, ପରବ୍, ଜାନୀଯାତରାରେ ଘଁଟ୍, ଶଁଖ୍, ମୁହୂରି, ଢ଼ୋଲ, ଲିସାନ୍, ମୁରଦୁଁଗ୍, ଗିନିର ପରଚଲନ ଦେଖ୍ବାକେ ମିଲସି। ଇ ସବୁ ବାଦ୍ୟଯନ୍ତ୍ର କେନ୍ ଯୁଗୁ ଆମର ସଂସ୍କୃତି, ପରମ୍ପରା ସଂଗେ ଜୁଡ଼ି ହେଇ ରହିଛେ। ହେଲେ ଆଏଜ୍କାଲି ବିଦେଶୀ ସଂସ୍କୃତିର ବଡ଼ଭାରି ପରଚଲନ ଲାଗି ଆମର ଦେଶୀ ବାଦ୍ୟଯନ୍ତ୍ର ଲୋପ୍ ପାଏବାକେ ବସଲାନ। ଦିନୁଦିନ୍କେ ଏନ୍ତା ହେଲାନ ଯେ, ଆଗଲା ପିଢ଼ି ଇ ସବୁ ବାଦ୍ୟଯନ୍ତ୍ର ସଂଗ୍ରହାଳୟମାନକେ ଦେଖ୍ବାକେ ପାଏବେ।
ସେନ୍ତା ବୌଦ୍ଧ ଜିଲା କଣ୍ଟାମାଳ ବ୍ଲକ ହେଉଛେ ଗୁଟେ କଳା, ସଂସ୍କୃତି ପୂରି ରହିଥିବାର ଅଂଚଲ। ଇ ଅଂଚଲରେ ଭିନେ ଭିନେ ସମିଆରେ ଅନେକ ଉଛବ୍, ପରବ୍ ପାଲନ ହେଉଛେ। ସେନ୍ତା ଲୋକ୍କଳାକେ ବଁଚେଇ ରଖ୍ବାର ଲାଗି ଅଂଚଲର ଲୋକ୍ ସବୁବେଲେ ଚେରେଷ୍ଟା କରୁଛନ୍। ଅଂଚଲରେ ଗଁାଗଁାରେ କିରତନ୍ ଦଲ ରହିଛେ। ସେମାନେ ଭିନେ ଭିନେ ଜାନିଯାତରା, ଉଛବ୍, ପୂଜାପାଠ୍କେ ଯାଇ କିରତନ୍ କରୁଛନ୍। ଇ କିରତନ୍ର ମୁଖିଆ ବାଦ୍ୟଯନ୍ତ୍ର ହେଉଛେ ମୁରଦୁଁଗ୍। ଇଥିର ବିନା କିରତନ୍ ସମ୍ଭବ ନୁହେ। ହେଲେ ସରକାରୀ ପୋରଛାହନ୍ ଅଭାବୁ ଆଏଜ୍ ମୁରଦୁଁଗ୍ ବାଦ୍ୟଯନ୍ତ୍ର କାରିଗରୀ ଲୋପ୍ ପାଏବାକେ ବସଲାନ। ଅନେକ କାରିଗର ଇ ବୁରତି ଛାଡ଼ି ଉନିଆ ଧଁଦାବାଡ଼ି କଲେନ। ମୁରଦୁଁଗ୍ କାରିଗରମାନେ ମାଟିରେ ତିଆର ହେଇଥିବାର ଝଁାଜ୍କେ କୁମ୍ଭାରନୁ ଘିନିଆନି ତାର ଉପରେ ଆଗରୁ ଶୁଖେଇ ରଖିଥିବାର ଚମଡ଼ାକେ ସାଇଜ କରି କାଟି ସେଥ୍ରେ ଲଗାସନ୍। ଚମଡ଼ା ଖଁଜି ସାଏଲା ଉତାରୁ ମୁରଦୁଁଗ୍ର ଦୁଇଫାଲେ କିରନ୍ ଦିଆଯାଏସି। ଇ ହିସାବେ ଗୁଟେ ମୁରଦୁଁଗ୍ ତିଆରିବାର ଲାଗି କାରିଗରମାନକୁ ୪ରୁ ୫ ଦିନ୍ ଲାଗିଯାଏସି। ଆଏଜ୍କାଲି ଚମଡ଼ା ଅଭାବ ଲାଗି କାରିଗରମାନକୁ ବଜାରରୁ ଘିନବାକେ ପଡ଼ୁଛେ। ଇ ଚମଡ଼ା ଆଗରୁ ଗଁାଗଁଲିରେ ସୁବିଧା ଆର ସସ୍ତାରେ କାରିଗରମାନକୁ ମିଲିଯାଉଥିଲା। ହେଲେ ଆଏଜ୍କାଲି ମୁରଦୁଁଗ୍ ତିଆରି ଲାଗି ଦରକାର ପଡ଼ୁଥିବାର ସାଜୋସାମାନ ସୁବିଧାରେ ନାଇଁ ମିଲବାର। ଯେନ୍ଥିରଲାଗି କାରିଗରମାନେ ବାପ୍ଅଜା ଅମଲୁ ଆପନେଇଥିବାର ଇ କୁଲବୁରତିକେ ଛାଡ଼ି ଉନିଆ ଧଁଦାବାଡ଼ିରେ ଧିଆନ୍ ଦେଉଛନ୍। କଳାକାର ପାରିବାରର ଯୁବକ୍ମାନେ ବି କୁଲବୁରତିକେ ପସନ୍ ନାଇଁକରବାର। ଇଆଡ଼େ ସରକାର ଲୋକକଳା, ଲୋକ୍ ସଂସ୍କୃତି, ନାଚ୍ଗୀତ୍କେ ବଁଚେଇ ରଖ୍ବାର ଲାଗି କୋଟି କୋଟି ଟଁକା ଖରଚ୍ କରୁଛନ୍। କଳାକାରମାନକୁ ଡାକି ଅନେକ୍ ଉଛବ୍ରେ ସନ୍ମାନିତ କରୁଛନ୍। ହେଲେ ଇ ବାଦ୍ୟଯନ୍ତ୍ରମାନ ତିଆର କରୁଥିବାର କାରିଗରମାନେ ଆଏଜ୍ ବି ସରକାରୀ ପୋରଛାହନ୍ ଅଭାବୁ ଅବହେଲିତ ହେଇ ପଡ଼ିରହିଛନ୍। ଇ ବାବ୍ଦେ ଗୁଡ଼ଭେଲିପଦର ଗଁାର ମୁରଦୁଁଗ୍ କାରିଗର ରାମଚନ୍ଦ୍ର ପାଣିଗ୍ରାହୀକୁଁ ପଚରାଲାରୁ ଇ ବୁରତିରେ କାମ୍ ହିସାବେ ଦାମ୍ ନାଇଁ ମିଲବାର। ସରକାରକଁର ତରଫୁ ଯଦି କିଛି ପୋରଛାହନ୍ ମିଲତା ଆମର କଳା ସଂସ୍କୃତି ସଂଗେ ଜଡ଼ିତ ଥିବାର ଇ ବୁରତିକେ ବଁଚେଇ ରଖିହେତା ବଲି ସେ କହିଥିଲେ।
