ମହୀଶୂର, ୧୭।୯ (ପି.ଟି.)- ସ୍ଥାନୀୟ ଶ୍ରୀକାନ୍ତଦତ୍ତ ନରସିମା ରାଜ ଓ୍ବାଡିୟାର ଗ୍ରାଉଣ୍ଡରେ ଘରୋଇ ଭାରତ-ଏ ଓ ଦକ୍ଷିଣ ଆଫ୍ରିକା-ଏ ଦଳ ମଧ୍ୟରେ ଅନ୍ତିମ ତଥା ୨ୟ ଅନ୍ଅଫିସିଆଲ ଟେଷ୍ଟ ମ୍ୟାଚ୍ ଆରମ୍ଭ ହୋଇଛି। ପ୍ରଥମ ଦିବସ ଷ୍ଟମ୍ପ୍ସ ଅପସାରଣ ସୁଦ୍ଧା ଆମନ୍ତ୍ରଣ ପାଇ ବ୍ୟାଟିଂ କରିଥିବା ଭାରତ-ଏ ପ୍ରଥମ ଇନିଂସରେ ୭୪ ଓଭରରେ ୩ ଉଇକେଟ୍ ହରାଇ ୨୩୩ ରନ୍ ସଂଗହ କରିଛି। ପ୍ରାରମ୍ଭରୁ ଭାରତ-ଏ ଓପନର୍ ଅଭିମନ୍ୟୁ ଈଶ୍ୱରନ ଓ ୩ ନମ୍ବର ସ୍ଥାନରେ ଆସିଥିବା ପ୍ରିୟଙ୍କ ପଞ୍ଚାଲଙ୍କ ଉଇକେଟ୍ ହରାଇଥିଲା। ଘରୋଇ କ୍ରିକେଟ୍ରେ ବେଶ୍ ପ୍ରଭାବୀ ପ୍ରଦର୍ଶନ କରିଥିବା ଏହି ଦୁଇ ବ୍ୟାଟ୍ସମ୍ୟାନ କିନ୍ତୁ ବଡ଼ ସ୍କୋର କରିବାରେ ବିଫଳ ହୋଇଥିଲେ। ବେଙ୍ଗଲ ଡାହାଣହାତୀ ବ୍ୟାଟ୍ସମ୍ୟାନ ଈଶ୍ୱରନ ୫ ଓ ଗୁଜରାଟର ପଞ୍ଚାଲ ୬ ରନ କରିଥିଲେ। ତେବେ ଉଦୀୟମାନ ପଞ୍ଜାବ ବ୍ୟାଟ୍ସମ୍ୟାନ ତଥା ସିନିୟର ଟେଷ୍ଟ ଦଳରେ ସ୍ଥାନ ପାଇଥିବା ଶୁବମନ ଗିଲ୍ ଓ କରୁଣ ନାୟାରଙ୍କ ଦମ୍ଦାର ଅର୍ଦ୍ଧଶତକ ବଳରେ ଭାରତ-ଏ ପ୍ରଥମ ଦିବସରେ ସମ୍ମାନରକ୍ଷା କରିବାରେ ସମର୍ଥ ହୋଇଥିଲା। ଗିଲ୍ ୯୨ ରନ (୧୩୭ ବଲ୍, ୧୨ ଚୌକା, ୧ ଛକା)ର ଧୈର୍ଯ୍ୟପୂର୍ଣ୍ଣ ଇନିଂସ ଖେଳି ଅଳ୍ପକେ ଶତକ ହାସଲରୁ ବଞ୍ଚତ୍ତ ହୋଇଥିଲେ। ୨୦ ବର୍ଷୀୟ ଡାହାଣହାତୀ ବ୍ୟାଟ୍ସମ୍ୟାନ ଗିଲ୍ ଚଳିତ ସିରିଜରେ ୨ୟଥର ପାଇଁ ନର୍ଭସ ନାଇଣ୍ଟିଜର ଶିକାର ହୋଇଛନ୍ତି। ଏଥିପୂର୍ବରୁ ପ୍ରଥମ ମ୍ୟାଚ୍ରେ ସେ ୯୦ ରନରେ ଆଉଟ୍ ହୋଇଥିଲେ। ଆଉଟ୍ ହେବା ପୂର୍ବରୁ ଗିଲ୍ ୩ୟ ଉଇକେଟ୍ ଯୋଡ଼ିରେ ନାୟାରଙ୍କ ସହ ୧୩୫ ରନର ପାର୍ଟନରଶିପ୍ କରି ଦଳକୁ ବିପର୍ଯ୍ୟୟରୁ ରକ୍ଷା କରିଥିଲେ। ତେବେ ନାୟାରଙ୍କ ସହ ଯୋଗଦେଇଥିବା ଅଧିନାୟକ ରିଦ୍ଧିମାନ ଶାହ ଷ୍ଟମ୍ପ୍ସ ଅପସାରଣ ସୁଦ୍ଧା ଦଳକୁ ଆଉ କ୍ଷତି ହେବାକୁ ଦେଇ ନ ଥିଲେ। ମଙ୍ଗଳବାର ଖେଳ ଶେଷବେଳକୁ ନାୟାର ୭୮ (୧୬୭ ବଲ୍, ୧୦ ଚୌକା) ଓ ଶାହ ୩୬ (୮୬ ବଲ୍, ୫ ଚୌକା) ରନ କରି ଅପରାଜିତ ରହିଛନ୍ତି। ଭ୍ରମଣକାରୀ ଦକ୍ଷିଣ ଆଫ୍ରିକା-ଏ ପକ୍ଷରୁ ଲୁନ୍ଗି ଏନ୍ଗିଡି, ଓ୍ବିଆନ୍ ମଲ୍ଡର ଓ ଲୁଥୋ ସିପମ୍ଲା ଗୋଟିଏ ଲେଖାଏ ଉଇକେଟ୍ ନେଇଛନ୍ତି। ଖରାପ ଆଲୋକ ଯୋଗୁ ଖେଳକୁ ୧୪ ଓଭର ପୂର୍ବରୁ ବନ୍ଦ କରି ଦିଆଯାଇଥିଲା। ସିରିଜର ପ୍ରଥମ ମ୍ୟାଚ୍କୁ ଜିତି ଭାରତ-ଏ ୧-୦ରେ ଅଗ୍ରଣୀ ରହିଛି।
