ପାଲା ମାଧ୍ୟମରେ ବିକାଶର ବାର୍ତ୍ତା
8:41 pmMarch 5, 2020 / 43

ଖଇରା, ୫।୩(ଡି.ଏନ.ଏ.)-ଗୁରୁବାର ଖଇରା ବ୍ଲକ ପରିସରରେ ବିଜୁ ପଟ୍ଟନାୟକ ଜୟନ୍ତୀ ଓ ପଞ୍ଚାୟତିରାଜ ଦିବସ ପାଳନ ଅବସରରେ ପାଲା ପରିବେଷଣ କରାଯାଇଥିଲା। ଯୁବ ପାଲାଗାୟକ ଛାୟାକାନ୍ତ ମହାନ୍ତି ଓ ସାଥୀ ଏହି ପାଲା ପରିବେଷଣ କରି କଳିଙ୍ଗ ବୀର ବିଜୁ ପଟ୍ଟନାୟକ, ତାଙ୍କ ପୁଅ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୨୦ବର୍ଷ ଶାସନକାଳ ମଧ୍ୟରେ ବିଜୁ ପକ୍କାଘର, ମଧୁବାବୁ ପେନସନ, ବସୁଧା, ହରିଶ୍ଚନ୍ଦ୍ର, ମମତା, ମୁଖ୍ୟମନ୍ତ୍ରୀ ସଡକ, କଳାକାର ଭତ୍ତା, କାଳିଆ ଭଳି ବହୁମୁଖୀ ଯୋଜନା ଏବଂ ପଞ୍ଚାୟତିରାଜ ଦିବସ ପାଳନର ଆଭିମୁଖ୍ୟ ବର୍ଣ୍ଣନା କରିଥିଲେ। ଆୟୋଜିତ କାର୍ଯ୍ୟକ୍ରମରେ ପାଲା ପରିବେଷଣ ମାଧ୍ୟମରେ ବିଭିନ୍ନ ପ୍ରସଙ୍ଗକୁ ଉପସ୍ଥିତ ଦର୍ଶକମାନେ ମନଭରି ଶୁଣିଥିଲେ। ବିଡିଓ ଦେବେନ୍ଦ୍ର ପ୍ରସାଦ ବଳଙ୍କ ପୌରୋହିତ୍ୟରେ ଆୟୋଜିତ ଉତ୍ସବରେ ବ୍ଲକ ଅଧ୍ୟକ୍ଷା ଅଭିଲିପ୍ସା ସାହୁ, ଉପାଧକ୍ଷ ଜୟନ୍ତ କୁମାର ରାଉତ, ସିଡିପିଓ ନର୍ମଦା ଦେଓ, ଓଡିଶା ଜିବିକା ମିଶନର ବ୍ଲକ ପରିଚାଳିକା ଶୋଭନା ଦାସ, ମହିଳା ସଂଘର ସଭାପତି ରଶ୍ମିତା ମହାପାତ୍ର, ଜିଲା ପରିଷଦ ସଭ୍ୟା ଜୟନ୍ତୀ ମହଲା ଓ କଳ୍ପନା ନଇକ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ଛାତ୍ରୀ ବର୍ଷା ପ୍ରିୟଦର୍ଶନୀ ଜେନା ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରିଥିଲେ। କୃଷି ମିତ୍ର ରମାକାନ୍ତ ଗିରି ସ୍ବଚ୍ଛତା ଉପରେ ଓ କୃଷ୍ଣପ୍ରିୟା ଦାସ ମହିଳା ସଶସ୍ତ୍ରୀକରଣ ଉପରେ ଆଲୋକପାତ କରିଥିଲେ ା