ଗୋପାଳପୁର,୧୪ା୮-ରାସ୍ତା ଓ କୋଠାବାଡ଼ି (ଆର ଆଣ୍ଡ ବି) ବ୍ରହ୍ମପୁର-୧ ବିଭାଗ ପକ୍ଷରୁ ବ୍ରହ୍ମପୁର ଓ ହରିପୁରକୁ ସଂଯୋଗ କରୁଥିବା ଏକ ଝୁଲା ବ୍ରିଜ୍ ନିର୍ମାଣ ଚାଲିଛି। ଏଥିପାଇଁ ୧୭ କୋଟି ୫୦ ଲକ୍ଷ ଟଙ୍କା ବ୍ୟୟ ଅଟକଳ ହୋଇଛି। ବ୍ରିଜ ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲୁ ରହିଛି। ବ୍ରିଜ ନିର୍ମାଣ ଚାଲିଥିବା ବେଳେ ପାଣି ନ ଆସିବା ପାଇଁ ସମୁଦ୍ର ମୁହାଣରେ ବାଲି ବସ୍ତା ରଖି ଆଡ଼ିବନ୍ଧ କରାଯାଇଥିଲା। ବର୍ତ୍ତମାନ ଉକ୍ତ ବ୍ରିଜର ମଧ୍ୟଭାଗରେ କାମ ଚାଲୁ ରହିଥିବାବେଳେ ବର୍ଷା ଓ ସମୁଦ୍ର ଜୁଆର ମାଡ଼ ଯୋଗୁ ବ୍ୟାକ୍ ୱାଟର ଜଳସ୍ତର ବୃଦ୍ଧି ହୋଇଛି। ଗୋପାଳପୁର ମତ୍ସ୍ୟ ଅବତରଣ କେନ୍ଦ୍ର ୬ କୋଟି ଟଙ୍କାରେ ନିର୍ମାଣ ହୋଇଥିଲା। ଆର୍ଏଣ୍ଡବି ବିଭାଗର ଅବହେଳା ଯୋଗୁ ଗତ ୧୦ ରୁ ୧୨ ଦିନ ତଳେ ପାଣି ସ୍ରୋତରେ ନିର୍ମିତ ବିଜୁ ପଟ୍ଟନାୟକ ଶିଶୁ ଉଦ୍ୟାନ ପାଚେରୀ ଓ ମତ୍ସ୍ୟ ଅବତରଣ କେନ୍ଦ୍ରର ଗାର୍ଡୱାଲ ଓ ପାହାଚ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ବର୍ତ୍ତମାନ ମତ୍ସ୍ୟ ଅବତରଣ କେନ୍ଦ୍ର ରାସ୍ତା ଓ ଅନ୍ୟ ପାହାଚ ଗୁଡ଼ିକ ନଷ୍ଟ ହେବାରେ ଲାଗିଛି। ଏନେଇ ଏନ୍ଏସି କର୍ତ୍ତୃପକ୍ଷ ଜିଲା ପ୍ରଶାସନ ଓ ପୂର୍ତ୍ତ ବିଭାଗକୁ ଲିଖିତ ଆକାରରେ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ। ଆର୍ଆଣ୍ଡବି ବିଭାଗର ଅବହେଳା ଯୋଗୁ ଏଭଳି କ୍ଷୟକ୍ଷତି ହେଉଥିବା ସାଧାରଣରେ ଅଭିଯୋଗ ଉଠିଛି। ଏନେଇ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଉମା ଶଙ୍କର ସେଠୀଙ୍କୁ ପଚାରିବାରୁ ଜିଲା ପ୍ରଶାସନ ଓ ପୂର୍ତ୍ତ ବିଭାଗକୁ ଏ ସମ୍ପର୍କରେ ଜଣାଇ ଦିଆଯାଇଛି ବୋଲି କହିଥିଲେ। ତୁରନ୍ତ ପଦକ୍ଷେପ ନ ନେଲେ ଆଗାମୀ ଦିନରେ ସମ୍ପୂର୍ଣ୍ଣ ରାସ୍ତା ନଷ୍ଟ ହେବାର ସମ୍ଭାବନା ରହିଛି।
