ନୂଆଦିଲ୍ଲୀ,୧୦।୬: କୋଭିଡ୍-୧୯ ବିଶ୍ୱ ବଜାରକୁ ସମ୍ପୂର୍ଣ୍ଣ କ୍ଷତିଗ୍ରସ୍ତ କରିଛି। ଲକ୍ଡାଉନ ଯୋଗୁ କାରବାର ଟ୍ରାକ୍ ବାହାରକୁ ଚାଲିଯାଇଛି। ବର୍ତ୍ତମାନ କଟକଣା କୋହଳ ହେଉଥିଲେ ମଧ୍ୟ ସବୁକିଛି ଠିକ୍ ଅବସ୍ଥାକୁ ଆସିବା ଲାଗି ଅନେକ ସମୟ ଲାଗିବ। ବର୍ତ୍ତମାନ କମ୍ପାନୀଗୁଡିକ କ୍ଷତି ଯୋଗୁ ଅନେକ ପରିମାଣରେ ଛଟେଇ କରୁଥିବା ଦେଖାଯାଉଛି। ଏହି ସମୟରେ ଦେଶର ନିଯୁକ୍ତି ବଜାର ନୈରାଶ୍ୟଜନକ ସ୍ଥିତିରେ ରହିଥିବା ଜଣାପଡିଛି। ଆଗାମୀ ୩ ମାସରେ ମାତ୍ର ୫% କମ୍ପାନୀ ନୂଆ ନିଯୁକ୍ତି ସପକ୍ଷରେ ରହିଛନ୍ତି। ମ୍ୟାନ ପାଓ୍ବାର ଗ୍ରୁପ୍ ଏମ୍ପ୍ଲୟମେଣ୍ଟ ଆଉଟଲୁକ୍ ସର୍ଭେ ମୁତାବକ ନିଯୁକ୍ତି ବଜାର ୧୫ ବର୍ଷର ସବୁଠାରୁ ଦୁର୍ବଳ ସ୍ଥିତିରେ ରହିଛି। ଜୁଲାଇ-ସେପ୍ଟେମ୍ବର ତ୍ରୈମାସରେ ନେଟ୍ ନିଯୁକ୍ତି ଆଉଟଲୁକ୍ ମାତ୍ର ୫% ରହିବା ନେଇ ସର୍ଭେରେ ପୂର୍ବାନୁମାନ କରାଯାଇଛି।
୪୪ ଦେଶର ଲୋକଙ୍କୁ ନେଇ ସର୍ଭେ କରାଯାଇଥିବା ବେଳେ ଅନ୍ୟ ଦେଶଗୁଡ଼ିକ ତୁଳନାରେ ଭାରତରେ ନିଯୁକ୍ତି ପ୍ରଦାନ ଧାରା ସାମାନ୍ୟ ଉନ୍ନତ ରହିବ। ନିଯୁକ୍ତି ପ୍ରଦାନରେ ଭଲ ସ୍ଥିତିରେ ଥିବା ଅନ୍ୟ ୩ ପ୍ରମୁଖ ଦେଶଗୁଡିକ ମଧ୍ୟରେ ଜାପାନ, ଚାଇନା ଏବଂ ତାଇଓ୍ବାନ ରହିଛି। ଲକ୍ଡାଉନ ପାଇଁ ଭାରତର କର୍ପୋରେଟ ଜଗତ ବହୁ ସଂଖ୍ୟାରେ ଛଟେଇ କରୁଥିବା ଜଣାପଡିଛି। ଲକ୍ଡାଉନ ପରବର୍ତ୍ତୀ ବଜାର ଉପରେ ସବୁକିଛି ନିର୍ଭର କରୁଛି ବୋଲି ମ୍ୟାନ୍ ପାଓ୍ବାର ଗ୍ରୁପ୍ ଏମ୍ଡି ସନ୍ଦୀପ ଗୁଲାଟି କହିଛନ୍ତି। ସରକାରଙ୍କ ଆର୍ଥତ୍କ ପ୍ୟାକେଜ ଦ୍ୱାରା ଅର୍ଥ ବ୍ୟବସ୍ଥାରେ ସୁଧାର ଆସିବା ନେଇ ଆଶା ରହିଥିବା ରିପୋର୍ଟରେ ଉଲ୍ଲେଖ ରହିଛି। ଏହାର ଭଲ ପ୍ରଭାବ ନିଯୁକ୍ତି ଉପରେ ପଡିପାରେ। ଖଣି, ନିର୍ମାଣ, ଅର୍ଥ, ବୀମା ଏବଂ ରିୟଲ ଇଷ୍ଟେଟ କ୍ଷେତ୍ରରେ ନିଯୁକ୍ତି ସୁଯୋଗ ଉନ୍ନତ ରହିବା ନେଇ ଆକଳନ କରାଯାଇଛି।
ମଧ୍ୟମବର୍ଗ କମ୍ପାନୀଗୁଡିକରେ ନିଯୁକ୍ତି ପ୍ରଦାନ ଧାରା ଉନ୍ନତ ରହିଛି। ଏହା ପଛକୁ ବଡ କମ୍ପାନୀ ଏବଂ ଅଣୁ ଶିଳ୍ପ ରହିଛି। ଦେଶର ଉତ୍ତର ଏବଂ ଦକ୍ଷିଣ ଭାଗରେ ନିଯୁକ୍ତି ଯୋଗାଣ ଧାରା ଉନ୍ନତ ରହିବ ବୋଲି କୁହାଯାଇଛି। ବଜାରର ଚାହିଦା କିଭଳି ରହିବ ତାହା କମ୍ପାନୀଗୁଡିକର ଆଗାମୀ କାର୍ଯ୍ୟପନ୍ଥା ଉପରେ ନିର୍ଭର କରୁଛି। ଲକ୍ଡାଉନ ସମୟରେ ଟେକ୍ନୋଲୋଜି ଏକ ପ୍ରମୁଖ ଭୂମିକା ଗ୍ରହଣ କରୁଛି। ଭାରତ, ଜାପାନ, ଆମେରିକା, ଚାଇନା ଏବଂ ତାଇଓ୍ବାନରେ ଭଲ ନିଯୁକ୍ତି ଯୋଗାଣ ନେଇ ରିପୋର୍ଟରେ ଆଶା ରଖାଯାଇଛି। ସେହିଭଳି ସିଙ୍ଗାପୁର, କୋଷ୍ଟାରିକା, କଲମ୍ବିଆ, ପେରୁ ଏବଂ ଦକ୍ଷିଣ ଆଫ୍ରିକା ଭଳି ଦେଶଗୁଡିକରେ ନିଯୁକ୍ତି ବଜାର ଏତେ ଉନ୍ନତ ହୋଇପାରିବ ନାହିଁ ବୋଲି ରିପୋର୍ଟରେ କୁହାଯାଇଛି। ଗତବର୍ଷ ତୁଳନାରେ ନିଯୁକ୍ତି ହାର ପ୍ରାୟ ୪୨ରୁ ୪୩% ଧୀମା ରହିପାରେ।
