ନୂଆଦିଲ୍ଲୀ, ୨।୪: ୨୦୨୦-୨୧ ଆର୍ଥତ୍କ ବର୍ଷର ପ୍ରଥମ ଦିନରେ ଦେଶର ପୁଞ୍ଜି ବଜାର କାରବାର କ୍ଷତିଗ୍ରସ୍ତ ସ୍ଥିତିରେ ରହିଛି। ବୁଧବାର ବମ୍ବେ ଷ୍ଟକ ଏକ୍ସଚେଞ୍ଜରେ କାରବାର ନିମ୍ନରେ ରହିବା ଯୋଗୁ ନିବେଶକମାନେ ୩.୨୦ ଲକ୍ଷ କୋଟି ଟଙ୍କା କ୍ଷତି ସହିଛନ୍ତି। ଏହି ସମୟରେ ସେନସେକ୍ସ ୧୨୦୩.୧୮ ପଏଣ୍ଟ ବା ୪.୦୮% ଖସିଛି। ବୁଧବାର ପୁଞ୍ଜି ବଜାରର ସୂଚକାଙ୍କ ୨୮,୨୬୫.୩୧ ସ୍ତରରେ ରହିଛି। ୨୦୧୯-୨୦ ଆର୍ଥତ୍କ ବର୍ଷ ଶେଷ ଦିନ କାରବାରରେ ସେନ୍ସେକ୍ସ ୧୦୦୦ ପଏଣ୍ଟରୁ ଉର୍ଦ୍ଧ୍ୱ କାରବାର କରିବାକୁ ସକ୍ଷମ ହୋଇଥିଲା। ଭାରତରେ କରୋନା ମାମଲା ବଢି ଚାଲିଥିବାରୁ ବଜାରରେ ଏଭଳି ସ୍ଥିତି ଉପୁଜିଛି ବୋଲି ରେଲିଗାରେ ବ୍ରୋକିଂ ଲିମିଟେଡର ଉପସଭାପତି ଅଜିତ ମିଶ୍ର କହିଛନ୍ତି। କରୋନା ଭାଇରସ ଜନିତ ବିଶ୍ୱରେ ମାନ୍ଦାବସ୍ଥା ସ୍ଥିତି ନେଇ ନିବେଶକମାନେ ଏବେ ଆଶଙ୍କାରେ ରହିଛନ୍ତି। ବିଏସ୍ଇର ମିଡ କ୍ୟାପ ଏବଂ ସ୍ମଲ କ୍ୟାପ୍ ସୂଚୀ ଯଥାକ୍ରମେ ୨.୧୮% ଏବଂ ୧.୦୬% ଖସିଥିବା ଜଣାପଡିଛି।
