ବନ୍ତଳା, ୬ା୩(ଡି.ଏନ.ଏ.) – ରୁଗ୍ଣ ହୋଇପଡିଛି ଅନୁଗୋଳ ଜିଲା ବନ୍ତଳା ସରକାରୀ ପ୍ରାଣୀ ଚିକିତ୍ସାଳୟ। ଆବଶ୍ୟକ ଡାକ୍ତର ଓ କର୍ମଚାରୀ ନ ଥିବାରୁ ଚାଷୀମାନେ ସେମାନଙ୍କ ଗୃହପାଳିତ ପ୍ରାଣୀଙ୍କ ଚିକିତ୍ସା କରାଇପାରୁନାହାନ୍ତି। ବିଭିନ୍ନ ରୋଗରେ ଆକ୍ରାନ୍ତ ହୋଇ ମୃତ୍ୟୁ ମୁଖରେ ପଡୁଥିଲେ ମଧ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଅସନ୍ତୋଷ ସୃଷ୍ଟି ହୋଇଛି।
ଅନୁଗୋଳ ବ୍ଲକର ୨୨ଟି ପଞ୍ଚାୟତକୁ ନେଇ ବନ୍ତଳାରେ ପ୍ରାଣୀ ଚିକିତ୍ସାଳୟ କରାଯାଇଛି। ଏହା ଅଧୀନରେ କୁମୁରିସିଙ୍ଗା, ଇଙ୍କରବନ୍ଧ, କରତପଟା, ତଳଗଡ଼, ବଡକନ୍ତକୁଳ, ଖିଣ୍ଡା, ଜଗନାଥପୁର, ପୁରୁଣାକୋଟ ଆଦି ୮ଟି ପ୍ରାଣୀଧନ ନିରୀକ୍ଷକ କେନ୍ଦ୍ର (ଏଲ ଆଇ ସେଣ୍ଟର) ରହିଛି। ଏଥିସହିତ ଚିକିତ୍ସାଳୟ ଅଧୀନରେ ସାତକୋଶିଆ ଅଭୟାରଣ୍ୟ ମଧ୍ୟ ରହିଛି। ବନ୍ତଳା ପ୍ରାଣୀ ଚିକିତ୍ସାଳୟରେ ଜଣେ ଡାକ୍ତର, ଜଣେ ଆଟେଣ୍ଡାଣ୍ଟ, ଜଣେ ପିଅନ ଓ ଜଣେ ଚୌକିଦାର ଆବଶ୍ୟକ ଥିବାବେଳେ ବର୍ତ୍ତମାନ ସବୁ ପଦବୀ ଖାଲି ରହିଛି। ଜରପଡା ପ୍ରାଣୀ ଡାକ୍ତର ଡେପୁଟେଶନରେ ସପ୍ତାହକୁ ଦୁଇଦିନ ଆସୁଛନ୍ତି। ସେହିପରି ବଡକନ୍ତକୁଳ, ଜଗନ୍ନାଥପୁର ଏଲଆଇ ବନ୍ତଳାକୁ ଡେପୁଟେଶନରେ ଆସି କାମ କରୁଛନ୍ତି। ଏହାଛଡ଼ା କୁମୁରିସିଙ୍ଗା, ଇଙ୍କରବନ୍ଧ, ବଡ଼କନ୍ତକୁଳ, ଜଗନ୍ନାଥପୁରରେ ବର୍ତ୍ତମାନ ପ୍ରାଣୀ ନିରୀକ୍ଷକ (ଏଲ୍ଆଇ) ପଦବୀ ଖାଲି ପଡ଼ିଛି। ସେହିପରି ତଳଗଡ଼, କରତପଟା, ଖିଣ୍ଡା ଓ ପୁରୁଣାକୋଟ କେନ୍ଦ୍ରରେ ଆଟେଣ୍ଡାଣ୍ଟ ପଦବୀ ଖାଲି ପଡିଛି। ଜଣେ ଏଲ୍ଆଇ ଓ ଜଣେ ଆଟେଣ୍ଡାଣ୍ଟ ଦୁଇ ଦୁଇଟି କେନ୍ଦ୍ରର ଦାୟିତ୍ୱ ନେଇଛନ୍ତି। ନିକଟରେ ଫାଟୁଆ, ଚର୍ମ ବିଣ୍ଡି ରୋଗରେ ହଜାର ହଜାର ଗୋରୁ ଛେଳି ଆକ୍ରାନ୍ତ ହେବା ସହ ଅନେକଙ୍କ ମୃତ୍ୟୁ ହୋଇଥିଲା। କର୍ମଚାରୀ ଅଭାବରୁ ଗୃହପାଳିତ ପ୍ରାଣୀଙ୍କ ଚିକିତ୍ସା ହୋଇପାରୁ ନ ଥିବାରୁ ଚାଷୀମାନେ କ୍ଷତି ସହୁଛନ୍ତି। ଏ ଦିଗରେ ତୁରନ୍ତ ଦୃଷ୍ଟି ଦିଆଯାଇ ଚିକିତ୍ସାଳୟରେ ଡାକ୍ତର ଓ ଅନ୍ୟାନ୍ୟ ପଦବୀ ପୂରଣ କରାଯିବାକୁ ଦାବି ହୋଇଛି।
ଏ ବିଷୟରେ ବନ୍ତଳା ପ୍ରାଣୀ ଚିକିତ୍ସାଳୟ ଦାୟିତ୍ୱରେ ଥିବା ଜରପଡା ପ୍ରାଣୀ ଡାକ୍ତର ରାଜେଶ କୁମାର କବି କୁହନ୍ତି, କର୍ମଚାରୀ ଅଭାବରୁ ଅସୁବିଧା ହେଉଛି। ଦୁଇଟି ଚିକିତ୍ସାଳୟକୁ ଦେଖିବା ସମ୍ଭବ ନୁହେଁ। ଖାଲି ଥିବା ପଦବୀ ପୂରଣ ହେଲେ ସମସ୍ୟା ଦୂର ହେବ। ଜିଲା ପ୍ରାଣୀ ଡାକ୍ତର ଚିତ୍ତରଞ୍ଜନ ଆଚାର୍ଯ୍ୟଙ୍କ ଫୋନ ନଂ. ୯୪୩୭୨୭୩୨୬୬କୁ ଯୋଗାଯୋଗ କରାଯାଇଥିଲେ ମଧ୍ୟ ମତାମତ ମିଳିପାରିନାହିଁ।
