ପୁରୀ ଅଫିସ,୧୯ା୩: ଜଳିଗଲା ନୀଳଚକ୍ର ବାନା । ମହାଦୀପରୁ ନିଅଁା ଲାଗି ନୀଳଚକ୍ର ତଳେ ବନ୍ଧାଯାଇଥିବା ୨/୩ଟି ମାନସିକ ବାନା ପୋଡ଼ିଯାଇଛି। କରୋନା ମୁକାବିଲା ଉଦ୍ଦେଶ୍ୟରେ ଶୁକ୍ରବାରଠୁ ଶ୍ରୀମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ କରିବାକୁ ଗୁରୁବାର ନିଷ୍ପତ୍ତି ନିଆଯିବାର କିଛି ଘଣ୍ଟା ପରେ ବାନା ପୋଡ଼ିଯିବାକୁ ନେଇ ନାନା ପ୍ରକାର ଚର୍ଚ୍ଚା ଶୁଣିବାକୁ ମିଳୁଛି। କେହି କେହି ଏହାକୁ ଅଶୁଭ ବୋଲି କହୁଥିବାବେଳେ ଆଉ କେହି ପବନ ଯୋଗୁ ବାନାରେ ନିଆଁ ଲାଗିଥିବା କହିଛନ୍ତି ।
ପ୍ରତ୍ୟେକ ଏକାଦଶୀରେ ଶ୍ରୀମନ୍ଦିର ଚୂଡ଼ାକୁ ମହାଦୀପ ଉଠିଥାଏ। ଜଗତର ମଙ୍ଗଳ କାମନା କରି ଅଁଳା ବେଢ଼ାରେ ଏହି ଦୀପ ଜଳାଯାଇଥାଏ। ଗୁରୁବାର ଏକାଦଶୀ ଥିବାରୁ ସନ୍ଧ୍ୟା ପ୍ରାୟ ସାଢେ ୭ଟାରେ ଚୂନରା ସେବକ ମହାଦୀପ ନେଇ ଅଁଳା ବେଢାରେ ଜାଳିଥିଲେ। ମହାଦୀପ ଲାଗିବାର କିଛି ସମୟ ପରେ ହଠାତ୍ ପବନ ବହିଥିଲା। ଏହି ପବନ ଯୋଗୁ ନୀଳଚକ୍ର ତଳେ ବନ୍ଧାଯାଇଥିବା ମାନସିକ ବାନାରେ ନିଅଁା ଲାଗି ଯାଇଥିଲା। ପ୍ରାୟ ୨/୩ଟି ବାନାରେ ନିଅଁା ଲାଗିଯିବାରୁ ପବନରେ ନିଅଁା ଉଡ଼ିଥିଲା। ଭକ୍ତମାନେ ଏହା ଦେଖି ବାନା ପୋଡିଗଲା ବାଲି ପାଟି କରିଥିଲେ। ପରେ ଚୂନରା ସେବକ ଉପରକୁ ଯାଇ ନୀଳଚକ୍ର ତଳେ ବନ୍ଧା ଯାଇଥିବା ଅନ୍ୟ ବାନାଗୁଡ଼ିକୁ ଖୋଲି ଆଣିଥିଲେ। ଏନେଇ ସେବାୟତ ମଧୁସୂଦନ ଦାସ ମହାପାତ୍ରଙ୍କୁ ପଚାରିବାରେ, ପ୍ରତ୍ୟେକ ଏକାଦଶୀରେ ନୀଳଚକ୍ର ତଳେ ବନ୍ଧାଯାଇଥିବା ବାନା ଖୋଲାଯାଇ ମହାଦୀପ ଉଠିଥାଏ। କିନ୍ତୁ ଗୁରୁବାର ଏହି ବାନାଗୁଡ଼ିକ ଖୋଲା ନଯାଇ ମହାଦୀପ ଉଠିଥିଲା। ପବନ ଅଧିକ ଜୋରରେ ବହିବାରୁ ୩/୪ଟି ବାନାରେ ନିଅଁା ଲାଗି ଉଡ଼ିଥିଲା ବୋଲି ଦାସମହାପାତ୍ର କହିଛନ୍ତି। । ଭକ୍ତ ଦିଲୀପ ବରାଳଙ୍କ କହିବା ହେଲା, ବାନାରେ ନିଅଁା ଲାଗିବା ପରେ ପବନରେ ନିଅଁା ଉଡ଼ିଥିଲା। ବଡ଼ଦାଣ୍ଡରେ ଭକ୍ତମାନେ ଠିଆ ହୋଇ ଏହାକୁ ଦେଖିଥିଲେ। ଶ୍ରୀମନ୍ଦିର ଲୋକ ସମ୍ପର୍କ ଅଧିକାରୀ ଲକ୍ଷ୍ମୀଧର ପୂଜାପଣ୍ଡା କହିଛନ୍ତି, ଏକାଦଶୀ ଯୋଗୁ ମନ୍ଦିର ଚୂଡ଼ାକୁ ମହାଦୀପ ଉଠିଥିଲା। ପବନ ଯୋଗୁ ନୀଳଚକ୍ର ତଳେ ବନ୍ଧା ଯାଇଥିବା ବାନାରେ ନିଅଁା ଲାଗିଥିଲା। ଶ୍ରୀମନ୍ଦିର ସୁପରଭାଇଜର ଚୂନରା ସେବକଙ୍କୁ ଜଣାଇବା ପରେ ସେମାନେ ଯାଇ ମୁଖ୍ୟ ବାନାକୁ ଛାଡି ଅନ୍ୟ ବାନାକୁ ଖୋଲି ଆଣିଥିଲେ ।
ଯଦି ଏପରି ଘଟଣା ଘଟିଥିବ ତାହା ଦେଶ ପାଇଁ ଶୁଭଙ୍କର ନୁହେଁ ବୋଲି ଗବେଷକ ଡ. ନରେଶ ଚନ୍ଦ୍ର ଦାଶ କହିଛନ୍ତି। ସେହିପରି ଶୁକ୍ରବାରଠାରୁ ଜିଲା ପ୍ରଶାସନ ଭକ୍ତଙ୍କ ଦର୍ଶନ ବନ୍ଦ କରୁଛି । ତା ପୂର୍ବରୁ ବାନା ପୋଡ଼ିଯିବା ବଡ଼ ଅଘଟଣକୁ ସୂଚାଉଛି ବୋଲି ଭକ୍ତ ଶ୍ରୀଧର ସାହୁ କହିଛନ୍ତି।
