ବାଲେଶ୍ୱର ଅଫିସ,୧୩।୧୦: ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟରେ ରବିବାର ଚିକିତ୍ସା ଅବହେଳାରୁ ଜଣେ ମହିଳାଙ୍କ ଗର୍ଭସ୍ଥ ଶିଶୁର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଏନେଇ ମହିଳାଙ୍କ ସ୍ବାମୀ ମୁଖ୍ୟ ଚିକିତ୍ସାଳୟ ପରିସରରେ ଥିବା ପୋଲିସ ଫାଣ୍ଡିରେ ରବିବାର ସନ୍ଧ୍ୟାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ଟାଉନ ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ କରାଯିବ ବୋଲି ଆଇଆଇସି ସରୋଜିନୀ ନାୟକ ସୂଚନା ଦେଇଛନ୍ତି।
ସଦର ଥାନା ଅଧୀନ ପରିଖି ଅଞ୍ଚଳର ହରେକୃଷ୍ଣ ଗିରିଙ୍କ ସ୍ତ୍ରୀ ସୁମନ ପ୍ରସୂତି ନିମନ୍ତେ ଶନିବାର ସନ୍ଧ୍ୟା ପ୍ରାୟ ୭ଟା ୨୬ ମିନିଟ୍ରେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେ ଗର୍ଭ ଯନ୍ତ୍ରଣାରେ କଷ୍ଟ ପାଉଥିବା ବେଳେ ଡାକ୍ତର ଓ ନର୍ସଙ୍କୁ ଚିକିତ୍ସା ନିମନ୍ତେ ଅନୁରୋଧ କରିଥିଲେ। ଦୀର୍ଘ ୪ଘଣ୍ଟା ପରେ ରାତି ୧୧ଟା ୪୫ ମିନିଟ୍ ସମୟରେ ଡାକ୍ତର ପହଞ୍ଚତ୍ ସୁମନଙ୍କୁ ଚିକିତ୍ସା କରି ସ୍ବାଭାବିକ ଭାବେ ପ୍ରସବ ହେବ ବୋଲି କହି ଆଶ୍ୱାସନା ଦେଇଥିଲେ। ରାତି ସାରା ସୁମନ ପ୍ରସବ ଯନ୍ତ୍ରଣାରେ ଛଟପଟ ହେଉଥିବା ବେଳେ ରବିବାର ପୂର୍ବାହ୍ନ ୯ଟାରେ ଅନ୍ୟ ଜଣେ ଡାକ୍ତର ପହଞ୍ଚତ୍ ଚିକିତ୍ସା କରିଥିଲେ। ପୂର୍ବାହ୍ନ ୧୦ଟା ବେଳେ ତାଙ୍କର ମୃତ ଶିଶୁକନ୍ୟା ଜନ୍ମ ହୋଇଥିଲା। ଏହାକୁ ନେଇ ପରିବାର ଲୋକେ ଓ ସମ୍ପର୍କୀୟମାନେ ଅସନ୍ତୁଷ୍ଟ ହେବା ସହ ଚିକିତ୍ସା ଅବହେଳାରୁ ମହିଳାଙ୍କର ପ୍ରଥମ ସନ୍ତାନଙ୍କ ମୃତ୍ୟୁ ହୋଇଥିବାର ଅଭିଯୋଗ କରିଛନ୍ତି।
