ନୟାଗଡ଼ ଅଫିସ,୨୬।୫-ନୟାଗଡ଼ ଜିଲା ନୂଆଗାଁ ବ୍ଲକ ବହାଡ଼ାଝୋଲା ଢିପିସାହିରେ ଜଣେ ବ୍ୟକ୍ତିଙ୍କ ଘରେ ଗ୍ୟାସ୍ ଲିକ୍ରୁ ନିଆଁ ଲାଗି ୪ ଗୁରୁତର ହୋଇଛନ୍ତି। ସେମାନଙ୍କ ମଧ୍ୟରେ ୩ଜଣ ଗୋଟିଏ ପରିବାର ସଦସ୍ୟ ହୋଇଥିବାବେଳେ ଅନ୍ୟଜଣେ ତାଙ୍କ ସମ୍ପର୍କୀୟ । ଗୁରୁତର ହେଲେ ଢିପିସାହିର ଜିତେନ୍ଦ୍ର ଘଟୁଆଳ (୫୫) , ତାଙ୍କର ଦୁଇ ପୁଅ ବିଜୟ ଘଟୁଆଳ (୩୦) ଓ ବୁଲୁ ଘଟୁଆଳ (୨୫) ଏବଂ ସିଙ୍ଗାରପଲ୍ଲୀ ଗ୍ରାମର ଜଗନ୍ନାଥ ସେନାପତି (୨୭)।
ପ୍ରକାଶ ଯେ, ଜିତେନ୍ଦ୍ରଙ୍କ ଘରେ ଥିବା ଗ୍ୟାସ୍ ଲଗାଯିବାବେଳେ କୌଣସି କାରଣରୁ ତାହା ଜଳି ନ ଥିଲା। ଏ ନେଇ ଜିତେନ୍ଦ୍ର ସିଙ୍ଗାରପଲ୍ଲୀ ଗ୍ରାମରେ ଗ୍ୟାରେଜ କରିଥିବା ତାଙ୍କ ସମ୍ପର୍କୀୟ ଜଗନ୍ନାଥଙ୍କୁ ଡାକିଥିଲେ। ଜଗନ୍ନାଥ ରାତ୍ର ୯ଟାରେ ଗ୍ୟାସ୍ ସଜାଡି ସାରି ଲାଇଟର ମାରୁଥିବା ବେଳେ ଘରେ ନିଆଁ ଲାଗି ଚାରିଆଡକୁ ବ୍ୟାପୀ ଯାଇଥିଲା। ନିଆଁ ଜଗନ୍ନାଥଙ୍କ ଦେହରେ ଲାଗିବା ସହ ସେଠାରେ ଉପସ୍ଥିତ ଥିବା ଜିତେନ୍ଦ୍ର, ବିଜୟ ଓ ବୁଲୁ ନିଆଁ ସଂସ୍ପର୍ଶରେ ଆସିଥିଲେ। ସମସ୍ତଙ୍କୁ ଉଦ୍ଧାର କରାଯାଇ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ତେବେ ସେଠାରେ ସମସ୍ତଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ସ୍ଥାନାନ୍ତର କରାଯାଇଛି।
