ଯେତେବେଳେ ଭାଗ୍ୟଦେବୀ ପ୍ରସନ୍ନ ହେବେ ସମସ୍ତ ଅସମ୍ଭବ ସମ୍ଭବ ହୋଇଯିବ। ଏମିତି କିଛି ଅସମ୍ଭବ ସମ୍ଭବ ହୋଇଛି ଶାରଦା ଦେବୀଙ୍କ କ୍ଷେତ୍ରରେ। ଯିଏ କି ଆଦୌ ସ୍କୁଲ ନ ଯାଇ ୩ଟି ବହି ଲେଖିଛନ୍ତି। ହିମାଚଳପ୍ରଦେଶର ଧର୍ମଶାଳା ଅଞ୍ଚଳର ସୁକଡ ଗାଁରେ ରହୁଥିବା ୯୫ ବର୍ଷୀୟା ଶାରଦା ଦେବୀ। ସେ କେବେ ସ୍କୁଲ ଦୁଆରମୁହଁ ମାଡ଼ିନାହାନ୍ତି। କିନ୍ତୁ ୩ଟି କବିତା ବହି ଲେଖିଛନ୍ତି। ଏହି ବହି ଏବେ ଭାଷା ଏବଂ ସଂସ୍କୃତି ବିଭାଗର ଜିଲା ସଂଗ୍ରାହାଳୟରେ ସ୍ଥାନ ପାଇଛି। ଶାରଦା ଦେବୀ ହେଉଛନ୍ତି ସୁକଡ଼ର ପ୍ରଫେସର ପଣ୍ଡିତ ବଦ୍ରିଦତ୍ତ ଝିଅ। ଯିଏକି ସ୍କୁଲ ଯାଇନାହାନ୍ତି। କାରଣ ସେତେବେଳେ ଝିଅମାନଙ୍କୁ ପାଠ ପଢ଼ିବା ପାଇଁ ସୁଯୋଗ ଦିଆଯାଉ ନ ଥିଲା। କିନ୍ତୁ ଶାରଦା ଦେବୀଙ୍କ ପାଠପଢ଼ାରେ ବହୁ ଆଗ୍ରହ ଥିଲା। ତେଣୁ ତାଙ୍କ ପିତା ଘରେ ପଢ଼ିବାକୁ କହିଲେ। ଶାରଦା ଦେବୀ ଘରେ ଲେଖାପଢ଼ା କରୁଥିଲେ। ଯାହା ତାଙ୍କୁ ଆଜି ଏକ ସ୍ବତନ୍ତ୍ର ପରିଚୟ ଦେଇଛି। ପାଠପଢ଼ାରେ ଏତେ ରୁଚି ଥିଲା ଯେ, ସେ ୭୦ ଦଶକରେ ୩ ଖଣ୍ଡ କବିତା ବହି ଲେଖିଦେଲେ। ଶାରଦା ଦେବୀଙ୍କ ପ୍ରଥମ କବିତା ସଂକଳନ ‘ମାତା କା କବଚ’, ଦ୍ୱିତୀୟରେ ‘ପହାଡ଼ି ଦୁର୍ଗ ସପ୍ତସତୀ’ ଏବଂ ତୃତୀୟଟି ‘ପଙ୍ଖୁଡି’। ୧୯୮୪ରେ ତତ୍କାଳୀନ ଶିକ୍ଷାମନ୍ତ୍ରୀ ପଣ୍ଡିତ ସନ୍ତରାମ ଶାରଦା ଦେବୀଙ୍କ କବିତା ସଂକଳନକୁ ଭାଷା ସଂସ୍କୃତି ବିଭାଗରେ ସ୍ଥାନ ପାଇବାକୁ ସ୍ବୀକୃତି ଦେଇଥିଲେ । ଯାହା ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି।
